कोविड लस आणि हृदयविकाराचा झटका यामध्ये थेट संबंध आहे का? AIIMS-ICMR च्या अहवालातून स्पष्टता

कोविड-19 लसीकरणामुळे भारतात हृदयविकाराच्या झटक्यांचे प्रमाण वाढले आहे का? हा प्रश्न सध्या सोशल मीडियावर आणि सामान्य संवादांमध्ये मोठ्या प्रमाणावर चर्चिला जात आहे. मात्र, AIIMS (अखिल भारतीय आयुर्विज्ञान संस्था) आणि ICMR (भारतीय वैद्यकीय संशोधन परिषद) यांच्या संयुक्त अभ्यासानुसार, कोरोना लस पूर्णपणे सुरक्षित आहे. हृदयविकाराच्या वाढत्या घटनांसाठी लस जबाबदार नसल्याचेही स्पष्ट करण्यात आले आहे.

अभ्यासात काय निष्कर्ष निघाले?

AIIMS आणि ICMR च्या अभ्यासानुसार, तरुणांमध्ये किंवा कमी वयाच्या लोकांमध्ये अचानक हृदयविकाराचा झटका येण्यामागे कोविड लसीकरण कारणीभूत नाही. लस अनेक टप्प्यांतील वैद्यकीय चाचण्या पूर्ण केल्यानंतर वापरात आणली गेली आहे, आणि ती सुरक्षित असल्याचे पुन्हा एकदा अधोरेखित करण्यात आले आहे.

अहवालात म्हटले आहे की, लसीकरण आणि हृदयविकार या दोघांमध्ये कोणताही थेट संबंध नाही. याआधीही भारत सरकारच्या आरोग्य मंत्रालयाने असेच मत मांडले होते की, कोरोना लस हृदयविकाराच्या घटनांना कारणीभूत नाही.

देशभरात 47 रुग्णालयांमध्ये झाला अभ्यास

हा अभ्यास देशभरातील 19 राज्ये आणि केंद्रशासित प्रदेशांतील एकूण 47 रुग्णालयांमध्ये मे ते ऑगस्ट 2023 या कालावधीत करण्यात आला. यात ऑक्टोबर 2021 ते मार्च 2023 दरम्यान अचानक मृत्युमुखी पडलेल्या निरोगी तरुणांवर सखोल संशोधन करण्यात आले.

राजकीय आरोप-प्रत्यारोप

कोरोना लसीबाबत काही राजकीय नेत्यांनी ती असुरक्षित असल्याचा आरोप केला होता. कर्नाटकचे मुख्यमंत्री सिद्धरामय्या यांनी हासन जिल्ह्यात हृदयविकाराने झालेल्या २२ मृत्यूंनंतर लसीवर प्रश्नचिन्ह उपस्थित केले होते. मात्र, वैद्यकीय तज्ज्ञांचे स्पष्ट मत आहे की, या मृत्यूंचा कोविड लशीशी कोणताही संबंध नाही.

AIIMS-ICMR च्या अहवालातून स्पष्ट होते की, कोविड लस ही पूर्णपणे सुरक्षित आहे. लसीकरण आणि हृदयविकाराच्या घटनांमध्ये कोणताही वैद्यकीयदृष्ट्या सिद्ध झालेला संबंध नाही. त्यामुळे नागरिकांनी अफवांवर विश्वास ठेवू नये आणि फक्त अधिकृत माहितीवरच आधारित निर्णय घ्यावेत.