काय जमाना आला, गोपीनाथ मुंडेंचा वारस भ्रष्टाचारी अन् अब्रु वेशीवर टांगणारी ठरवते?, या नेत्याचा आरोप!

Prakash Mahajan Slams Chhagan Bhujbal Karuna Munde : दिवंगत नेते गोपीनाथ मुंडे यांच्या राजकीय वारसदारावरून महाराष्ट्राच्या राजकारणात सध्या मोठा वाद पेटला आहे. राज्याचे अन्न व नागरी पुरवठा मंत्री छगन भुजबळ यांनी नुकत्याच झालेल्या ओबीसी एल्गार महासभेत आमदार धनंजय मुंडे यांना गोपीनाथ मुंडेंचे राजकीय वारसदार म्हटले होते. या विधानामुळे मुंडे-भुजबळ घराण्यातील वाद आता चव्हाट्यावर आला आहे.

छगन भुजबळ यांच्या विधानावर गोपीनाथ मुंडे यांचे मेहुणे आणि पंकजा मुंडे यांचे मामा प्रकाश महाजन यांनी तीव्र प्रतिक्रिया देत भुजबळ आणि धनंजय मुंडेंवर टीका करणाऱ्या करुणा मुंडे शर्मा यांनाही लक्ष्य केले आहे.

'भ्रष्टाचारी आणि नवऱ्याची अब्रू वेशीवर टांगणारी ठरवते'

छगन भुजबळ यांच्या विधानानंतर, धनंजय मुंडे यांच्यावर नेहमी टीका करणाऱ्या करुणा मुंडे शर्मा यांनी आश्चर्याचा धक्का देत धनंजय मुंडे यांची स्तुती केली. करुणा मुंडे म्हणाल्या, "छगन भुजबळ १०० टक्के बोललेत. राजकारणात पोटचा नव्हे, तर विचारांचा वारसा असतो आणि धनंजय मुंडे यांनी ते सिद्ध केले आहे."

करुणा मुंडे यांच्या या विधानावर प्रकाश महाजन यांनी फेसबुकवर संतप्त पोस्ट केली. त्यांनी धनंजय मुंडे आणि करुणा मुंडे शर्मा यांचे नाव न घेता त्यांच्यावर कठोर शब्दांत निशाणा साधला.

प्रकाश महाजनांनी आपल्या पोस्टमध्ये काय म्हटले?

"काय जमाना आला. स्वर्गीय मुंडे साहेबांचा वारस कोण ठरवत आहे, तर एक भ्रष्टाचारी, कारागृहात बरेच महिने काढून आलेला आणि दुसरी जी रोज उठून आपल्याच कुंकवाची अब्रू जगाच्या वेशीवर टांगते."

या पोस्टमधून त्यांनी स्पष्ट केले की, गोपीनाथ मुंडे यांचा सामाजिक किंवा राजकीय वारसा पुढे नेण्याची क्षमता फक्त आणि फक्त पंकजा मुंडे यांच्यातच आहे.

'समीर भुजबळांना वारसदार म्हटलं तर चालेल का?'

प्रकाश महाजन यांनी केवळ मुंडे कुटुंबातील वारसा वादावरच नाही, तर छगन भुजबळ यांच्यावरही थेट हल्ला केला. माध्यमांशी संवाद साधताना त्यांनी भुजबळांच्या विधानाला 'क्लेशदायक' (दुःखदायक) म्हटले.

प्रकाश महाजन यांनी भुजबळांना प्रश्न केला, "आम्ही समीर भुजबळ यांना वारसदार म्हटले तर चालेल का?"

ते पुढे म्हणाले की, छगन भुजबळांनी समाजाच्या मनात दुहीचे बीज पेरण्याचे काम केले आहे. "पंकजाला गोपीनाथरावांचा वारसा त्यांच्या पोटी जन्माला आली म्हणून मिळालेला नाही, तर तिला खूप संघर्ष करावा लागला आहे. आजही ती संघर्ष करतीच आहे," असे सांगत महाजन यांनी पंकजा मुंडे यांची बाजू ठामपणे मांडली.

'माझ्या भाचीचा हक्क मारावा का?'

गोपीनाथ मुंडे यांचे मेहुणे या नात्याने बोलताना महाजन यांनी आपली नाराजी व्यक्त केली. ते म्हणाले, पंकजाला पक्षाची बंधने पाळावी लागतात, तरीही ती ओबीसींच्या हक्कांसाठी लढत आहे. पंकजाला मिळालेला वारसा हा 'काटेरी मुकूट' होता.

"भुजबळांनी माझ्या भाचीचा हक्क मारावा, माझ्या मेहुण्याचा वारसदार त्यांनी सांगावा... आणि मी त्यावर काही प्रतिक्रिया दिल्यावर लोकांना ते वाईट वाटले," असे म्हणत त्यांनी आपल्या टीकेचे समर्थन केले. यापूर्वी भाजपचे नेते चंद्रकांत पाटील यांनी भुजबळांविषयी केलेल्या विधानांचाही त्यांनी संदर्भ दिला.

एकंदरीत, गोपीनाथ मुंडे यांच्या वारसदारावरून छगन भुजबळ यांनी केलेल्या एका विधानामुळे महाराष्ट्राच्या राजकारणात नवा वादळ निर्माण झाला आहे, ज्यामध्ये आता प्रकाश महाजन यांनी थेट भुजबळ आणि करुणा मुंडे यांना लक्ष्य करत पंकजा मुंडे यांच्या वारसदाराच्या भूमिकेचे जोरदार समर्थन केले आहे.