मुंबई मनपा निवडणुकीसाठी भाजपची 66 उमेदवारांची पहिली यादी जाहीर;'या' दिग्गजांची मुलं-नातेवाईक मैदानात

Updated: Monday, December 29, 2025, 11:53 [IST]

BJP First List BMC Election 2026 : मुंबई महानगरपालिकेच्या (BMC) निवडणुकीसाठी भारतीय जनता पक्षाने कंबर कसली असून आज ६६ उमेदवारांची पहिली अधिकृत यादी जाहीर केली आहे. या यादीमध्ये भाजपने अनुभवी माजी नगरसेवकांसह काही महत्वाच्या चेहऱ्यांनाही संधी दिली आहे. विशेष म्हणजे, महायुतीमधील जागावाटपाचा तिढा सुटण्यापूर्वीच भाजपने आपल्या प्रमुख उमेदवारांना 'एबी फॉर्म' वाटप करून निवडणुकीच्या मैदानात उडी घेतली आहे. किरीट सोमय्या यांचे पुत्र नील सोमय्या आणि माजी नगरसेवक मकरंद नार्वेकर यांच्यासह अनेक दिग्गजांची नावे या यादीत निश्चित झाली आहेत.

भाजपची पहिली यादी: प्रमुख उमेदवार

यादीत भाजपने जुन्या जाणत्या नगरसेवकांवर पुन्हा एकदा विश्वास दाखवला आहे.

कुटुंब आणि वारसदार

'एबीपी माझा'ने दिलेल्या वृत्तानुसार, किरीट सोमय्या यांचे सुपुत्र नील सोमय्या (वॉर्ड १०७), राहुल नार्वेकर यांचे बंधू मकरंद नार्वेकर (वॉर्ड २२६) आणि त्यांच्या पत्नी हर्षिता नार्वेकर (वॉर्ड २२७).

माजी आमदार विनोद घोसाळकर यांची सून तेजस्वी घोसाळकर (वॉर्ड २) यांना भाजपने उमेदवारी देऊन शिवसेनेला शह देण्याचा प्रयत्न केला आहे.

इतर महत्त्वाचे चेहरे

राजश्री शिरोडकर (वॉर्ड १७२), विनोद मिश्रा (वॉर्ड ४३), प्रभाकर शिंदे (वॉर्ड १०६) आणि नवनाथ बन (वॉर्ड १३५) यांसारख्या आक्रमक नेत्यांना स्थान मिळाले आहे.