अजित पवारांसोबत विमान अपघातात मृत्यू झालेली पिंकी माळी कोण?, शिक्षण, गाव ते दादांच्या संपर्कात कशी?

Who is Pinky Mali : बारामती येथील विमान अपघातात महाराष्ट्राने आपला एक धडाडीचा नेता, अजित पवार यांना गमावले. मात्र, या भीषण आगीच्या गोळ्यात एका अशा तरुणीचं स्वप्नही खाक झालं, जिने कष्टाच्या जोरावर आकाशाला गवसणी घातली होती. या अपघातात मृत्युमुखी पडलेल्या सहा जणांमध्ये पिंकी माळी या तरुणीचा समावेश आहे, जिच्या मृत्यूची बातमी समजताच उत्तर प्रदेशातील तिचं गाव आणि मुंबईतील तिचं घर शोकसागरात बुडालं आहे. 

 

कोण होती पिंकी माळी?

पिंकी माळी ही अजित पवार यांच्या चार्टर्ड विमानामध्ये कॅबिन क्रू (विमान कर्मचारी) म्हणून कार्यरत होती. मूळची उत्तर प्रदेशातील जौनपूर जिल्ह्यातील केरकट तहसीलमधील भैंसा गावची ती रहिवासी होती. पिंकीचे वडील शिवकुमार माळी आणि त्यांचे कुटुंब अनेक वर्षांपासून उदरनिर्वाहासाठी मुंबईत स्थायिक झाले होते. पिंकीने आपल्या कष्टाने विमान वाहतूक क्षेत्रात प्रवेश मिळवला होता.

लग्नाला वर्षही झाले नव्हते...

नियतीचा क्रूर खेळ असा की, पिंकीच्या आयुष्यातील आनंदाला नुकतीच सुरुवात झाली होती. तिचे लग्न होऊन अद्याप एक वर्षही पूर्ण झाले नव्हते. गेल्या वर्षीच ती विवाहबंधनात अडकली होती. आपल्या कुटुंबाची परिस्थिती सुधारण्यासाठी आणि स्वतःचे स्वप्न पूर्ण करण्यासाठी ती विमान कर्मचारी म्हणून काम करत होती. मात्र, एका तांत्रिक बिघाडाने तिचे घर आणि संसार उधळून लावला.

अपघाताच्या आदल्या रात्रीचे ते शेवटचे शब्द

पिंकीच्या कुटुंबीयांनी दिलेल्या माहितीनुसार, २७ जानेवारीच्या रात्री पिंकीने शेवटचा फोन केला होता. 'इंडिया टीव्ही'च्या वृत्तानुसार, तिने घरच्यांना सांगितले होते की, "मी उद्या सकाळी अजित पवारांसोबत बारामतीला जात आहे." तिने उड्डाणापूर्वी उत्साहात ही माहिती दिली होती, मात्र ते तिचे घरच्यांशी झालेले शेवटचे बोलणे ठरेल, असे कोणालाही वाटले नव्हते. अजित पवारांसोबतचा तिचा हा चौथा विमान प्रवास होता.

जौनपूरच्या 'लेकी'साठी गाव हळहळले

पिंकीच्या मृत्यूची बातमी वाऱ्यासारखी जौनपूरमधील तिच्या मूळ गावी पोहोचली. गावकरी तिला एक 'आशादायक आणि धाडसी मुलगी' म्हणून ओळखत होते. "आमच्या गावातील एका मुलीने इतकी प्रगती केली होती, याचा आम्हाला अभिमान होता, पण आज तिच्या जाण्याने गाव पोरकं झालंय," अशा भावना तिच्या चुलत बहिणीने, शीतला प्रसाद माळी यांनी व्यक्त केल्या.

अपघातातील मृतांची यादी

बुधवारी सकाळी ९ वाजता बारामती विमानतळाजवळ झालेल्या या भीषण अपघातात एकूण ६ जणांचा मृत्यू झाला.

१. अजित पवार (उपमुख्यमंत्री, महाराष्ट्र) २. पिंकी माळी (कॅबिन क्रू) ३. दोन पायलट (कॅप्टन सुमित कपूर आणि शांभवी पाठक) ४. दोन वैयक्तिक सहाय्यक/सुरक्षा रक्षक

प्रशासनाकडून शोक व्यक्त

जौनपूर जिल्हा प्रशासन आणि स्थानिक लोकप्रतिनिधींनी पिंकी माळीच्या निधनाबद्दल तीव्र शोक व्यक्त केला आहे. एका मध्यमवर्गीय कुटुंबातील मुलीने गाठलेली उंची आणि तिचा झालेला दुर्दैवी अंत यामुळे सर्वत्र हळहळ व्यक्त होत आहे.