नेदरलँड्सने पाकिस्तानच्या नाकी नऊ आणले; अखेर कसा झाला विजय; अश्रफ ठरला संकटमोचक!

Pak vs NED Match Result : टी-20 विश्वचषक 2026 ची सुरुवातच एका महाथराराने झाली आहे. क्रिकेटमध्ये 'अनप्रेडिक्टेबल' मानल्या जाणाऱ्या पाकिस्तान संघाला पहिल्याच सामन्यात नेदरलँड्सने नाकी नऊ आणले. एका क्षणाला पाकिस्तान हा सामना हरणार असे वाटत असतानाच, फहीम अश्रफने वादळी खेळी करत पाकिस्तानचा पराभव टाळला आणि संघाला ३ गडी राखून विजय मिळवून दिला.

नेदरलँड्सची जिद्दी फलंदाजी

कोलंबोच्या मैदानावर प्रथम फलंदाजी करताना नेदरलँड्सच्या संघाने निर्धारित २० षटकांत १४७ धावा केल्या. नेदरलँड्सच्या डावाची सुरुवात अडखळत झाली असली, तरी मध्यफळीतील फलंदाजांनी संयमी खेळ केला. कर्णधार स्कॉट एडवर्ड्स (३७ धावा) आणि बास डी लीडे (३० धावा) यांनी डावाला आकार दिला. सलामीवीर मायकेल लेविटने २४, तर कॉलिन अकरमनने २० धावांचे योगदान दिल्याने नेदरलँड्सला सन्मानजनक धावसंख्या गाठता आली.

पाकिस्तानची आश्वासक सुरुवात आणि नंतर पडझड

१४८ धावांच्या लक्ष्याचा पाठलाग करताना पाकिस्तानची सुरुवात तशी चांगली झाली होती. सलामीवीर साहिबजादा फरहानने ४७ धावांची महत्वपूर्ण खेळी केली, तर सॅम अयुबने १३ धावा जोडल्या.

एकेकाळी पाकिस्तानची स्थिती २ बाद ९८ अशी भक्कम होती. विजयासाठी ५८ चेंडूत फक्त ५० धावांची गरज होती आणि पाकिस्तान सहज जिंकेल असे वाटत होते.

परंतु, याच वळणावर सामन्याने कूस बदलली. कर्णधार सलमान आगा (१२) आणि स्टार फलंदाज बाबर आझम (१५) स्वस्तात बाद झाले. त्यानंतर नेदरलँड्सच्या पॉल व्हॅन मीकरेनने भेदक गोलंदाजी करत पाकिस्तानच्या मधल्या फळीचे कंबरडे मोडले. १०० धावा होईपर्यंत पाकिस्तानचा अर्धा संघ तंबूत परतला होता.

अटीतटीचा संघर्ष अन् फहीमची फटकेबाजी

मोहम्मद नवाज आणि शादाब खान या अनुभवी अष्टपैलू जोडीकडून चाहत्यांना अपेक्षा होत्या, पण ११४ धावांवर पाकिस्तानचे ७ गडी बाद झाले आणि स्टेडियममध्ये शांतता पसरली. नेदरलँड्स एका मोठ्या 'अपसेट'च्या उंबरठ्यावर उभा होता.

अशा कठीण प्रसंगी फहीम अश्रफ धावून आला. त्याने केवळ ११ चेंडूत २९ धावांची आक्रमक खेळी केली. त्याच्या या स्फोटक फलंदाजीमुळे पाकिस्तानने शेवटच्या षटकात रोमहर्षक विजय साजरा केला. जर फहीमने ही खेळी केली नसती, तर विश्वचषकाच्या सुरुवातीलाच पाकिस्तानला लाजीरवाण्या पराभवाचा सामना करावा लागला असता.