उष्णतेच्या लाटेमुळे दूध उत्पादनात घट, दुधाच्या दरात होऊ शकते वाढ

By oneindia staff

Updated: Tuesday, June 18, 2024, 12:16 [IST]

Mumbai: लोकसभा निवडणूक संपल्यानंतर अमूल आणि मदर डेअरी या दोन्ही कंपन्यांनी दुधाच्या दरात वाढ केली आहे. दुधाचे दर वाढल्यानंतर सर्वसामान्यांना महागाईचा मोठा झटका बसणार आहे. महागड्या दुधाचा परिणाम केवळ दुधाच्या दरापुरता मर्यादित राहणार नाही, तर त्यामुळे दुधापासून बनवलेल्या सर्वच वस्तूंचे दर वाढणार आहेत.

मात्र दुधाच्या दरातील वाढ इथेच थांबणार नाही. तर, देशातील अनेक राज्यांमध्ये उष्णतेची लाट दिसत असल्याने दुधाच्या उत्पादनावर परिणाम होऊ शकतो, त्यामुळे दुधाचे दर आणखी वाढू शकतात.

दुधाचे उत्पादन कमी होऊ शकते

मदर डेअरीनेही दूध दरवाढीबाबत दिलेल्या निवेदनात म्हटले आहे की, गेल्या अनेक महिन्यांपासून दूध खरेदीसाठी जादा दर दिला जात असला तरी त्याचा बोजा ग्राहकांवर टाकला जात नाही. याशिवाय संपूर्ण देशात प्रचंड उष्णतेची लाट दिसत असून त्यामुळे दूध उत्पादनात घट होण्याची शक्यता आहे. दूध उत्पादक आणि ग्राहकांचे हित लक्षात घेऊन केवळ तीन ते चार टक्के दरात वाढ केल्याचे मदर डेअरीने सांगितले.

मदर डेअरी - अमूलने भाव वाढवले

रविवारी अमूल ब्रँड अंतर्गत दूध आणि दुग्धजन्य पदार्थांची विक्री करणाऱ्या गुजरात कोऑपरेटिव्ह मिल्क मार्केटिंग फेडरेशनने (GCMMF) देशभरात दुधाच्या दरात प्रतिलिटर 2 रुपयांनी वाढ करण्याची घोषणा केली आहे. जीसीएमएमएफने आपल्या निवेदनात म्हटले आहे की, ऑपरेशन कॉस्ट आणि दूध उत्पादन खर्च वाढल्यामुळे दुधाच्या दरात वाढ करण्याचा निर्णय घेण्यात आला आहे. तसेच दराचा आढावा घेतल्यास उत्पादकांना अधिक भाव मिळू शकेल व त्यामुळे दुधाचे उत्पादन वाढण्यासही मदत होईल. फेडरेशनने सांगितले की, फेब्रुवारी 2023 नंतर पहिल्यांदाच दुधाच्या दरात वाढ केली आहे.

मिठाई आणि बिस्किटांच्या किमती वाढू शकतात

किरकोळ महागाई दराच्या आकडेवारीनुसार, दुधाचा महागाई दर फेब्रुवारी 2023 मध्ये 9.65 टक्क्यांवर पोहोचला होता, जो एप्रिल 2024 मध्ये 2.97 टक्क्यांवर आला आहे. मात्र देशातील अतिउष्णता आणि उष्णतेच्या लाटेमुळे दूध उत्पादनावर परिणाम होऊ शकतो. उत्पादनात घट झाल्यामुळे दूध महाग होऊ शकते. महागड्या दुधाचा फटका केवळ दुधाच्या भाववाढीपुरता मर्यादित राहणार नाही. दुधाचे दर वाढल्याने तूप, लोणी, चीज, खवा, दही लस्सीचे भावही वाढू शकतात. आईस्क्रीम, मिठाईपासून ते बिस्किटे आणि चॉकलेट्स, चहाचे घोटणेही महाग होणार आहे.