उपराष्ट्रपती निवडणूक २०२५: कधी होणार उपराष्ट्रपतीपदासाठी निवडणुक? निवडणूक आयोगाने दिले उत्तर

उपराष्ट्रपती निवडणूक २०२५: संसदेच्या पावसाळी अधिवेशनाच्या पहिल्याच दिवशी जगदीप धनखड यांनी उपराष्ट्रपतीपदाचा राजीनामा देऊन सर्वांना आश्चर्याचा धक्का दिला. आता त्यांची जागा कोण घेणार, यावरून राजकीय वर्तुळात जोरदार चर्चा सुरू आहे. सध्या, निवडणूक आयोगाने लवकरच उपराष्ट्रपतीपदाच्या निवडणुकीची तारीख जाहीर केली जाईल असे स्पष्ट केले आहे. त्यापूर्वी काही महत्त्वाच्या प्रक्रिया पूर्ण करणे आवश्यक आहे आणि त्यावर सध्या काम सुरू आहे. नियमानुसार, १९ सप्टेंबर २०२५ पूर्वी ६० दिवसांच्या आत ही निवडणूक घेणे बंधनकारक आहे.

राष्ट्रपती द्रौपदी मुर्मू यांनी जगदीप धनखड यांचा राजीनामा स्वीकारला आहे. आता संवैधानिक प्रक्रियेनुसार, पद रिक्त झाल्यापासून ६० दिवसांच्या आत नवीन उपराष्ट्रपतींची निवड होणे आवश्यक आहे. सध्या या पदासाठी अनेक नावे चर्चेत आहेत. यामध्ये राज्यसभेचे सध्याचे उपसभापती हरिवंश यांच्यापासून ते बिहारचे राज्यपाल आरिफ मोहम्मद खान यांच्या नावाचाही समावेश आहे.

उपराष्ट्रपती निवडणूक २०२५: कधी होणार निवडणूक?

या संदर्भात निवडणूक आयोगाने एक अधिसूचना जारी केली आहे. त्यानुसार, उपराष्ट्रपती निवडणूक २०२५ साठी भारतीय निवडणूक आयोगाने तयारी सुरू केली आहे. आवश्यक प्रक्रिया पूर्ण झाल्यानंतर, शक्य तितक्या लवकर उपराष्ट्रपती निवडणुकीचे वेळापत्रक जाहीर केले जाईल. नवीन उपराष्ट्रपती निवडून येईपर्यंत, नियमानुसार, सध्याचे उपसभापती हरिवंश हेच सभागृहाचे कामकाज पाहतील.

उपराष्ट्रपतींची निवड संसदेच्या दोन्ही सभागृहांमधील सर्व खासदार एकत्र येऊन करतात. यामध्ये नामनिर्देशित सदस्यांचाही समावेश असतो. ही निवडणूक आनुपातिक प्रतिनिधित्व (Proportional Representation) आणि एकल हस्तांतरणीय मतदान प्रणाली (Single Transferable Voting System) द्वारे होते.

नवीन उपराष्ट्रपतीपदासाठी अनेक नावे चर्चेत

नवीन उपराष्ट्रपतीपदासाठी अनेक नावे शर्यतीत असल्याचे सांगितले जात आहे. मीडिया रिपोर्ट्सनुसार, बिहारचे राज्यपाल आरिफ मोहम्मद खान आणि सध्याचे उपसभापती हरिवंश यांची नावे चर्चेत आहेत. याव्यतिरिक्त, आरजेडीने दावा केला आहे की, भाजप नीतीश कुमार यांना उपराष्ट्रपती बनवू शकते. कर्पूरी ठाकूर यांचे पुत्र रामनाथ ठाकूर यांचे नाव देखील शर्यतीत असल्याचे बोलले जात आहे.