IPL 2025 संदर्भात आली मोठी अपडेट; खेळाडूंच्या लिलाव कधी व कुठे होणार, जाणून घ्या सविस्तर

Published: Monday, November 4, 2024, 17:42 [IST]

IPL 2025 Auction Date and Venue : आयपीएल 2025 साठी काही दिवसांपूर्वीच सर्व फ्रँचायझींनी रिटेन केलेल्या खेळाडूंची यादी जाहीर केली. तर अनेक संघांनी कर्णधारांना रिलीज केले. यामध्ये ऋषभ पंत, श्रेयस अय्यर आणि केएल राहुलसारख्या स्टार खेळाडूंचा समावेश आहे. रिटेंशननंतर आता आयपीएल 2025 चा मेगा लिलाव कधी होणार, हा प्रश्न सर्वांना पडला आहे. परंतु आता लिलावाची तारीख आणि ठिकाण याबाबत मोठी बातमी समोर आली आहे.

BCCIकडून अधिकृत घोषणा नाही

मिळालेल्या माहितीनुसार, या महिन्याच्या अखेरीस आयपीएल 2025 मेगा लिलाव होण्याची शक्यता आहे. सौदी अरेबियाची राजधानी रियादमध्ये मेगा लिलाव होण्याची शक्यता आहे. एएनआयने आपल्या एका अहवालात ही माहिती दिली. दरम्यान, अद्याप बीसीसीआयने यासंदर्भात कोणतीही अधिकृत घोषणा केलेली नाही.

सर्व आयपीएल संघाकडून आतुरतेने प्रतीक्षा

न्यूज एजन्सी एएनआयनुसार दिलेल्या माहितीनुसार, आयपीएल 2025 चा मेगा लिलाव 24 नोव्हेंबर ते 25 नोव्हेंबर दरम्यान रियादमध्ये होऊ शकतो. गेल्या अनेक दिवसांपासून या महिन्याच्या अखेरीस मध्यपूर्वेतील एका मोठ्या शहरात मेगा लिलाव होण्याची शक्यता वर्तवली जात होती, जी आता जवळपास निश्चित मानली जात आहे.

दुसरीकडे, सर्व संघ आयपीएल लिलावाची आतुरतेने वाट पाहत आहेत. यावेळी लिलावात एकापेक्षा एक मोठे आणि खेळाडू आपले नशीब आजमावताना दिसणार आहेत. ज्यामुळे कोणता संघ कोणत्या खेळाडूंवर बोली लावणार आणि कोणत्या खेळाडूंना राईट टू मॅच वापरून संघात घेतले जाणार याबाबत मात्र उत्सुकता लागलेली आहे.