संजय गायकवाड यांचे '5' मोठे वाद, ज्यामुळे गायकवाड आले होते अडचणीत; नेमका इतिहास काय?

बुलढाणा मतदारसंघातून शिवसेना (शिंदे गट) कडून निवडून आलेले आमदार संजय रामभाऊ गायकवाड पुन्हा एकदा वादाच्या केंद्रस्थानी आले आहेत. मुंबईतील आमदार निवासातील कँटीनमध्ये अन्नावरून वाद घालत त्यांनी थेट कर्मचाऱ्याला मारहाण केल्याची घटना समोर आली आहे. यानंतर त्यांचा व्हिडिओ सोशल मीडियावर प्रचंड व्हायरल झाला असून, राजकीय वर्तुळात संतापाची लाट पसरली आहे.

काय घडलं नेमकं?

9 जुलैच्या सकाळी, मुंबईतील आकाशवाणी आमदार निवासाच्या कँटीनमध्ये डाळीमध्ये दुर्गंधी आल्याचा आरोप करत आमदार संजय गायकवाड यांनी कर्मचाऱ्याला हाताचे जबरदस्त फटकारे मारले. घटनास्थळी ते बनियन आणि लुंगीमध्येच गेले होते, आणि संतापाच्या भरात त्यांनी कर्मचाऱ्यावर हात उचलला. या घटनेचा व्हिडिओ काही वेळातच सोशल मीडियावर व्हायरल झाला.

या घटनेमुळे विधानमंडळ अधिवेशनाच्या पार्श्वभूमीवर वातावरण तापले असून, विरोधकांनी संजय गायकवाड यांच्यावर तातडीने कारवाईची मागणी केली आहे.

संजय गायकवाड: वादांशी जोडलेलं राजकीय व्यक्तिमत्व

संजय गायकवाड यांनी 2019 आणि 2024 मध्ये बुलढाणा मतदारसंघातून विजय मिळवून शिवसेनेत (शिंदे गट) आपली जागा भक्कम केली. सध्या ते उपमुख्यमंत्री एकनाथ शिंदे यांच्या नेतृत्वाखालील शिंदे गटात सक्रिय आहेत. मात्र, त्यांच्या अनेक वादग्रस्त विधानांमुळे ते वारंवार चर्चेत राहिले आहेत:

त्यांचे काही वादग्रस्त प्रसंग:

राहुल गांधींना धमकी (सप्टेंबर 2024):

काँग्रेस नेते राहुल गांधी यांनी आरक्षणासंदर्भात केलेल्या वक्तव्यावर गायकवाड म्हणाले होते, "जो राहुल गांधींची जीभ छाटेल, त्याला 11 लाखांचे बक्षीस देईन." या विधानामुळे प्रचंड वाद निर्माण झाला होता. काँग्रेसने त्यांच्या विरोधात तक्रार दाखल केली होती.

पोलीस यंत्रणेवर टीका (एप्रिल 2025):

त्यांनी महाराष्ट्र पोलीस दलाला "जगातील सर्वात अकार्यक्षम खाते" असे संबोधून राजकीय खळबळ उडवून दिली होती. मुख्यमंत्री देवेंद्र फडणवीस यांनी यावर नाराजी व्यक्त करत उपमुख्यमंत्री एकनाथ शिंदे यांना त्यांच्या आमदाराला समज द्यायला सांगितलं होतं.

शिवजयंती मिरवणुकीत मारहाण (मार्च 2024):

एका मिरवणुकीत सहभागी असलेल्या तरुणावर त्यांनी पोलिसांच्या काठीने मारहाण केल्याचा व्हिडिओ प्रसारित झाला होता. त्यांचा दावा होता की, "त्या तरुणाकडे चाकू होता."

जनतेविरोधी वक्तव्य (जानेवारी 2025):

बुलढाण्यातील सभेत त्यांनी म्हणाले होते, "या मतदारांना फक्त दारू आणि मटण पाहिजे," यामुळे लोकांचा रोष ओढवून घेतला होता.

महापुरुषांचा अपमान (जुलै 2025):

भाषिक वादाच्या पार्श्वभूमीवर, त्यांनी छत्रपती संभाजी महाराज व इतर मराठा नेत्यांचा संदर्भ देत "ते मूर्ख होते का?" असे वक्तव्य केल्याचा आरोप झाला. यामुळे मराठी समाजामध्ये संतापाची लाट उसळली.

राजकीय परिणाम व प्रतिक्रिया

गायकवाड यांच्या अति आक्रमक शैलीमुळे शिंदे गटातही अंतर्गत अस्वस्थता आहे. विरोधी पक्षांनी त्यांच्यावर त्वरित निलंबनाची मागणी केली आहे. उपमुख्यमंत्री एकनाथ शिंदे व मुख्यमंत्री देवेंद्र फडणवीस यांनी यापूर्वीही त्यांना संयम राखण्याचा इशारा दिला होता.

संजय गायकवाड हे एक आक्रमक आणि स्पष्टवक्ते आमदार म्हणून ओळखले जातात. मात्र, त्यांच्या वादग्रस्त कृतींमुळे त्यांच्याभोवती वादांचे वादळ कायम राहते. आताची कँटीनमधील मारहाणीची घटना ही त्यांच्या राजकीय कारकिर्दीतील आणखी एक वादग्रस्त पायरी ठरत आहे.