राष्ट्रवादीतून शिवसेनेत, ईडीचा ससेमिरा; प्रताप सरनाईक यांचा राजकीय प्रवास कसा?

प्रताप बाबूराव सरनाईक हे महाराष्ट्रातील ठाणे जिल्ह्यातील ओवळा-माजिवाडा विधानसभा मतदारसंघाचे शिवसेनेचे आमदार आहेत तसेच राज्याचे परिवहन मंत्री सुद्धा आहेत. राजकारणात त्यांनी प्रारंभ राष्ट्रवादी काँग्रेस पक्षातून केला होता. मात्र, 2008 मध्ये त्यांनी शिवसेनेत प्रवेश केला आणि त्यानंतर सलग चार वेळा विधानसभेवर निवडून येण्यात यश मिळवलं.

रिक्षाचालक म्हणून कामाला सुरुवात केलेल्या प्रताप सरनाईकांनी बांधकाम व्यवसायात पाय रोवले आणि पुढे राजकीय क्षेत्रात आपलं स्वतंत्र स्थान निर्माण केलं. त्यांचा विहंग समूह बांधकाम, रिअल इस्टेट, हॉस्पिटॅलिटी आदी क्षेत्रात कार्यरत आहे. त्यांच्या कुटुंबातील सदस्यही राजकारणात सक्रीय आहेत. पत्नी परिषा सरनाईक या माजी नगरसेविका असून, पुत्र विहंग आणि पूर्वेश सरनाईक हेही सार्वजनिक जीवनात कार्यरत आहेत.

संपत्ती आणि ईडीची कारवाई

प्रताप सरनाईक यांची आर्थिक स्थिती राज्यातील बड्या राजकीय नेत्यांपैकी एक म्हणून ओळखली जाते. 2019 च्या विधानसभा निवडणुकीतील शपथपत्रानुसार त्यांची एकूण मालमत्ता सुमारे 270 कोटी इतकी होती. यामध्ये अंदाजे 56 कोटींची जंगम मालमत्ता (गाड्या, रोख रक्कम, शेअर्स इ.) आणि 215 कोटींची स्थावर मालमत्ता (जमीन, घरे, इमारती) समाविष्ट आहे.

2025 पर्यंत ही संपत्ती वाढून सुमारे 271 कोटींच्या पुढे गेल्याचे समजते. म्हणजेच मागील पाच वर्षांत जवळपास 128 कोटींची वाढ त्यांच्या संपत्तीत झाली आहे. परंतु, या काळात अंमलबजावणी संचालनालयाने (ED) त्यांच्या विरोधात काही कारवाया केल्या आहेत. एकूण 11.35 कोटींची मालमत्ता ईडीने ताब्यात घेतली असल्याची माहिती आहे.

मीरा-भाईंदर मराठी मोर्चा आणि निर्माण झालेला वाद

मंगळवारी (8 जुलै) मीरा-भाईंदर शहरात मराठी भाषिकांचा असंतोष मोठ्या आंदोलनात परिवर्तित झाला. हिंदी भाषिक व्यापाऱ्यांनी मराठी न वापरण्याच्या प्रकरणामुळे मनसे, ठाकरे गट आणि इतर मराठी संघटनांनी संयुक्तपणे मोर्चाचे आयोजन केले.

या मोर्चात प्रताप सरनाईक यांनी सहभाग नोंदवत, "मंत्री, आमदार नंतर; मराठी माणूस आधी," असा ठाम पवित्रा घेतला. मात्र, आंदोलकांनी त्यांचा तीव्र निषेध करत "गो बॅक"च्या घोषणा दिल्या आणि त्यांना तिथून माघार घ्यावी लागली. सरनाईकांच्या विरोधात या प्रतिक्रिया आल्याने सोशल मीडियावरही त्यांच्याबाबत चर्चेला उधाण आले.

राजकीय स्थान आणि वर्तमान परीस्थिती

प्रताप सरनाईक हे ठाणे जिल्ह्यात प्रभावशाली, पण वादग्रस्त नेते म्हणून ओळखले जातात. त्यांची राजकीय कारकीर्द, संपत्तीतील वाढ, तसेच विविध चौकशांतील सहभाग यामुळे ते सातत्याने चर्चेत असतात. मीरा-भाईंदरमधील आंदोलनातील त्यांचा सहभाग आणि त्याला मिळालेला विरोध, हे त्यांच्या राजकीय प्रवासातील एक नवे वळण ठरले आहे.