IND vs NZ Final: हार्दिकने 16 धावा दिल्यानंतर रोहित शर्माचं रौद्र रूप दिसलं, व्हिडीओ होतोय व्हायरल

IND vs NZ, champions trophy 2025 Final: भारत विरुद्ध न्यूझीलंड यांच्यात आज रविवारी दुबईमध्ये आयसीसी चॅम्पियन्स ट्रॉफीचा अंतिम सामना खेळला जात आहे. न्यूझीलंडचा कर्णधार मिचेल सँटनरने नाणेफेक जिंकून प्रथम फलंदाजी करण्याचा निर्णय घेतला. दरम्यान टीम इंडियाचा कर्णधार रोहित शर्माचा एक व्हिडिओ सोशल मीडियावर व्हायरल होत आहे.

रविवारी दुबईमध्ये न्यूझीलंडविरुद्धच्या अंतिम सामन्यात अष्टपैलू हार्दिक पांड्याने दुसऱ्या षटकात १६ धावा दिल्या. यानंतर टीम इंडियाचा कर्णधार रोहित शर्मा काही अपशब्द वापरताना दिसला. सोशल मीडियावर समोर आलेल्या एका व्हिडिओमध्ये चेंडू सीमारेषेवर गेल्यानंतर रोहित शर्मा काहीतरी बोलताना दिसतोय.

गेल्या तीन सामन्यांमध्ये मोहम्मद शमीसोबत नवीन चेंडू शेअर करणाऱ्या पांड्याने पहिल्याच षटकात फक्त दोन धावा दिल्या. दरम्यान या अष्टपैलू खेळाडूने त्याच्या पुढच्या षटकात 16 धावा दिल्या कारण सलामीवीर रचिन रवींद्रने त्याला दोन चौकार आणि एक षटकार मारला,त्यानंतर एक वाइड बॉल होता.

Rohit Sharma After Hardik Pandya Over😂😂😂 #Final #indvsnzfinal pic.twitter.com/uZdiQnLbxa

— Satyajit 𝕏 (@satyajit_i) March 9, 2025

25 वर्षांनी पुन्हा एकदा भारत-न्यूझीलंड आमनेसामने

15 ऑक्टोबर 2000 रोजी नैरोबी येथील जिमखाना क्लब ग्राउंडवर खेळलेल्या त्यांच्या मागील सामन्यात न्यूझीलंडने भारताचा चार विकेट्सने पराभव केला. सौरव गांगुलीच्या शानदार शतकानंतरही भारत जिंकू शकला नव्हता. 25 वर्षांपूर्वीच्या त्या सामन्यात भारताने प्रथम फलंदाजी करत 6 गडी बाद 264 धावा केल्या होत्या. सौरव गांगुली आणि सचिन तेंडुलकर यांनी पहिल्या विकेटसाठी 26.3 षटकांत 141 धावांची भागीदारी करून मजबूत पाया रचला. त्यावेळी तेंडुलकर 69 धावा करून धावबाद झाला होता.

गांगुलीने त्यावेळी त्या सामन्यात 111चेंडूत शतक ठोकले आणि भारताच्या आशा जिवंत ठेवल्या. 130 चेंडूत 117 धावा काढल्यानंतर त्याला अखेर नाथन अ‍ॅस्टलने बाद केले. न्यूझीलंडकडून स्कॉट स्टायरिसने युवराज सिंग आणि विनोद कांबळी यांचे महत्त्वाचे बळी घेतले.कर्णधार स्टीफन फ्लेमिंग आणि क्रेग स्पीअरमन लवकर बाद झाल्याने न्यूझीलंडला सुरुवातीलाच धक्का बसला. दरम्यान नॅथन अ‍ॅस्टल आणि रॉजर टोज यांनी अनुक्रमे 37 आणि 31 धावा करून संघाला गती दिली परंतु अनिल कुंबळेने त्यांना बाद केले.

या सामन्यात ख्रिस केर्न्सने महत्त्वाची भूमिका बजावली

न्यूझीलंडसाठी सामन्याचा मार्ग बदलण्यात ख्रिस केर्न्सने महत्त्वाची भूमिका बजावली. त्याने 113 चेंडूत 102 धावा करत नाबाद शतक झळकावलं. यामध्ये दोन षटकार आणि आठ चौकारांचा समावेश होता. त्याच्या खेळीमुळे न्यूझीलंडने दोन चेंडू शिल्लक असताना लक्ष्य गाठले होते.

भारत विरुद्ध न्यूझीलंड यांच्यातील आजचा अंतिम सामना रोमांचक असणार आहे. कारण दोन्ही संघांकडे पुन्हा एकदा विजेतेपद जिंकण्यासाठी मजबूत संघ आहे. या सामन्यातील विजयामुळे भारत ऑस्ट्रेलियाला मागे टाकून तिसऱ्यांदा आयसीसी चॅम्पियन्स ट्रॉफी जिंकेल.

भारताचा प्लेइंग इलेव्हन: रोहित शर्मा (कर्णधार), शुभमन गिल, विराट कोहली, श्रेयस अय्यर, अक्षर पटेल, केएल राहुल (यष्टीरक्षक), हार्दिक पंड्या, रवींद्र जडेजा, मोहम्मद शमी, कुलदीप यादव, वरुण चक्रवर्ती.

न्यूझीलंड संघ: विल यंग, ​​रचिन रवींद्र, केन विल्यमसन, डॅरिल मिशेल, टॉम लॅथम (यष्टीरक्षक), ग्लेन फिलिप्स, मायकेल ब्रेसवेल, मिशेल सँटनर (कर्णधार), नॅथन स्मिथ, काइल जेमिसन, विल्यम ओ'रोर्क.