चित्रपटसृष्टीतून धक्कादायक बातमी; चित्रपट निर्माते गुरुप्रसाद यांची आत्महत्या, टोकाच पाऊल का उचललं

चित्रपट विश्वातून धक्कादायक बातमी समोर आली आहे. कन्नड चित्रपटाचे निर्मात गुरुप्रसाद यांचे निधन झाले आहे. पोलिसांनी त्यांचा कुजलेल्या अवस्थेतील मृतदेह बंगळुरू येथील अपार्टमेंटमधून ताब्यात घेतला. सूत्रांकडून मिळालेल्या माहितीनुसार, गुरुप्रसाद यांनी काही दिवसांपूर्वी आत्महत्या केली असावी. कारण ते गेल्या काही दिवसांपासून आर्थिक संकटांचा सामना करत असल्याची माहिती समोर आली आहे.

शेजाऱ्यांना दुर्गंधी आली अन् उघडकीस आले

काही माध्यमांच्या वृत्तानुसार, गुरुप्रसाद यांच्या घराशेजारी राहणाऱ्यांना दुर्गंधी येऊ लागली. यानंतर त्यांनी पोलिसांना माहिती दिली. घटनास्थळी पोहोचल्यावर पोलिसांना गुरुप्रसाद पंख्याला लटकलेले दिसले. काही दिवसांपूर्वी त्यांनी आत्महत्या केल्याचे उघड झाले आहे. गुरुप्रसाद यांच्यावर खूप कर्ज होते. कर्जदार त्यांच्यावर दबाव आणत होते. त्यांच्याविरुद्ध न्यायालयातही अनेक खटले प्रलंबित होते. त्यांचा नुकताच रंगनायक हा चित्रपट फ्लॉप झाला, त्यामुळे ते नैराश्यात गेले होते. या सगळ्याला कंटाळून गुरुप्रसाद यांनी स्वतःचा जीव घेतला.

काही दिवसांपूर्वीच केले होते दुसरे लग्न

मिळालेल्या माहितीनुसार, 52 वर्षीय गुरुप्रसाद यांनी काही दिवसांपूर्वीच दुसरे लग्न केले होते. आत्महत्येच्या दिवशी त्यांची गर्भवती पत्नी तिच्या माहेरी गेलेली होती. या घटनेने त्यांच्या पत्नीला मोठा धक्का बसला आहे.

दिग्दर्शकासह अभिनयातही चुणूक

गुरुप्रसाद यांचा जन्म 2 नोव्हेंबर 1972 रोजी बंगळुरू, कर्नाटक येथे झाला. 2006 मध्ये माता या चित्रपटातून त्यांनी दिग्दर्शन क्षेत्रात पदार्पण केले. हा चित्रपट बॉक्स ऑफिसवर हिट ठरला. यानंतर त्यांनी 'अदेलू मंजुनाथ' हा चित्रपट दिग्दर्शित केला, तोही हिट ठरला.

दिग्दर्शनासोबतच त्यांनी अनेक चित्रपटांमध्येही काम केले. अनेक रिॲलिटी शोमध्ये जज म्हणूनही काम केले. गुरुप्रसाद यांनी 2014 मध्ये बिग बॉस कन्नडच्या दुसऱ्या सीझनमध्ये वाईल्ड कार्ड स्पर्धक म्हणून एंट्री घेतली होती. सध्या ते एडेमी चित्रपटाच्या शूटिंगमध्ये व्यस्त होते.