धंगेकरांचा मुरलीधर मोहोळांवर सनसनाटी आरोप; केंद्रीय मंत्रिपदाचा गैरवापर, गोखलेंना जेट, नेमकं प्रकरण?

Ravindra Dhankekar Accuses Murlidhar Mohol : पुण्यातील जैन बोर्डिंग हाऊसच्या वादग्रस्त जमीन खरेदी व्यवहारामुळे आधीच चर्चेत असलेले भाजप खासदार आणि केंद्रीय राज्यमंत्री मुरलीधर मोहोळ यांच्या अडचणीत आता आणखी भर पडली आहे.

शिंदे गटाचे नेते तथा माजी आमदार रवींद्र धंगेकर यांनी मोहोळ यांच्यावर अत्यंत गंभीर आणि सनसनाटी आरोप केला असून, त्यांनी आपल्या केंद्रीय हवाई उड्डाण राज्यमंत्रिपदाचा गैरवापर केल्याचा दावा केला आहे. धंगेकर यांनी थेट १९७ कोटी रुपयांच्या आर्थिक नुकसानीचा आकडा देत हे प्रकरण पंतप्रधान नरेंद्र मोदी यांच्यापर्यंत नेले आहे.

धगेंकरांनी काय केले नवीन आरोप?

विशाल गोखलेंसाठी मंत्रिपदाचा गैरवापर

रवींद्र धंगेकर यांच्या मते, मुरलीधर मोहोळ यांनी त्यांच्या केंद्रीय हवाई उड्डाण राज्यमंत्रिपदाचा गैरवापर करून जैन बोर्डिंग जमीन खरेदीतील त्यांचे व्यावसायिक भागीदार असलेल्या श्री. विशाल गोखले यांना मोठा लाभ मिळवून दिला.

मुंबईतील जुहू विमानतळावरून आपले ऑपरेशन्स चालवणाऱ्या बॉम्बे फ्लायिंग क्लबकडून एअरपोर्ट्स अथॉरिटी ऑफ इंडियाला देय असलेल्या रकमेच्या वसुली आणि थकबाकीच्या प्रकरणात मोठी अनियमितता झाली.

पुण्यातील जैन बोर्डिंग होस्टेलच्या बेकायदा जमीन खरेदी व्यवहारातील मुख्य लाभार्थी असणाऱ्या श्री. विशाल गोखले यांना लाभ मिळवून देण्याची केंद्रीय राज्यमंत्री श्री.मुरलीधर मोहोळ यांची ही पहिलीच वेळ नाही…..

केंद्रीय हवाई उड्डाण राज्यमंत्री पदाचा गैरवापर करत यापूर्वी देखील एका… pic.twitter.com/UFckuebg3n

— Ravindra Dhangekar Official (@DhangekarRavii) October 26, 2025

आर्थिक नुकसान

लेखापरीक्षण अहवाल आणि अंतर्गत अंदाजानुसार, नियमानुसार व्यावसायिक दरांनी शुल्क आकारले असते, तर फ्लायिंग क्लबकडून सुमारे २०० कोटी रुपयांची थकबाकी वसुली अपेक्षित होती.

मोहोळ यांचा हस्तक्षेप

धंगेकरांचा दावा आहे की, मुरलीधर मोहोळ यांच्या प्रत्यक्ष-अप्रत्यक्ष सहभागामुळे हे प्रकरण केवळ ₹२.३० कोटींमध्ये तडजोड करण्यात आले. या तडजोडीमुळे हवाई उड्डाण विभागाचे तब्बल १९७ कोटी रुपयांचे प्रचंड मोठे नुकसान झाले, असा खळबळजनक आरोप रवींद्र धंगेकर यांनी केला आहे.

प्रायव्हेट जेटची 'दलाली'

धंगेकर यांनी केवळ आर्थिक नुकसानीचा आरोप केला नाही, तर ज्या फ्लायिंग क्लबला मोहोळ यांनी मदत केली, त्या क्लबने मोहोळ यांचे व्यावसायिक भागीदार विशाल गोखले यांना प्रायव्हेट जेट उपलब्ध करून दिल्याचे निदर्शनास आणले आहे. "ज्या क्लबला याचा फायदा मिळवून दिला, त्या मुंबई फ्लायिंग क्लबने विशाल गोखले यांच्यासाठी प्रायव्हेट जेट पाठवले होते."

यामागे नेमकी कोणत्या प्रकारच्या कामाची दलाली श्री. विशाल गोखले मार्फत केंद्रीय राज्यमंत्री श्री. मुरलीधर मोहोळ यांनी केली आहे? हा तपासाचा विषय आहे, असे धंगेकर यांनी म्हटले आहे.

व्हिडिओचाही दिला पुरावा!

धंगेकर यांनी आपल्या पोस्टसोबत संबंधित क्लबच्या प्रायव्हेट जेटने विशाल गोखले यांचा कुंभमेळाव्याचा व्हिडिओ शेअर करत असल्याचा उल्लेख केला आहे, ज्यामुळे या आरोपाला अधिक धार आली आहे.

धंगेकरांच्या आरोपांचे राजकीय महत्त्व

पुण्यातील जैन बोर्डिंग जमीन व्यवहार प्रकरणात मुरलीधर मोहोळ यांचे नाव जोडले गेल्यापासून, रवींद्र धंगेकर सातत्याने त्यांच्यावर हल्ला करत आहेत. या नव्या आरोपांमुळे:

मोहोळ यांच्या अडचणीत वाढ

केंद्रीय मंत्रिपदाच्या गैरवापराचा थेट आरोप झाल्याने मोहोळ यांना आता केवळ पुण्यातील नव्हे, तर केंद्रीय स्तरावर स्पष्टीकरण द्यावे लागणार आहे. हा १९७ कोटींचा थेट आर्थिक नुकसान आणि अनियमिततेचा आरोप असल्याने, भाजप सरकारवर विरोधी पक्ष अधिक दबाव आणू शकतात.

राजकीय लढाई

धंगेकर यांनी हे प्रकरण थेट पंतप्रधान मोदींपर्यंत नेले असून, यामुळे पुणे शहरातील ही राजकीय लढाई आता राज्य आणि केंद्र सरकारच्या उच्च स्तरावर पोहोचली आहे. रवींद्र धंगेकर यांची सोशल मीडिया पोस्ट/ट्विट करून हा आरोप केलाय. रवींद्र धंगेकर यांच्या या सनसनाटी आरोपांवर केंद्रीय मंत्री मुरलीधर मोहोळ किंवा भाजप पक्षाकडून अधिकृत प्रतिक्रिया काय आली आहे, ते काय प्रतिक्रिया देतात याकडे सर्वांचे लक्ष लागून आहे.