मुंबईतील लोकल ट्रेन कात टाकणार; 12,500 कोटींचा 'हा' नवा प्लॅन आलाय, उपनगरात राहणाऱ्यांची होणार 'सोय'

मुंबईतील लोकल रेल्वेची गर्दी कमी करण्यासाठी रेल्वे प्रशासनाचे प्रयत्न सुरु आहेत. रेल्वेचे नेटवर्कचा विस्तारही प्रस्तावित आहे. लवकरच मुंबईत नवीन उपनगरीय रेल्वे कॉरिडॉर आणि दोन विद्यमान मार्गांचा विस्तार करण्यात येणार आहे, असे वृत्त काही वृत्तवाहिन्यांनी दिले आहे. त्यामुळे स्थानिक आणि लांब पल्ल्याच्या गाड्या वेगळ्या होण्यास मदत होईल.

काय आहे उद्दीष्ट?

पनवेल, नवी मुंबई, वसई-विरार आणि कल्याणच्या उत्तरेकडील भागात सार्वजनिक वाहतूक व्यवस्था मजबूत करण्यासाठी रेल्वे प्रशासन प्रयत्नशिल आहे. अधिकाऱ्यांच्या मते, हे प्रकल्प मुंबई शहरी वाहतूक प्रकल्प (MUTP) च्या फेज 3B चा भाग आहेत. त्यांचा खर्च अंदाजे 12,500 कोटी रुपये आहे. या योजनेचा एक महत्त्वाचा घटक म्हणजे पनवेल-वसई पट्ट्यासह ६० किलोमीटर लांबीचा उपनगरीय रेल्वे कॉरिडॉर बांधणे, ज्यासाठी १०,००० कोटी रुपये खर्च अपेक्षित आहे. याव्यतिरिक्त, आसनगाव-कसारा मार्गाच्या सुधारणांसाठी २,५०० कोटी रुपये खर्च अपेक्षित आहे.

उपनगरीय नेटवर्क वेगळे होईल

या प्रकल्पांना अद्याप मंजुरी मिळालेली नाही. रेल्वे अधिकारी आणि महाराष्ट्र सरकारमध्ये याबाबत चर्चा सुरू आहे. अधिकाऱ्यांनी सांगितले आहे की, नवीन रेल्वे कॉरिडॉरचा सुमारे २०-२५ टक्के भाग उंचावलेला असेल. मुंबई रेल्वे विकास कॉर्पोरेशन (MRVC) चे अध्यक्ष आणि व्यवस्थापकीय संचालक विलास वाडेकर यांनी म्हटले आहे की, "यामुळे उपनगरीय रेल्वे नेटवर्क वेगळे होईल. विद्यमान रेल्वे कॉरिडॉरचा विस्तार करण्याव्यतिरिक्त, पनवेल-वसई मार्गावर नवीन उपनगरीय मार्ग ही एक महत्त्वाची भर असेल. आम्ही वसईपासून विरार आणि बोरिवलीकडे प्रत्येकी एक असे दोन उन्नत रेल्वे उड्डाणपूल बांधण्याची योजना आखली आहे."

नवीन रेल्वे कॉरिडॉर होणार

प्रस्तावित उन्नत रेल्वे उड्डाणपुलांमुळे प्रवाशांच्या मागणीनुसार पनवेलहून ठाणे-दिवा मार्गे विरार, डहाणू, बोरिवली आणि अंधेरीकडे जाणाऱ्या लोकल गाड्या धावू शकतील. रेल्वे सूत्रांनी सांगितले की, नवीन कॉरिडॉरमुळे मध्य आणि पश्चिम रेल्वेच्या मुख्य आणि हार्बर मार्गांवर कनेक्टिव्हिटीमध्ये लक्षणीय सुधारणा होईल. नवीन उपनगरीय कॉरिडॉर समर्पित फ्रेट कॉरिडॉर आणि कळंबोली यार्डमधून जाण्याची अपेक्षा आहे. याव्यतिरिक्त, ते येणाऱ्या नवी मुंबई आंतरराष्ट्रीय विमानतळ आणि पनवेलमधील रेल्वे टर्मिनसपर्यंत प्रवेश प्रदान करू शकते, असे अधिकाऱ्यांनी सांगितले.

कर्जत-पनवेला होणार कॉरिडॉर

सध्या, वसई-पनवेल मार्गाचा वापर प्रामुख्याने लांब पल्ल्याच्या आणि मालवाहतूक गाड्यांसाठी केला जातो, तर ठाणे आणि पनवेलला जोडणाऱ्या ट्रान्स-हार्बर रेल्वे कॉरिडॉरवर लोकल गाड्या धावतात. आणखी एक रेल्वे कॉरिडॉर नेरुळ, बेलापूर आणि उरणला जोडतो. या प्रकल्पांव्यतिरिक्त, पनवेल-कर्जत विभागात २,७८२ कोटी रुपये खर्चाच्या नवीन उपनगरीय रेल्वे कॉरिडॉरचे बांधकाम प्रगतीपथावर आहे. अधिकाऱ्यांनी पुष्टी केली आहे की ७० टक्के काम पूर्ण झाले आहे आणि हा प्रकल्प डिसेंबरपर्यंत पूर्ण होण्याची अपेक्षा आहे.