तरुणांनो सावधान! हृदयविकाराचा झटका येण्यापूर्वी शरीर देतं 'हे' गंभीर संकेत; दुर्लक्ष ठरू शकतं घातक

Heart Attack in Youth Don't Ignore These 7 Early Warning Signs : पूर्वी हृदयविकार हा केवळ वृद्धांचा आजार मानला जायचा. मात्र, बदलती जीवनशैली, खाण्यापिण्याच्या चुकीच्या सवयी, कामाचा ताण आणि व्यायामाचा अभाव यामुळे आता विशी-तिशीतील तरुणांमध्येही हृदयविकाराचे प्रमाण चिंताजनक वाढले आहे. अनेकदा तरुण शरीराकडे दुर्लक्ष करतात, ज्यामुळे हा आजार शेवटच्या क्षणी गंभीर रूप धारण करतो. हृदयविकाराचा झटका येण्यापूर्वी शरीर काही संकेत देते, जे ओळखणे अत्यंत आवश्यक आहे.

तरुणांनी 'या' लक्षणांकडे दुर्लक्ष करू नये

१. छातीत अस्वस्थता वाटणे

छातीत जडपणा, दाब किंवा सतत अस्वस्थ वाटणे हे हृदय नीट काम करत नसल्याचे पहिले लक्षण आहे. जर ही अस्वस्थता वारंवार जाणवत असेल, तर त्वरित तज्ञांचा सल्ला घ्यावा.

२. हातांमध्ये वेदना होणे

अनेकदा छातीतून सुरू झालेली वेदना डाव्या हाताकडे सरकते. तरुणांमध्ये ही वेदना अधिक तीव्र असू शकते. हे हृदयविकाराचे स्पष्ट लक्षण मानले जाते.

३. सततचा थकवा आणि उत्साह नसणे

विनाकारण नेहमी थकल्यासारखे वाटणे किंवा रोजची छोटी कामे करतानाही दम लागणे, हे हृदयाच्या कमकुवत कार्याचे लक्षण असू शकते.

४. जास्त घाम येणे

कठोर परिश्रम किंवा व्यायाम न करताही अचानक थंड घाम येणे हे हृदयविकाराचे लक्षण असू शकते. शरीराच्या अशा अचानक बदलांकडे कधीही दुर्लक्ष करू नका.

५. पाय आणि हातांना सूज येणे

जेव्हा हृदयाची रक्त पंप करण्याची क्षमता कमी होते, तेव्हा हात-पायांना सूज येऊ लागते. याला 'एडेमा' असेही म्हणतात. ही स्थिती हृदयविकाराची पूर्वसूचना असू शकते.

६. घोरणे आणि श्वास घेण्यास त्रास

झोपेत खूप घोरणे आणि त्यासोबत श्वास घेताना अडथळा येणे (Shortness of breath) हे हृदयाशी संबंधित समस्येचे संकेत आहेत.

७. चक्कर येणे आणि हृदयाचे ठोके चुकणे

अचानक चक्कर येणे किंवा हृदयाचे ठोके अचानक खूप वेगवान होणे किंवा अनियंत्रित होणे, हे हृदयावर पडणाऱ्या अतिरिक्त दबावाचे प्रतीक आहे.