New rules november 1 : आधार अपडेट ते गॅस सिलिंडर दरापर्यंत! 1 नोव्हेंबरपासून 'या' 5 नियमांत मोठे बदल

New rules november 1 2025 : ऑक्टोबर महिना संपायला अवघे दोन दिवस उरले असून, १ नोव्हेंबर २०२५ पासून देशातील अनेक महत्त्वाच्या आर्थिक आणि प्रशासकीय नियमांमध्ये बदल होणार आहेत. आधार अपडेट करण्याची प्रक्रिया आता अधिक सुलभ झाली आहे, तर दुसरीकडे बँक खात्यांचे नॉमिनेशन आणि एसबीआय क्रेडिट कार्डचे शुल्क वाढणार आहेत. हे बदल सर्वसामान्य नागरिकांच्या थेट खिशावर परिणाम करणारे असल्याने, नवे नियम जाणून घेणे अत्यावश्यक आहे.

१ नोव्हेंबर २०२५ पासून लागू होणारे महत्त्वाचे ५ बदल

१. आधार अपडेट प्रक्रिया

नवीन नियम: UIDAI ने आधार कार्डमध्ये नाव, जन्मतारीख, पत्ता किंवा मोबाईल नंबर यांसारखे महत्त्वाचे बदल आता पूर्णपणे ऑनलाइन करण्याची सुविधा दिली आहे. यापुढे कोणत्याही बदलासाठी आधार केंद्रावर जाण्याची गरज नाही; घरबसल्या सुधारणा करता येतील.

२. बँक नॉमिनेशन नियम

नवीन नियम: बँक खाते, लॉकर आणि सेफ कस्टडीसाठी आता ग्राहक एकाऐवजी चार नॉमिनी (Nominee) पर्यंत नोंदणी करू शकतील. ग्राहकाला नॉमिनींमध्ये वारसा हक्काचा किती हिस्सा द्यायचा, हे निश्चित करण्याचा अधिकार मिळेल, ज्यामुळे वारसदार निश्चित करणे सोपे होईल.

३. SBI क्रेडिट कार्ड शुल्क (फीस)

नवीन नियम: थर्ड-पार्टी ॲप्स किंवा वेबसाइट्सद्वारे (उदा. Paytm, PhonePe) मुलांची शाळा/कॉलेज फी भरल्यास, आता १% अतिरिक्त शुल्क (Extra Charge) लागेल. हे शुल्क टाळण्यासाठी ग्राहकांना आता थेट शाळा/कॉलेजच्या वेबसाइटवरून किंवा त्यांच्या POS मशीनद्वारे पेमेंट करावे लागेल.

४. म्युच्युअल फंड (MF) गुंतवणूक नियम

नवीन नियम: SEBI च्या नियमांनुसार, ॲसेट मॅनेजमेंट कंपन्या मधील अधिकारी/कुटुंबीयांनी ₹१५ लाखांहून अधिक गुंतवणूक किंवा रिडेम्प्शन केल्यास, त्याची माहिती त्वरित 'कंप्लायंस ऑफिसर'ला देणे बंधनकारक आहे. म्युच्युअल फंड गुंतवणुकीत अधिकाधिक पारदर्शकता आणि जबाबदारी वाढेल.

५. गॅस सिलिंडरच्या दरात बदल

नवीन नियम: प्रत्येक महिन्याच्या पहिल्या तारखेला पेट्रोलियम कंपन्या एलपीजी (LPG) गॅस सिलिंडरचे दर बदलतात (हा संभाव्य आणि नेहमीचा बदल आहे). १ नोव्हेंबरला व्यावसायिक आणि घरगुती गॅस सिलिंडरच्या दरात वाढ किंवा घट होण्याची शक्यता आहे.