तेलाचा टँकर उड्डाणपुलावरुन कोसळून तेलाचा उडाला भडका; चालकाचा कोळसा; मुंबईत भयंकर अपघात

अहमदाबाद राष्ट्रीय महामार्गावर तेलाने भरलेला टँकर मुंबईहून गुजरातकडे जात होता. राष्ट्रीय महामार्गावरील मस्तान नाका उड्डाणपुलावर चालकाचे टँकरवरील नियंत्रण सुटले आणि अनियंत्रित टँकर उड्डाणपुलाच्या बाजूला धडकला आणि पंधरा ते वीस फूट उंचीवरून थेट पुलावरून खाली पडला. त्यावेळी उड्डाणपुलाखाली कोणतेही वाहन किंवा व्यक्ती नव्हती, त्यामुळे मोठी दुर्घटना टळली. रविवारी संध्याकाळी ५ वाजण्याच्या सुमारास हा भीषण अपघात घडला.

रस्त्यावर तेल सांडले

उड्डाणपुलावरून तेलाचा टँकर पडल्यानंतर, ३०,००० लिटरच्या टँकरमधून तेल गळू लागले. परिणामी, संपूर्ण परिसरात रस्त्यावर तेल सांडले. तेल गळतीमुळे परिसरातील रहिवाशांमध्ये भीतीचे वातावरण निर्माण झाले. घटनेची माहिती मिळताच पोलीस घटनास्थळी पोहोचले. या अपघातात टँकर चालक गंभीर जखमी झाला. अपघातग्रस्त टँकरमधून त्याला बाहेर काढण्यात आले आणि उपचारासाठी खाजगी रुग्णालयात दाखल करण्यात आले. मात्र, उपचारादरम्यान टँकर चालकाचा मृत्यू झाल्याची माहिती मिळाली आहे.

दोन तास रस्ता बंद

टँकरमधून तेल गळती सुरू होताच आणि ते परिसरात पसरताच पोलिसांनी वाहतूक बंद केली . खबरदारी म्हणून पोलिसांनी एक महत्त्वाचे पाऊल उचलले. पोलिसांनी परिसरातील गर्दी काढून संपूर्ण परिसर रिकामा केला. तसेच उड्डाणपुलाखालून गुजरात रोडवरही वाहतूक बंद करण्यात आली होती. पोलिसांसह लोकांनी सुटकेचा नि:श्वास सोडला. कारण टँकरमध्ये भरलेले कच्चे तेल ज्वलनशील नव्हते. दोन क्रेनच्या मदतीने अपघातग्रस्त टँकर रस्त्यावरून बाजूला करण्यात आला आणि वाहतूक पूर्ववत करण्यात आली.

पोलिस तत्काळ पोहोचले

अपघातानंतर रस्त्यावर गोंधळ उडाला आणि लोक जीव वाचवण्यासाठी इकडे तिकडे धावू लागले. ही संपूर्ण घटना जवळच असलेल्या कॅमेऱ्यात कैद झाली. घटनेची माहिती मिळताच पोलिस आणि अग्निशमन दलाचे पथक तात्काळ घटनास्थळी पोहोचले.