पुण्यात महायुतीत ठिणगी! धंगेकरांना बैठकीत 'नो एंट्री'; BJPसाठी शिंदे गटाने स्व-नेत्यालाच डावलले!

Pune Latest News : पुणे महानगरपालिका निवडणुकीच्या रणधुमाळीला सुरुवात झाली असून, पहिल्याच टप्प्यात महायुतीमधील अंतर्गत कलह चव्हाट्यावर आला आहे. भाजप आणि शिवसेना (शिंदे गट) यांच्यातील जागावाटपाच्या पहिल्या महत्त्वाच्या बैठकीत शिवसेनेचे नेते आणि आक्रमक चेहरा असलेल्या रवींद्र धंगेकर यांना जाणीवपूर्वक दूर ठेवण्यात आले. या 'नो एंट्री'मुळे पुण्याच्या राजकारणात "धंगेकर दुय्यम आणि भाजपची साथ महत्त्वाची" असा स्पष्ट संदेश शिंदे गटाने दिल्याची चर्चा सुरू झाली आहे.

दिग्गजांच्या उपस्थितीत धंगेकर गायब

पुण्यात पार पडलेल्या या बैठकीला भाजप नेते चंद्रशेखर बावनकुळे, मंत्री चंद्रकांत पाटील, खासदार तथा केंद्रीय राज्यमंत्री मुरलीधर मोहोळ आणि शिवसेनेचे मंत्री उदय सामंत, बापू शिवतरे यांसारखे दिग्गज नेते उपस्थित होते. मात्र, कसबा पेठेत भाजपचा ४० वर्षांचा गड उद्ध्वस्त करणाऱ्या धंगेकरांना निमंत्रणच नसल्याने सर्वांच्या भुवया उंचावल्या आहेत.

भाजपचा आक्षेप की शिवसेनेची खेळी?

धंगेकरांना डावलण्यामागे नेमकी कोणाची भूमिका आहे, याबाबत आरोप-प्रत्यारोप सुरू झाले आहेत. भाजप शहराध्यक्ष धीरज घाटे यांनी या वादातून हात झटकले आहेत. "आम्ही कोणाला रोखले नाही, धंगेकरांना निमंत्रण देण्याची जबाबदारी शिवसेनेची होती," असे सांगत त्यांनी चेंडू शिंदे गटाच्या कोर्टात टोलवला आहे.

सूचकपणे बोलताना शिवसेनेच्या स्थानिक नेत्यांनी म्हटले की, "युती टिकवण्यासाठी काही गोष्टी टाळाव्या लागतात." याचा अर्थ धंगेकरांची आक्रमक भाजपविरोधी भूमिका युतीमध्ये अडथळा ठरू नये, म्हणून त्यांना बाजूला ठेवण्यात आले.

धंगेकरांच्या अडचणी वाढवणारी कारणे!

रवींद्र धंगेकर शिंदे गटात असूनही त्यांच्यासाठी अडचणी का निर्माण होत आहेत, याची काही प्रमुख कारणे समोर येत आहेत. शिवसेनेत प्रवेश केल्यानंतरही धंगेकर भाजपच्या स्थानिक नेत्यांवर टीका करण्याची एकही संधी सोडत नाहीत. लोकसभा निवडणुकीत मुरलीधर मोहोळ यांच्याविरोधात त्यांनी दिलेली लढत भाजपच्या जिव्हारी लागली आहे.

धंगेकर यांच्या पत्नी आणि मुलगा दोघेही महापालिका निवडणुकीची तयारी करत आहेत. भाजपचे गणेश बिडकर यांच्याविरोधात ते उमेदवार उभे करण्याच्या तयारीत असल्याचे बोलले जाते.

धंगेकर १६५ जागांवर लढण्यावर ठाम आहेत, तर शिवसेनेचे शहरप्रमुख नाना भानगिरे भाजपसोबत युती करून ३५-४० जागा घेण्याच्या तयारीत आहेत. या अंतर्गत मतभेदामुळे धंगेकर एकाकी पडले आहेत.

'धंगेकर' विरुद्ध 'महायुती' असा संघर्ष?

या बैठकीमुळे एक गोष्ट स्पष्ट झाली आहे की, पुण्याच्या राजकारणात भाजपला नाराज करण्याची शिंदे गटाची तयारी नाही. भाजपशी जुळवून घेण्यासाठी आपल्याच पक्षातील ज्येष्ठ नेत्याला बाजूला ठेवण्याची वेळ शिवसेनेवर आली आहे. यामुळे येणाऱ्या काळात पुण्यात 'भाजप विरुद्ध धंगेकर' हा संघर्ष पुन्हा पाहायला मिळू शकतो, परंतु यावेळी धंगेकर स्वतःच्याच पक्षात किती सुरक्षित आहेत, हा प्रश्न उपस्थित झाला आहे.