राज्यात पावसाचा जोर वाढणार! IMD कडून 2 दिवस 'या' जिल्ह्यांना ‘यलो अलर्ट' आज पाऊस कुठे पडणार? वाचा

Maharashtra weather forecast in marathi : महाराष्ट्रातील हवामानाची स्थिती बदलत असून, पुढील काही दिवसांत राज्यात पावसाचा जोर वाढण्याची शक्यता आहे. बंगालच्या उपसागरावरील कमी दाबाचे क्षेत्र दक्षिण महाराष्ट्रापर्यंत सरकल्यामुळे, आणि हवेच्या वरच्या स्तरावर असलेल्या चक्रीय स्थितीमुळे, अनेक जिल्ह्यांमध्ये पावसासाठी अनुकूल वातावरण निर्माण झाले आहे. पुणे वेधशाळेने दिलेल्या अंदाजानुसार, पुढील दोन ते तीन दिवस विविध भागांना 'यलो अलर्ट' देण्यात आला आहे.

मध्य महाराष्ट्र आणि मराठवाड्याची स्थिती

मध्य महाराष्ट्र: पुढील दोन ते तीन दिवसांत या भागातील बऱ्याच ठिकाणी हलक्या ते मध्यम स्वरूपाचा पाऊस पडण्याची शक्यता आहे.

नाशिक, अहमदनगर (अहिल्यानगर) आणि पुणे: या जिल्ह्यांमध्ये पुढील दोन ते तीन दिवस पावसाची शक्यता असल्याने 'यलो अलर्ट' जारी करण्यात आला आहे.

मराठवाडा: मराठवाड्यातील सर्व जिल्ह्यांना पुढील दोन ते तीन दिवस हलक्या ते मध्यम स्वरूपाचा पाऊस अपेक्षित आहे. पुणे हवामान विभागाने छत्रपती संभाजी नगर, जालना, परभणी, नांदेड, हिंगोली, धाराशिव, बीड आणि लातूर या सर्व जिल्ह्यांना 'यलो अलर्ट' दिला आहे. सध्या, धाराशिव, बीड, लातूर आणि परभणी या भागांमध्ये जोरदार पाऊस सुरू असून, अतिवृष्टीमुळे पुराचा धोका कायम आहे.

कोकण आणि विदर्भातील हवामान

कोकण: पालघर, ठाणे, मुंबई आणि रायगड या जिल्ह्यांना पुढील दोन ते तीन दिवस तुरळक ठिकाणी हलका ते मध्यम पाऊस अपेक्षित असून, त्यासाठी 'यलो अलर्ट' देण्यात आला आहे. तसेच, रत्नागिरी आणि सिंधुदुर्ग या भागातही पावसाची शक्यता आहे.

उत्तर महाराष्ट्र: धुळे, नंदुरबार आणि जळगाव येथेही पाऊस अपेक्षित आहे.

विदर्भ: विदर्भातील बहुतांश जिल्ह्यांमध्ये पुढील दोन ते तीन दिवस जोरदार पाऊस पडण्याची शक्यता असून, या भागालाही पुणे हवामान विभागाने 'यलो अलर्ट' दिला आहे.

पुणे आणि आजुबाजूचा परिसर

पुणे शहरामध्ये आणि आजूबाजूच्या परिसरात पुढील दोन ते तीन दिवस आकाश सामान्यतः ढगाळ राहून हलक्या ते मध्यम स्वरूपाचा पाऊस पडण्याची शक्यता आहे. नागरिकांना आवश्यक असल्यासच घराबाहेर पडावे, असे आवाहन करण्यात येत आहे.

हेही वाचा : बीडसह 3 जिल्ह्यात पाऊस पुराचे थैमान! शाळा-महाविद्यालयांना सुट्टी जाहीर, गरज असेल तरच घराबाहेर पडा..