गाजावाजा करूनही मुंडेंच्या लेकीची निवडणुकीतून माघार; वैद्यनाथ बँक निवडणुकीत नवा ट्विस्ट!

राज्याच्या राजकारणात नेहमीच चर्चेत असणाऱ्या मुंडे कुटुंबातून आणखी एक सदस्य निवडणुकीच्या रिंगणात उतरल्याने मोठी उत्सुकता निर्माण झाली होती. भाजपचे दिवंगत नेते आणि माजी केंद्रीय मंत्री गोपीनाथ मुंडे यांची तिसरी कन्या यशश्री मुंडे यांनी वैद्यनाथ अर्बन को-ऑपरेटिव्ह बँकेच्या संचालक मंडळाच्या निवडणुकीसाठी अर्ज दाखल केला होता. मात्र, आता ऐनवेळी त्यांनी आपली उमेदवारी मागे घेतल्याने राजकीय वर्तुळात जोरदार चर्चांना उधाण आले आहे.

माघारीमागे काय?

येत्या १० ऑगस्ट रोजी वैद्यनाथ अर्बन को-ऑपरेटिव्ह बँकेसाठी मतदान होणार आहे. आज (मंगळवार) अर्ज माघारी घेण्याचा शेवटचा दिवस होता. बँकेच्या १७ जागांसाठी ही निवडणूक प्रक्रिया सुरू आहे. सुरुवातीला यशश्री मुंडे यांनी उमेदवारी अर्ज दाखल केल्याने निवडणुकीत एक नवा उत्साह संचारला होता, कारण त्या पहिल्यांदाच निवडणुकीच्या रिंगणात उतरल्या होत्या. यापूर्वी त्यांनी वैद्यनाथ साखर कारखान्याचे कामकाजही पाहिले होते.

मिळालेल्या माहितीनुसार, सध्या खेळीमेळीच्या वातावरणात ही निवडणूक प्रक्रिया पार पडत आहे. संचालक मंडळाने घेतलेल्या निर्णयानुसार, माजी खासदार प्रीतम मुंडे यांच्याकडेच बँकेचे नेतृत्व देण्याचे निश्चित झाल्याचे बोलले जात आहे. या सामंजस्यानुसारच यशश्री मुंडे यांनी आपली उमेदवारी मागे घेतल्याचे दिसत आहे. विशेष म्हणजे, प्रीतम मुंडे आणि सुरेखा मेनकुदळे या दोन महिला बिनविरोध निवडून आल्या आहेत, ज्यामुळे मुंडे भगिनींमधील एकी पुन्हा अधोरेखित झाली आहे.

उद्या (बुधवार) या निवडणुकीची अंतिम यादी जाहीर होईल आणि त्यानंतर १० ऑगस्ट रोजी मतदानाची प्रक्रिया पार पडेल. १२ ऑगस्ट रोजी मतमोजणी होणार आहे.

कोण आहेत यशश्री मुंडे?

दिवंगत गोपीनाथ मुंडे यांच्या तीन कन्यांपैकी यशश्री या सर्वात धाकट्या आहेत. पंकजा मुंडे आणि प्रीतम मुंडे यांच्या त्या भगिनी आहेत. पेशाने वकील असलेल्या यशश्री मुंडे यांनी इंग्रजी माध्यमातून आपले शिक्षण पूर्ण केले आहे, तर त्यांच्या दोन्ही भगिनींचे शिक्षण मराठी माध्यमातून झाले आहे. काही वर्षांपूर्वी त्यांना अमेरिकेतील कार्नेल विद्यापीठाकडून 'प्रॉमिसिंग आशियाई स्टुडन्ट' म्हणून गौरवण्यात आले होते.

वैद्यनाथ बँकेच्या निवडणुकीतील त्यांच्या प्रवेशाने त्या पुन्हा एकदा प्रकाशझोतात आल्या होत्या, मात्र आता माघार घेतल्याने त्यांच्या पुढील राजकीय वाटचालीबद्दल उत्सुकता कायम आहे.