पाकिस्तान-इंग्लड यांच्यातील कालचा मॅच कुणी जिंकला? कोण गेलं सेमीफायनलमध्ये कुणाची झाली गोची? वाचा

T20 world cup 2026 pakistan vs england match report : टी२० विश्वचषक २०२६ च्या 'सुपर-८' फेरीतील एका थरारक सामन्यात इंग्लंडने पाकिस्तानवर मात करत उपांत्य फेरीचे (Semifinal) तिकीट निश्चित केले आहे. इंग्लंडच्या या विजयाचा खरा शिल्पकार ठरला तो म्हणजे कर्णधार हॅरी ब्रूक. त्याने संकटकाळात खेळलेल्या झंझावाती शतकी खेळीमुळे पाकिस्तानचे विश्वचषकातील आव्हान आता जवळपास संपुष्टात आले आहे.

पाकच्या साहिबजादा फरहानची अर्धशतकी झुंज

नाणेफेक जिंकून प्रथम फलंदाजी करणाऱ्या पाकिस्तानने २० षटकांत ९ बाद १६४ धावा केल्या. सलामीवीर साहिबजादा फरहानने ४५ चेंडूत ७ चौकार आणि २ षटकारांच्या मदतीने ६३ धावांची खेळी करत संघाला सावरले. बाबर आझम आणि फखर जमान यांनी प्रत्येकी २५ धावांचे योगदान दिले, परंतु त्यांना मोठी खेळी करता आली नाही. इंग्लंडकडून लियाम डॉसनने ३, तर जेमी ओव्हरटनने २ बळी टिपले.

हॅरी ब्रूकचा 'वन मॅन शो'

१६५ धावांच्या लक्ष्याचा पाठलाग करताना इंग्लंडची सुरुवात अत्यंत खराब झाली होती. शाहीन आफ्रिदीने फिलिप सॉल्ट (०) आणि जोस बटलर (२) यांना स्वस्तात बाद करून इंग्लंडला बॅकफुटवर ढकलले होते. एका टप्प्यावर इंग्लंडचे ४ गडी झटपट बाद झाले होते. मात्र, इथून कर्णधार हॅरी ब्रूकने सुत्रे हाती घेतली. ब्रूकने अवघ्या ५१ चेंडूत १० चौकार आणि ४ षटकारांसह १०० धावांची नाबाद शतकी खेळी केली. त्याला विल जॅक्सने (२८ धावा) मोलाची साथ दिली. इंग्लंडने १९.१ षटकांत हे लक्ष्य साध्य केले.

शाहीनची मेहनत वाया; पाकिस्तानचे भवितव्य टांगणीला

पाकिस्तानसाठी शाहीन आफ्रिदीने ४ बळी घेत घातक गोलंदाजी केली, पण इतर गोलंदाजांकडून त्याला हवी तशी साथ मिळाली नाही. उस्मान तारिक आणि मोहम्मद नवाज यांनी प्रत्येकी २ बळी घेतले, मात्र ते ब्रूकचे वादळ रोखू शकले नाहीत. या पराभवामुळे पाकिस्तान विश्वचषकातून बाहेर पडण्याच्या उंबरठ्यावर आहे. आता पाकिस्तानला त्यांच्या पुढच्या श्रीलंकेविरुद्धच्या सामन्यावर आणि इतर निकालांवर अवलंबून राहावे लागणार आहे.

पराभवानंतरही पाकिस्तान सेमीफायनलमध्ये कसा पोहचू शकतो?

• पाकिस्तानला त्यांचा शेवटचा सामना श्रीलंकेविरुद्ध मोठ्या फरकाने जिंकावा लागेल.
• इंग्लंडविरुद्धच्या पराभवामुळे पाकिस्तानचा रन रेट खालावला आहे. त्यामुळे त्यांना श्रीलंकेला मोठ्या अंतराने हरवून आपला रन रेट सुधारावा लागेल.
• पाकिस्तानला आता प्रार्थना करावी लागेल की, त्यांच्या गटातील इतर संघ (विशेषतः ज्यांचे गुण समान आहेत) त्यांचे पुढचे सामने मोठ्या फरकाने हारोत.
• जर त्यांच्या गटातील इतर महत्त्वाचे सामने पावसामुळे रद्द झाले आणि गुण विभागले गेले, तरच पाकिस्तानला तांत्रिकदृष्ट्या सेमीफायनसाठी संधी उरू शकते.