ठाकरेंनी आवाज उठवला अन् बॅग चेकिंगचा मुद्दा पेटला; आठवडाभरात किती नेत्यांच्या सामानांची झडती?

महाराष्ट्र विधानसभा निवडणुकीच्या अनुषंगाने राज्यातील प्रचार शिगेला पोहोचला आहे. या निवडणुकीत बटेंगे तो कटेंगे, एक है तो सेफ है अशा घोषणांनी निवडणुकीत रंगत आणली. तर विरोधकांकडून जोरदार हल्लाबोल चढवला जात आहे. तर या निवडणुकीत एक मुद्दा पेटला तो विरोधकांच्या बॅग चेकिंगचा. त्यानंतर सत्ताधारी नेत्यांच्याही बॅगा तपासल्या जाऊ लागल्या.

दुसरीकडे, मतदानाच्या तीन दिवस आधी राष्ट्रवादी काँग्रेस शरदचंद्र पवार पक्षाचे प्रमुख शरद पवार यांचे हेलिकॉप्टर आणि बॅग तपासण्यात आली आहे. शरद पवार बारामतीहून सोलापूरला प्रचारासाठी जात होते. दरम्यान, निवडणूक आयोगाच्या अधिकाऱ्यांनी हेलिपॅडवर जाऊन त्यांच्या बॅगांची तपासणी केली. तर काल राहुल गांधी यांच्या बॅगांची तपासणी करण्यात आली. या घटनेचा व्हिडिओ देखील समोर आला आहे.

दरम्यान, उद्धव ठाकरे यांच्या बॅगांची तपासणी केल्यानंतर त्यांनी आवाज उठवला अन् राज्यातील विधानसभा निवडणुकीच्या प्रचारामध्ये सर्व नेत्यांच्या बॅग चेकिंगचा मुद्दा पेटला. गेल्या आठवडाभरात राज्यात कोणत्या नेत्यांची बॅग व हेलिकॉप्टरमधील सामानांची तपासणी झाली. यावर एक नजर टाकूया...!

निवडणुकीदरम्यान 11 बड्या नेत्यांची तपासणी

महाराष्ट्र विधानसभा निवडणुकीच्या पार्श्वभूमीवर निवडणूक आयोगाने देशातील 11 बड्या नेत्यांची चौकशी केली आहे. यात केंद्रीय गृहमंत्री अमित शहा, भाजपचे देवेंद्र फडणवीस, मुख्यमंत्री एकनाथ शिंदे, गोव्याचे मुख्यमंत्री प्रमोद सावंत यांच्यासह विविध नेत्यांची तपासणी करण्यात आली.

• 14 नोव्हेंबर रोजी काँग्रेस अध्यक्ष मल्लिकार्जुन खरगे, गोव्याचे मुख्यमंत्री प्रमोद सावंत, महाराष्ट्र काँग्रेस अध्यक्ष नाना पटोले आणि उद्धव ठाकरे यांच्या हेलिकॉप्टरची तपासणी करण्यात आली.
• निवडणूक प्रचारासाठी खरगे नाशिकला पोहोचले होते. त्यांच्या तपासाची हेलिपॅडवर व्हिडिओग्राफीही करण्यात आली.
• गोंदियात महाराष्ट्र काँग्रेसचे अध्यक्ष नाना पटोले यांचे हेलिकॉप्टर आणि बॅग तपासण्यात आली. ते गोरेगाव विधानसभा मतदारसंघातून राष्ट्रवादीच्या (एसपी) उमेदवाराच्या प्रचारासाठी जात होते.
• अहमदनगरमध्ये तिसऱ्यांदा उद्धव ठाकरेंची चौकशी झाली. अशा प्रकारे कराड विमानतळावर (सातारा) गोव्याचे मुख्यमंत्री प्रमोद सावंत यांच्या सामानाचीही तपासणी करण्यात आली.

शिंदेंनी ठाकरेंना डिवचले

13 नोव्हेंबर रोजी मुख्यमंत्री एकनाथ शिंदे यांचीही तपासणी करण्यात आली. ते पालघरमध्ये प्रचारासाठी आले होते. यादरम्यान त्यांनी अधिकाऱ्याला सांगितले होते- कपडे आहेत, लघवीचे भांडे वगैरे नाही. ही टिप्पणी म्हणजे उद्धव यांच्या वक्तव्यावर टोला होता. याशिवाय केंद्रीय मंत्री रामदास आठवले यांच्या हेलिकॉप्टरचीही तपासणी करण्यात आली.

वास्तविक, 11 आणि 12 नोव्हेंबरला उद्धव ठाकरेंच्या सामानाची दोनदा तपासणी करण्यात आली. उद्धव यांनी त्याचा व्हिडिओ शेअर केला होता, ज्यामध्ये ते म्हणत होते- माझी बॅग तपासा. लघवीचे भांडे पण तपासा, पण आता मला तुमचा मोदींची बॅग तपासतानाचा व्हिडिओ हवा आहे. तेथे शेपूट वाकवू नका.

भाजप नेत्यांची बॅग चेकिंग

मंगळवारी लातूरमध्ये नितीन गडकरी यांची बॅग निवडणूक आयोगाने तपासली. तसेच भाजपने बुधवारी X वर एक व्हिडिओ पोस्ट केला होता ज्यामध्ये सुरक्षा कर्मचारी उपमुख्यमंत्री देवेंद्र फडणवीस यांचे सामान तपासताना दिसत आहेत. हा व्हिडिओ 5 नोव्हेंबरला कोल्हापूर विमानतळाचा असल्याचे पक्षाने सांगितले होते. यापूर्वी 7 नोव्हेंबरला यवतमाळ जिल्ह्यातही त्यांच्या सामानाची तपासणी करण्यात आल्याचा दावा पक्षाने केला होता.

फडणवीसांनी ठाकरेंवर साधला निशाणा

उद्धव ठाकरेंच्या चेकिंगचा व्हिडिओ समोर आल्यानंतर 12 नोव्हेंबरला फडणवीस म्हणाले होते की, माझी बॅग कोल्हापुरातही तपासण्यात आली, त्यानंतर 7 नोव्हेंबरलाही चेकिंग झाली. तपासाला विरोध करून उद्धव लोकांचे लक्ष दुसरीकडे वळवत आहेत. त्यांना रडून, ओरडून मते मिळवायची आहेत. बॅग तपासण्यात गैर काय? निवडणूक प्रचारादरम्यान आमच्या बॅगाही तपासल्या जातात.

अजितदादा म्हणाले-लोकशाहीचा आदर करावा

राष्ट्रवादीचे नेते अजित पवार 5 नोव्हेंबरला म्हणाले होते, 'आज निवडणूक प्रचारादरम्यान माझी बॅग तपासण्यात आली. निवडणूक आयोगाचे अधिकारी माझ्या हेलिकॉप्टरमध्ये नियमित तपासणीसाठी आले होते. मी पूर्ण सहकार्य केले. आपली लोकशाही टिकून राहण्यासाठी आपण कायद्याचा आदर केला पाहिजे.