पवार कुटुंबात सनई-चौघड्यांचे सूर! सुप्रिया सुळेंची लेक रेवती होणार नागपूरची सून; फडणवीसांची मध्यस्थी

Supriya Sule daughter wedding : राष्ट्रवादी काँग्रेस (शरद पवार गट) पक्षाच्या खासदार सुप्रिया सुळे यांच्या घरी सध्या आनंदाचे वातावरण आहे. सुप्रिया सुळे यांची कन्या रेवती सुळे यांचा विवाह निश्चित झाला असून, त्या लवकरच विवाहबंधनात अडकणार आहेत. विशेष म्हणजे, राजकीय मतभेद बाजूला ठेवून या सोहळ्यात राज्याच्या राजकारणातील दोन दिग्गज नेत्यांनी महत्त्वाची भूमिका बजावल्याचे समोर येत आहे.

कोण आहेत सारंग अरुण लखानी?

रेवती सुळे यांचे लग्न सारंग अरुण लखानी यांच्याशी ठरले आहे. सारंग हे मूळचे नागपूरचे आहेत. एका प्रतिष्ठित कुटुंबातील असलेले सारंग लखानी यांच्याशी विवाह निश्चित झाल्याने रेवती सुळे आता 'नागपूरची सून' होणार आहेत.

माजी मुख्यमंत्री सुशील कुमार शिंदे यांच्या कन्या स्मृती शिंदे यांनी सोशल मीडियावर एक पोस्ट शेअर करत या आनंदाच्या बातमीवर शिक्कामोर्तब केले आहे. तेव्हापासून सोशल मीडियावर सुळे आणि पवार कुटुंबावर अभिनंदनाचा वर्षाव होत आहे.

गडकरी आणि फडणवीसांची खास 'मध्यस्थी'

या लग्नाची सर्वात जास्त चर्चा रंगली आहे ती म्हणजे त्यातील मध्यस्थीमुळे. सूत्रांनी दिलेल्या माहितीनुसार, केंद्रीय मंत्री नितीन गडकरी आणि महाराष्ट्राचे उपमुख्यमंत्री देवेंद्र फडणवीस यांनी या सोयरीकीत महत्त्वाची मध्यस्थी केली आहे. राजकारणात शरद पवार गट आणि भाजप यांच्यात कितीही टोकाचे मतभेद असले, तरी वैयक्तिक पातळीवर या नेत्यांचे संबंध अतिशय जिव्हाळ्याचे आहेत, हेच या घटनेतून पुन्हा एकदा अधोरेखित झाले आहे.

कोण आहेत रेवती सुळे?

सुप्रिया सुळे आणि सदानंद सुळे यांची कन्या असलेल्या रेवती सुळे यांनी आपले शिक्षण अत्यंत उच्च स्तरावर पूर्ण केले आहे. त्यांनी जगातील प्रतिष्ठित समजल्या जाणाऱ्या 'लंडन स्कूल ऑफ इकॉनॉमिक्स' (London School of Economics) मधून आपली पदवी पूर्ण केली आहे. रेवती या सहसा प्रकाशझोतात येणे टाळतात. मात्र, गेल्या बारामती लोकसभा निवडणुकीत त्यांनी आई सुप्रिया सुळे यांच्यासाठी प्रचारात सक्रिय सहभाग घेतला होता. त्यांच्या साधेपणामुळे आणि अभ्यासपूर्ण संवादामुळे त्यांनी सर्वांचे लक्ष वेधून घेतले होते.