चाकणकरांविरोधात 'रान' उठवणं भोवलं; रुपाली ठोंबरेंची NCPच्या प्रवक्तेपदावरून हकालपट्टी: म्हणाल्या...

Rupali Chakankar vs Rupali Patil Thombre : उपमुख्यमंत्री अजित पवार (NCP Ajit Pawar) यांनी राष्ट्रवादी काँग्रेस पक्षामधील प्रवक्त्यांच्या यादीत मोठा फेरबदल करत रुपाली पाटील ठोंबरे आणि आमदार अमोल मिटकरी यांना प्रवक्तेपदावरून वगळले आहे.

विशेषतः, पक्षाच्या महिला आयोगाच्या अध्यक्षा रुपाली चाकणकर यांच्या विरोधात रान उठवल्यामुळे रुपाली पाटील ठोंबरे यांच्यावर ही कारवाई झाल्याचे बोलले जात आहे.

रुपाली पाटील ठोंबरे यांच्यावरील कारवाईची कारणे

राष्ट्रवादी काँग्रेसचे अध्यक्ष अजित पवार यांनी ही नवी यादी जाहीर करताना काही महत्त्वाचे बदल केले. रुपाली पाटील ठोंबरे यांना पदावरून हटवण्यामागे खालील प्रमुख कारणे चर्चेत आहेत.

रुपाली चाकणकरांवर निशाणा

फलटणमधील डॉक्टर तरुणीच्या आत्महत्या प्रकरणावरून रुपाली पाटील ठोंबरे यांनी आपल्याच पक्षाच्या महिला आयोगाच्या अध्यक्षा रुपाली चाकणकर यांना थेट लक्ष्य केले होते. या पक्षविरोधी कृतीमुळे त्यांना कारणे दाखवा नोटीस (Show Cause Notice) देखील पाठवण्यात आली होती.

पक्षविरोधी विधाने

वारंवार पक्षविरोधी विधानं केल्यामुळे ठोंबरे यांना पदावरून डच्चू देण्यात आल्याची चर्चा आहे.

अमोल मिटकरींवर कारवाई

आमदार अमोल मिटकरी यांना भाजपवर सतत आगपाखड केल्यामुळे पदावरून पायउतार करण्यात आले आहे, अशी चर्चा राजकीय वर्तुळात आहे.

मारहाण प्रकरणातील नेत्याला संधी

याउलट, मारहाण प्रकरणात वादात सापडलेले सूरज चव्हाण यांना प्रवक्तेपद पुन्हा बहाल करण्यात आले आहे. मारहाण प्रकरणानंतर त्यांचे पद काढले होते, पण आता त्यांना पुन्हा संधी मिळाली आहे.

रुपाली पाटील ठोंबरे यांनी हकालपट्टीच्या आधी शनिवारी अजित पवार यांची भेट घेऊन या विषयावर स्पष्टीकरण दिले होते, मात्र अजित पवारांनी अखेरीस त्यांचे 'डिमोशन' केले.

हकालपट्टीनंतर रुपाली पाटील ठोंबरे यांची पहिली प्रतिक्रिया

राष्ट्रवादी काँग्रेसच्या या कारवाईनंतर रुपाली पाटील ठोंबरे यांनी तातडीने फेसबुक पोस्ट करत आपली पहिली प्रतिक्रिया दिली.

रुपाली पाटील ठोंबरे यांच्या पोस्टमधील प्रमुख मुद्दे

"नमस्कार जय महाराष्ट्र... मी आज पुण्याच्या बाहेर आहे, प्रवासात असल्याने माझा संपर्क होऊ शकला नाही. आज पक्षाने नव्याने प्रवक्त्याची नेमणूक केली आहे. त्यात माझ्यासह आमदार अमोल मिटकरी, वैशालीताई नागवडे यांची नावे नाहीत."

"आम्ही येऊ घातलेल्या निवडणुकांना सामोरे जाणार सज्ज आहोत. पक्षाचे काम जोमाने करणार आहोत."

"या यादीबद्दल अजित पवारांना भेटून बोलून या विषयी माहिती घेईल मग आपल्या सर्वांशी सविस्तर बोलेल."

या प्रतिक्रियेतून रुपाली पाटील ठोंबरे यांनी पक्षाचा निर्णय मान्य करत असतानाच, आगामी निवडणुकांसाठी पक्षाचे काम जोमाने करणार असल्याचे स्पष्ट केले आहे. त्याचबरोबर, त्या अजित पवार यांची भेट घेऊन हकालपट्टीमागील नेमकी कारणे आणि पुढील भूमिका यावर अधिक माहिती घेतील, असे त्यांनी सूचित केले आहे.