चॅम्पियन्स ट्रॉफीपूर्वीच शुभमन गिल बनला नंबर-1 फलंदाज, पाकिस्तानच्या बाबर आझमलाही टाकले मागे

ICC Ranking Latest News, Shubhman Gill Make Top Batter in ODI : आयसीसी चॅम्पियन्स ट्रॉफी 2025 ची सुरुवात आजपासून (19 फेब्रुवारी) होत आहे. अर्थात या सामन्याची सुरुवात होण्याआधीच भारतीय संघासाठी एक आनंदाची बातमी समोर आली आहे.

भारतीय संघाचा युवा स्टार फलंदाज शुभमन गिल ICC च्या ताज्या एकदिवसीय रॅंकिंगमध्ये नंबर वन फलंदाज बनला आहे. या आणखी एक महत्त्वाची बाब म्हणजे भारतीय संघाच्या या नव्या दमाच्या फंलदाजाने पाकिस्तानच्या बाबर आझमला मागे टाकून क्रमांक एकचा मुकूट परिधान केला आहे.

बाबर आझमला टाकले मागे

मिळालेल्या माहितीनुसार, आयसीसीने त्यांची एकदिवसीय क्रिकेटमधील ताजी रॅंकिग जारी केली आहे. त्यानुसार शुभमन गिल आता एकदिवसीय क्रिकेटमध्ये नंबर-एकचा फलंदाज बनला आहे. गिलच्या नावावर 796 गुण आहेत. ज्यामुळे त्याने बाबर आझमला मागे टाकले आहे. या यादीत बाबरचे 773 गुण आहेत आणि तो दुसऱ्या स्थानावर आहे.

इंग्लंडविरुद्धच्या एकदिवसीय सामन्यात केली उत्तम कामगिरी

25 वर्षीय शुभमन गिल सध्या उत्तम फॉर्ममध्ये आहे. त्याने अलीकडेच इंग्लंडविरुद्धच्या तीन सामन्यांच्या एकदिवसीय मालिकेत 86.33 च्या सरासरीने सर्वाधिक 259 धावा केल्या आहेत. हे देखील जाणून घ्या की टीम इंडियाच्या या युवा स्टारने आतापर्यंत देशासाठी 50 एकदिवसीय सामने खेळले आहेत, ज्यामध्ये त्याने 60.16 च्या सरासरीने 2,587 धावा केल्या आहेत. एवढेच नाही तर निवडकर्त्यांनी त्याच्यावर खूप विश्वास दाखवला आहे आणि म्हणूनच त्याला संघाचा उपकर्णधार म्हणूनही निवडण्यात आले आहे.

टॉप-10 मध्ये या भारतीय खेळाडूंचा समावेश

शुभमन गिल व्यतिरिक्त, भारतीय संघातील रोहित शर्मा (क्रमांक ३, ७६१ गुण), विराट कोहली (क्रमांक ६, ७२७ गुण) आणि श्रेयस अय्यर (क्रमांक ९, ६७९ गुण) हे देखील आयसीसीच्या ताज्या एकदिवसीय क्रमवारीत टॉप-१० मध्ये आहेत.

तसेच, या व्यतिरिक्त, दक्षिण आफ्रिकेचा स्फोटक फलंदाज हेनरिक क्लासेन (क्रमांक 4) याला एकदिवसीय क्रमवारीत एका स्थानाने फायदा झाला आहे, तर न्यूझीलंडचा फलंदाज डॅरिल मिशेल (क्रमांक 5) याला दोन स्थानांनी फायदा झाला आहे. हे लक्षात घेण्यासारखे आहे की सर्वात जास्त फायदा श्रीलंकेचा कर्णधार चारिथ असनाल्काला झाला आहे, जो आठ स्थानांनी वर चढून 694 गुणांसह आठव्या स्थानावर पोहोचला आहे.