तुमची मुलंही आवडीने 'क्रीम बिस्किट' खातात का? सावधान! 'Cream' आणि 'Creme' मधला हा धक्कादायक फरक वाचा

Difference between cream and creme biscuits side effects : लहान मुलांपासून मोठ्यांपर्यंत सगळ्यांचाच आवडता स्नॅक म्हणजे 'क्रीम बिस्किट'. पण, तुम्ही जे बिस्किट 'दूध आणि क्रीम'चे समजून खात आहात, ते खरंच आरोग्यासाठी सुरक्षित आहे का? सोशल मीडिया इन्फ्लुएंसर रेवंत हिमात्सिंगका, ज्यांना आपण 'फूड फार्मर' (Food Farmer) म्हणून ओळखतो, त्यांनी क्रीम बिस्किटांच्या पाकिटावर असलेल्या एका मोठ्या फसवणुकीचा पर्दाफाश केला आहे.

'Cream' विरुद्ध 'Creme': शब्दांचा खेळ आणि सत्य

अनेक बिस्किटांच्या पाकिटावर 'Cream' ऐवजी 'Creme' असे लिहिलेले असते. फूड फार्मरच्या मते, हा केवळ स्पेलिंगचा फरक नाही, तर त्यातील घटकांचा मोठा फरक आहे.

Cream: अधिकृतपणे 'क्रीम' म्हणजे जे दुधापासून बनलेले असते.

Creme: यामध्ये दुधाचा अंश नसून ते प्रामुख्याने वनस्पती तेल (Vegetable Oil), साखर, कृत्रिम स्वाद (Flavors) आणि रंगांपासून तयार केलेले असते.

थोडक्यात सांगायचे तर, आपण ज्याला दुधाची साय किंवा क्रीम समजतो, ते प्रत्यक्षात तेल आणि साखरेचे मिश्रण असते. कंपन्या कायदेशीर कचाट्यातून वाचण्यासाठी 'Cream' ऐवजी 'Creme' हा शब्द वापरतात.

आरोग्यावर होणारे घातक परिणाम

तज्ज्ञांच्या मते, या बिस्किटांच्या अतिसेवनामुळे मुलांच्या आरोग्यावर गंभीर परिणाम होऊ शकतात.

लठ्ठपणा: यात साखर आणि कॅलरीजचे प्रमाण खूप जास्त असते.

कोलेस्ट्रॉलची भीती: बिस्किटांमधील ट्रान्स फॅटमुळे शरीरातील वाईट कोलेस्ट्रॉल वाढू शकते.

इन्सुलिन रेझिस्टन्स: सततच्या गोड आणि प्रोसेस्ड अन्नामुळे भविष्यात मधुमेहाचा धोका निर्माण होतो.

हायपरॲक्टिव्हिटी: अतिरिक्त साखरेमुळे मुलांमध्ये चंचलता किंवा हायपरॲक्टिव्हिटी वाढू शकते.

पालकांसाठी महत्त्वाची टीप

कोणतेही पॅकेज्ड फूड खरेदी करताना पाकिटाच्या पुढच्या भागावरील आकर्षक फोटोंना न भुलता, पाकिटाच्या मागे दिलेली 'Ingredients' (घटक) आणि 'Nutrition Value' नक्की वाचा. समोर 'दूध आणि शक्ती'चा दावा असला, तरी मागे 'पाम ऑइल' आणि 'हाय शुगर' लिहिलेले असू शकते.