अबब! सोन्याने सर्व विक्रम मोडले, आज 23 जुलैला इतिहासात पहिल्यांदाच एवढे झाले दर, सामान्यांना चिंता

Gold Price Today Historic rise breaks all records on July 23 : सोन्याने आतापर्यंतचे सर्व विक्रम मोडीत काढून नवा उच्चांक गाठला आहे. आज बुधवार, २३ जुलै २०२५ रोजी भारतातील सोन्याच्या दर १ लाख २ हजार ३३० रुपये प्रति १० ग्रॅमवर पोहचले आहे. हा आतापर्यंतचा इतिहासातील सर्वोच्च भाव आहे. भारत-अमेरिका व्यापार करार आणि भू-राजकीय अनिश्चिततेमुळे सोन्याच्या किमतीत ही वाढ दिसून येत आहे.

सोन्याच्या दरात मागील काही दिवसांपासून वाढ होत असतानाच आज विक्रमी दर सोन्याने गाठले आहेत. त्यामुळे सोने खरेदी सामान्यांच्या आवाक्याबाहेर जात आहे. २०२५ च्या सुरुवातीपासूनच सोन्याच्या दरात सातत्याने वाढ होत आहे. एप्रिल महिन्यात प्रथमच सोन्याने १ लाखाचा टप्पा ओलांडला होता. आज तर आणखी दोन हजार रुपयांची भर या दरात पडली आहे.

सोन्याचे आज भारतातील दर किती आहेत

सोन्याचे आज भारतातील दर उच्चांकावर पोहचले आहेत. आज २३ जुलै २०२५ रोजी १ लाख २ हजार ३३० रुपये प्रति १० ग्रॅम या नवीन विक्रमी पातळीवर पोहोचला. खास बाब म्हणजे एका आठवड्यात सोन्याचा दर ₹२,८९० ने वाढला आहे.

आजची वाढ किती?

• २४ कॅरेट सोने: ₹१०४ ने वाढून ₹१०,२३३ प्रति ग्रॅम झाले.
• २२ कॅरेट सोने: ₹९५ ने वाढून ₹ ९,३८० प्रति ग्रॅम झाले.
• १८ कॅरेट सोने: ₹७८ ने वाढून ₹७,६७५ प्रति ग्रॅम झाले.

सोन्याचे भाव का वाढत आहेत?

गुड रिटर्ननुसार, जागतिक पातळीवर, अमेरिकेने १ ऑगस्टची कर मर्यादा कायम ठेवल्याने चिंता वाढली, तर युरोपियन युनियनने संयमाने प्रतिसाद दिला आणि चीन आणि भारतासारख्या प्रमुख भागीदारांसोबत व्यापार वाटाघाटी अद्यापही सुटल्या नाहीत. या घटकांमुळे सोन्याचे भाव वाढले आहेत.

जपान आणि इंडोनेशियासोबतच्या अमेरिकेच्या व्यापार करारांशी संबंधित घडामोडींच्या पार्श्वभूमीवर आज सोन्याच्या दरात सतत वाढ झाली आहे. मजबूत डॉलरच्या हालचालीमुळे भारतातील सोन्याच्या दरावर आणखी परिणाम झाला आहे.

भू-राजकीय अनिश्चितता: भारत-अमेरिका व्यापार करार आणि जपान-इंडोनेशियासोबतच्या अमेरिकेच्या व्यापार करारांशी संबंधित घडामोडी.

मजबूत डॉलर: डॉलरची मजबूत स्थिती देखील भारतातील सोन्याच्या दरावर परिणाम करत आहे.

जागतिक चिंता: अमेरिकेने १ ऑगस्टची कर मर्यादा कायम ठेवल्याने जागतिक स्तरावर चिंता वाढली आहे.

सोन्याचे भाव आणखी वाढणार!

या वर्षाच्या सुरुवातीपासून आजपर्यंत जागतिक सुवर्ण परिषदेच्या अहवालानुसार, सोने दरात २६ टक्के वाढ नोंदवली आहे. भविष्यातील अंदाजाबाबत एमके ग्लोबल फायनान्शियल सर्व्हिसेसच्या रिया सिंग यांनी आणखी ०-५ टक्के वाढ अपेक्षित असल्याचे म्हटले आहे.तसेच उच्च चलनवाढ, मंदीची अशी परिस्थिती आल्यास १०-१५% वाढीची शक्यताही त्यांनी व्यक्त केली.

चांदीच्या दरातील वाढ

औद्योगिक मागणी वाढत असल्याने सोन्यासारखाच चांदीचाही भाव वाढत आहे. सोन्याच्या पावलावर पाऊल चांदी ठेवत असून सिल्व्हरच्या दरातही लक्षणीय वाढ झाली आहे. आज चांदीचा दर ₹११९ प्रति ग्रॅम तर प्रति किलो ₹१ लाख १९ हजार रुपये एवढा होता.

प्रमुख भारतीय शहरांमधील स्थिती

मुंबई, बंगळूरु, दिल्ली, चेन्नई, कोलकाता, हैदराबाद, वडोदरा, भोपाळ यांसारख्या प्रमुख भारतीय शहरांमध्येही सोन्याच्या किमतीत मोठी वाढ झाली आहे. ही सोन्याच्या दरातील वाढ किरकोळ दागिने खरेदीदार आणि गुंतवणूकदार दोघांसाठीही एक महत्त्वाचा टप्पा आहे. सोन्याची ऐतिहासिक कामगिरी पाहता, ही वाढ चालू राहण्याची शक्यता आहे.