ICC T20 Ranking : भारतीय खेळाडूंचा जगात डंका; अभिषेक शर्मा अन् वरुण चक्रवर्ती अव्वल स्थानी कायम!

ICC T20 Rankings 2026 : आंतरराष्ट्रीय क्रिकेट परिषदेने बुधवार, 11 फेब्रुवारी 2026 रोजी ताजी T-20 क्रमवारी जाहीर केली असून, यामध्ये भारतीय खेळाडूंनी पुन्हा एकदा आपले वर्चस्व सिद्ध केले आहे. युवा रक्ताच्या जोरावर भारतीय संघाने फलंदाजी आणि गोलंदाजी या दोन्ही विभागांत जगाला आपली ताकद दाखवून दिली आहे. विशेषतः अभिषेक शर्मा आणि वरुण चक्रवर्ती यांनी आपापल्या श्रेणीत अव्वल स्थान पटकावून भारतीय क्रिकेटचे भविष्य सुरक्षित असल्याचे संकेत दिले आहेत.

अभिषेक शर्माची 'विराट' झेप

भारतीय संघाचा स्फोटक सलामीवीर अभिषेक शर्मा सध्या स्वप्नवत फॉर्ममध्ये आहे. फलंदाजांच्या ताज्या क्रमवारीत तो ९०९ रेटिंग गुणांसह पहिल्या स्थानावर ठाम आहे. त्याने दुसऱ्या स्थानावर असलेल्या इंग्लंडच्या फिल साल्टवर (८२१ गुण) तब्बल ८८ गुणांची मोठी आघाडी घेतली आहे. अभिषेकची ही कामगिरी भारतीय टी२० क्रिकेटमधील नव्या युगाची नांदी मानली जात आहे.

टॉप ५ फलंदाजांची स्थिती

१. अभिषेक शर्मा (भारत) - ९०९ गुण

२. फिल साल्ट (इंग्लंड) - ८२१ गुण

३. साहिबजादा फरहान (पाकिस्तान)

४. जोस बटलर (इंग्लंड)

५. पथुम निस्सांका (श्रीलंका) इतर भारतीयांमध्ये इशान किशनने मोठी प्रगती केली असून, सात स्थानांच्या झेपसह तो आता २५ व्या क्रमांकावर पोहोचला आहे.

गोलंदाजीमध्ये वरुण चक्रवर्तीचे 'गूढ' कायम

भारतीय फिरकीपटू वरूण चक्रवर्ती आपल्या 'मिस्ट्री स्पिन'च्या जोरावर गोलंदाजांच्या क्रमवारीत अव्वल स्थानी विराजमान आहे. मात्र, त्याला पाकिस्तानच्या अबरार अहमदकडून कडवे आव्हान मिळत आहे. दोघांच्या रेटिंग पॉइंट्समध्ये अत्यंत कमी अंतर असून आगामी मालिकांमध्ये ही चुरस अधिक वाढण्याची शक्यता आहे.

भारतीय वेगवान गोलंदाज अर्शदीप सिंगनेही आपल्या कामगिरीत सुधारणा केली असून, तीन स्थानांच्या प्रगतीसह तो आता ११ व्या क्रमांकावर आला आहे. श्रीलंकेचा वानिंदू हसरंगा पाचव्या स्थानी पोहोचला असून स्कॉटलंडचा ब्रॅडली करी आणि पाकिस्तानचा सलमान मिर्झा यांनीही क्रमवारीत लक्षणीय सुधारणा केली आहे.

अष्टपैलू खेळाडूंमध्ये सिकंदर रझाचा दबदबा

२०२६ च्या टी२० विश्वचषकात झिम्बाब्वे संघाने केलेल्या प्रभावी सुरुवातीचे फळ त्यांचा कर्णधार सिकंदर रझा याला मिळाले आहे. आपल्या अष्टपैलू कामगिरीच्या जोरावर सिकंदर रझा पुन्हा एकदा जगातील नंबर १ टी२० ऑलराउंडर बनला आहे. अनुभवाच्या जोरावर त्याने तरुण खेळाडूंना मागे टाकत हे स्थान काबीज केले आहे.

रँकिंगमधील महत्त्वाचे बदल एका दृष्टिक्षेपात

भारतीय खेळाडूंची ही कामगिरी पाहता, आगामी आंतरराष्ट्रीय सामन्यांमध्ये टीम इंडियाचे हे वर्चस्व असेच राहील, अशी चिन्हे दिसत आहेत. विशेषतः २०२६ च्या विश्वचषकाच्या पार्श्वभूमीवर अभिषेक आणि वरुणचा हा फॉर्म भारतासाठी जमेची बाजू ठरणार आहे.