Mahashivratri 2026: या पवित्र दिवशी विसरूनही कापू नका केस-नखे; जाणून घ्या त्यामागील धार्मिक कारणे!

Maha Shivratri 2026 : महाशिवरात्री हा भगवान शंकराच्या भक्तांसाठी अत्यंत महत्त्वाचा आणि आध्यात्मिक उर्जेचा सण आहे. या दिवशी आपण उपवास करतो, अभिषेक करतो आणि मनोभावे पूजा करतो. मात्र, पूजेसोबतच शास्त्रात सांगितलेल्या नियमांचे पालन करणेही तितकेच महत्त्वाचे असते. अनेकदा भक्तांच्या मनात शंका असते की, महाशिवरात्रीच्या दिवशी केस किंवा नखे कापावीत का?" या प्रश्नाचे सविस्तर उत्तर आणि शास्त्रोक्त नियम खालीलप्रमाणे आहेत.

२०२६ मध्ये महाशिवरात्री कधी आहे?

• हिंदू पंचांगानुसार, २०२६ मध्ये महाशिवरात्री रविवार, १५ फेब्रुवारी रोजी साजरी केली जाईल.
• चतुर्दशी तिथी प्रारंभ : १५ फेब्रुवारी २०२६, संध्याकाळी ५:०४ वाजता.
• चतुर्दशी तिथी समाप्ती : १६ फेब्रुवारी २०२६, संध्याकाळी ५:३४ वाजता.
• निशिता काल (पूजा वेळ): १५ फेब्रुवारीच्या मध्यरात्री पूजेचा विशेष मुहूर्त असेल.

केस कापणे योग्य की अयोग्य?

धार्मिक शास्त्रे आणि ज्योतिषशास्त्रानुसार, महाशिवरात्रीसारख्या अत्यंत पवित्र तिथीला केस किंवा नखे कापणे निषिद्ध मानले जाते. याची प्रमुख कारणे खालीलप्रमाणे आहेत.

सकारात्मक उर्जेचा ऱ्हास

असे मानले जाते की, महाशिवरात्रीला विश्वात सकारात्मक लहरींचे प्रमाण जास्त असते. केस आणि नखे कापणे ही विनाशाची किंवा तोडण्याची कृती मानली जाते, ज्यामुळे शरीरातील सकारात्मक ऊर्जा कमी होऊ शकते.

शास्त्रातील पुरावा

महाभारतातील अनुशासन पर्वात असे नमूद केले आहे की, शुभ तिथी आणि सणांच्या दिवशी केस कापल्याने मनुष्याच्या धन, धान्य, बुद्धी आणि ज्ञानाचे नुकसान होऊ शकते. महाशिवरात्री ही भगवान शिवाच्या उपासनेची तिथी असल्याने या दिवशी शौचकर्मापासून (केस, दाढी, नखे कापणे) लांब राहणेच हिताचे ठरते.

भक्ती आणि संयम

महाशिवरात्रीचा उपवास हा केवळ अन्नाचा त्याग नसून तो मनाच्या आणि शरीराच्या संयमाचाही असतो. या दिवशी बाह्य सौंदर्यापेक्षा आंतरिक शुद्धीवर भर दिला जातो. त्यामुळे अशा शुभ दिवशी केस कापणे हे पूजेच्या पावित्र्याला बाधा आणणारे मानले जाते.

भाविकांसाठी खास सल्ला!

जर तुम्हाला केस किंवा नखे कापायची असतील, तर ती महाशिवरात्रीच्या एक किंवा दोन दिवस आधी कापून घ्यावीत. सणाच्या दिवशी पूर्णपणे शुचिर्भूत होऊन, स्वच्छ वस्त्रे परिधान करून केवळ नामस्मरण आणि पूजेवर लक्ष केंद्रित करणे श्रेष्ठ ठरते.