छत्रपती संभाजीनगरमध्ये भाजपची ऐतिहासिक 'महामुसंडी'; ठाकरेंचा बालेकिल्ला ढासळला, शिंदे गटच ठरला वरचढ!

Sambhajinagar Election Result 2026 : मराठवाड्याची राजधानी असलेल्या छत्रपती संभाजीनगर महानगरपालिकेच्या निवडणुकीत भारतीय जनता पक्षाने सर्वच राजकीय गणिते मोडीत काढत अभूतपूर्व मुसंडी मारली आहे. ११५ जागांच्या या महापालिकेत आतापर्यंत ७७ जागांचे कल हाती आले असून, भाजपने ३० जागांवर आघाडी घेत विजयाचा झेंडा फडकवण्याच्या दिशेने पाऊल टाकले आहे. दुसरीकडे, शिवसेना कोणाची? या लढाईत एकनाथ शिंदे यांच्या शिवसेनेने उद्धव ठाकरे यांच्या शिवसेनेला मोठ्या फरकाने मागे टाकले आहे.

ताज्या कलानुसार पक्षनिहाय स्थिती (७७/११५ जागा)

• राजकीय पक्षआघाडी / विजय
• भारतीय जनता पक्ष (BJP) - ३०
• शिवसेना (एकनाथ शिंदे)- १५
• शिवसेना (उद्धव ठाकरे)- ०८
• राष्ट्रवादी (अजित पवार) - ०२
• राष्ट्रवादी (शरद पवार) - ०१
• काँग्रेस - ०४
• MNS (मनसे) - ००
• इतर (MIM व अपक्ष) - १७

भाजपची ऐतिहासिक मुसंडी: 'हिंदुत्व' कार्ड चालले!

या निवडणुकीत भाजपने ३० जागांवर आघाडी घेत शहरात आपला 'मोठा भाऊ' हा दर्जा सिद्ध केला आहे. हिंदुत्ववादी मतांचे विभाजन टाळण्यात भाजपला मोठे यश मिळाले. शहरातील पाणीपुरवठा योजना, रस्त्यांची कामे आणि केंद्र-राज्य सरकारची 'डबल इंजिन' ताकद यामुळे मतदारांनी कमळाला पसंती दिली आहे. अनेक पारंपरिक शिवसेनेच्या प्रभागांत प्रथमच भाजपने विजय मिळवून मोठा चमत्कार घडवला आहे.

शिंदे विरुद्ध ठाकरे: धनुष्यबाणाची सरशी, मशाल विझली?

• छत्रपती संभाजीनगरमध्ये खरी प्रतिष्ठेची लढाई दोन शिवसेनेत होती.
• शिंदे गट (१५ जागा): पालकमंत्री संजय शिरसाट आणि संदीपन भुमरे यांच्या रणनीतीमुळे ग्रामीण भागाला लागून असलेल्या शहरी वॉर्डांमध्ये शिंदे गटाने वर्चस्व राखले आहे.
• ठाकरे गट (०८ जागा): एकेकाळी ही महापालिका एकहाती चालवणाऱ्या उद्धव ठाकरे यांच्या पक्षाला केवळ ८ जागांवर समाधान मानावे लागत आहे. मशाल चिन्हापेक्षा मतदारांनी धनुष्यबाण (शिंदे गट) आणि कमळ (भाजप) यांना पसंती दिल्याचे स्पष्ट दिसत आहे.

पराभवाची प्रमुख कारणे

ठाकरे गटाच्या पराभवाचे मुख्य कारण म्हणजे संघटनात्मक बांधणीतील पडझड. अनेक जुने पदाधिकारी आणि नगरसेवक शिंदे गटात गेल्याने ग्राऊंड लेव्हलवर ठाकरे गटाची पकड ढिली झाली. तसेच, एमआयएम (MIM) मुळे झालेली मतांची विभागणी महाविकास आघाडीच्या उमेदवारांच्या मुळावर आली आहे.