मुंबईकरांसाठी आनंदाची बातमी: 'या' मार्गावर लवकरच सुरु होणार मेट्रो ट्रेन; कोठून कोठे धावणार? वाचा

बहुप्रतिक्षित मुंबई मेट्रो यलो लाईनच्या पहिल्या टप्प्याची चाचणी १६ एप्रिलपासून सुरू होणार आहे. या चाचणीनंतर डायमंड गार्डन (चेंबूर) ते मंडाले (मानखुर्द) या ५.४ किलोमीटर लांबीच्या मार्गावर लवकरच मेट्रो धावताना दिसेल. या संपूर्ण लाईनच्या ऑपरेशनची अंतिम मुदत डिसेंबर २०२५ ही निश्चित करण्यात आली आहे. महानगर आयुक्त डॉ. संजय मुखर्जी यांच्या पुढाकारामुळे आता ट्रायल रन लवकर सुरू होत आहे. ही मुंबईच्या पूर्व उपनगरात राहणाऱ्या लोकांसाठी एक आनंदाची बातमी ठरणार आहे.

कधी आहे चाचणी?

१६ एप्रिल हा दिवस भारतीय रेल्वे स्थापना दिन म्हणून साजरा केला जातो. याच दिवशी मुंबईची एक नवीन मेट्रो लाईन सुरू होणार आहे. गेल्या दशकात पूर्व उपनगरांमध्ये सुरू होणारी ही पहिली मेट्रो लाईन असेल. यापूर्वी घाटकोपरला जोडणारी एकमेव मेट्रो लाईन १ (ब्लू लाईन) या प्रदेशात कार्यरत होती. यलो लाईन २बी ही पूर्व कॉरिडॉरला जोडणारी एकमेव नवीन मेट्रो लाईन असेल.

किती असणार स्थानके?

या मार्गावरील पाच स्थानके असणार आहेत. डायमंड गार्डन, शिवाजी चौक, बीएसएनएल मेट्रो, मानखुर्द आणि मंडाले. ही सर्व स्थानके जवळजवळ तयार आहेत. विशेष म्हणजे हा मार्ग चेंबूरमध्ये मुंबई मोनोरेललाही छेदतो. ज्यामुळे मल्टीमॉडल कनेक्टिव्हिटी मजबूत होईल.

कशी होईल चाचणी

चाचणीच्या पहिल्या टप्प्यात मूलभूत एकात्मता चाचणी केली जाईल. रोलिंग स्टॉक, सिग्नलिंग आणि ट्रॅक ट्रॅक्शन तपासले जाईल. यानंतर लोडेड ट्रायल घेतली जाईल. ज्यामध्ये प्रवाशांच्या वजनाइतके भार टाकून मेट्रोची चाचणी केली जाईल. सर्व चाचण्या यशस्वी झाल्यानंतर अंतिम तपासणी मेट्रो रेल्वे सुरक्षा आयुक्तांकडून केली जाईल. सर्वसामान्यांच्या मंजुरीनंतरच ही सेवा सुरू केली जाईल.

किती लांबीचा आहे मार्ग?

यलो लाईन २बी चा एकूण मार्ग १८.२ किमी लांबीचा आहे. तो डायमंड गार्डन (चेंबूर) ते डीएन नगर (अंधेरी) पर्यंत पसरलेला आहे. या मार्गावर एकूण १४ स्थानके असतील आणि डिसेंबर २०२६ पर्यंत ती पूर्णपणे कार्यान्वित करण्याचे नियोजन आहे. या मार्गावर धावणाऱ्या ६ डब्यांच्या आधुनिक मेट्रो ट्रेनची निर्मिती भारत अर्थ मूव्हर्स लिमिटेड (BEML) ने भारतात केली आहे.