Rajpal Yadav Jail Update :राजपाल यादव जेलमधून कधी सुटणार? पत्नी राधाने दिली मोठी अपडेट; वाचा प्रकरण

Rajpal Yadav Jail Update Will Rajpal Yadav be released today : बाॅलीवूडचा हास्यसम्राट, काॅमेडी स्टार आणि आपल्या विनोदी अभिनयाने प्रेक्षकांना खळखळून हसवणारे अभिनेते राजपाल यादव सध्या एका कायदेशीर पेचामुळे चर्चेत आहेत. चेक बाऊन्स प्रकरणी राजपाल यादव सध्या दिल्लीच्या तिहार जेलमध्ये असून त्यांच्या सुटकेकडे चाहत्यांचे लक्ष लागले आहे.

आज, १६ फेब्रुवारी २०२६ रोजी त्यांच्या केसची महत्त्वाची सुनावणी पार पडणार आहे. दरम्यान, त्यांची पत्नी राधा यादव यांनी एका मुलाखतीत राजपाल यांच्या प्रकृतीबाबत आणि सुटकेच्या अफवांवर मोठे भाष्य केले आहे. ते नेमके काय आहे हे आपण जाणून घेऊया.

काय म्हणाल्या पत्नी राधा?

राजपाल यादव जेलमधून बाहेर आल्याचा एक व्हिडिओ सोशल मीडियावर व्हायरल झाला होता. मात्र, राधा यादव यांनी या बातम्या केवळ अफवा असल्याचे स्पष्ट केले. "राजपाल ठीक आहेत आणि आमचे संपूर्ण कुटुंब त्यांच्या पाठीशी खंबीरपणे उभे आहे. ते जेलमधून बाहेर आले आहेत पण तिहारमधून अद्याप त्यांची सुटका झालेली नाही. आज (१६ फेब्रुवारी) होणाऱ्या सुनावणीनंतरच त्यांच्या बेलबाबत चित्र स्पष्ट होईल," असे राधा यांनी 'बॉम्बे टाइम्स'ला दिलेल्या मुलाखतीत सांगितले.

राजपाल यादव जेलमध्ये का गेले? (काय आहे प्रकरण?)

राजपाल यादव यांच्यावर झालेल्या कारवाईची मुळे २०१० सालातील एका कर्ज प्रकरणात आहेत.

• कर्ज आणि चित्रपट: राजपाल यादव यांनी 'अता-पता लापता' या त्यांच्या दिग्दर्शकीय पदार्पणाच्या चित्रपटासाठी 'मुरली प्रोजेक्ट्स प्रायव्हेट लिमिटेड'कडून सुमारे ५ कोटी रुपयांचे कर्ज घेतले होते.
• चेक बाऊन्स: हा चित्रपट बॉक्स ऑफिसवर अपयशी ठरला, ज्यामुळे राजपाल यांच्यावर कर्जाचा डोंगर वाढला. त्यांनी दिलेले धनादेश (चेक) बँकेत बाऊन्स झाले.
• कायदेशीर कारवाई: चेक बाऊन्स झाल्यामुळे त्यांच्यावर 'नेगोशिएबल इन्स्ट्रुमेंट ॲक्ट'च्या कलम १३८ अंतर्गत गुन्हा दाखल करण्यात आला.
• कोर्टाची भूमिका: कोर्टाने त्यांना अनेकदा सवलत दिली आणि सेटलमेंटसाठी वेळही दिला. मात्र, वारंवार मुदत वाढवूनही कर्जाची रक्कम न फेडल्यामुळे अखेर कोर्टाने त्यांना आत्मसमर्पण (Surrender) करण्याचे आदेश दिले होते.

बॉलिवूडकडून मिळतोय पाठिंबा

राजपाल यादव यांनी जेलमध्ये जाण्यापूर्वी दिलेले भावनिक भाषण पाहून अनेक बॉलिवूड सेलिब्रिटींचे मन विरघळले होते. सलमान खान, अजय देवगण, वरुण धवन आणि अगदी टीव्हीएफ (TVF) ने देखील राजपाल यांच्या समर्थनार्थ मदतीचा हात पुढे केला आहे. या कठीण काळात बॉलिवूडमधून मिळत असलेल्या पाठिंब्याबद्दल त्यांच्या पत्नीने सर्वांचे आभार मानले आहेत.