Maharashtra Municipal Election मुख्यमंत्री फडणवीसांचा 'भाऊ' पराभूत! धक्कादायक आणि टाॅप 10 निकाल वाचा

Maharashtra Municipal Election 2026 : "महाराष्ट्रातील २९ महानगरपालिकांच्या मतमोजणीचा आजचा दिवस अनेक राजकीय नेत्यांसाठी 'कुठेतरी खुशी तर कुठेतरी गम' असा ठरला आहे. सकाळी १० वाजेपासून सुरू झालेल्या या निकालांच्या फेऱ्यांनी राज्याच्या राजकारणात मोठी उलथापालथ घडवून आणली आहे. एका बाजूला भाजपने आपली विजयी घोडदौड कायम ठेवली असताना, दुसऱ्या बाजूला अनपेक्षित पराभवांनी दिग्गजांना धक्का दिला आहे.

मुख्यमंत्री देवेंद्र फडणवीस यांच्या नातेवाईकांपासून ते नवाब मलिक यांच्या भावापर्यंत अनेकांना जनतेने नाकारले आहे, तर दुसरीकडे 'जायंट किलर्स' म्हणून उदयाला आलेल्या नव्या चेहऱ्यांनी प्रस्थापितांची झोप उडवली आहे. या निकालांमधील सर्वात महत्त्वाचे आणि ऐतिहासिक १० धक्के नेमके कोणते? पाहा हा सविस्तर रिपोर्ट..."

महाराष्ट्रातील २९ महानगरपालिकांच्या मतमोजणीने आज (१६ जानेवारी २०२६) संपूर्ण राज्याचे लक्ष वेधून घेतले आहे. अनेक ठिकाणी प्रस्थापित नेत्यांना धक्के बसले आहेत, तर काही नवख्या उमेदवारांनी 'जायंट किलर' ठरत इतिहास रचला आहे. या घडीला समोर आलेले 'टॉप १० धक्कादायक आणि महत्त्वाचे' निकाल खालीलप्रमाणे आहेत.

१. अमरावतीत महायुतीला मोठा धक्का

अमरावतीमध्ये मुख्यमंत्री देवेंद्र फडणवीस यांचे मामेभाऊ विवेक कलोती यांचा पराभव झाला आहे. हा निकाल भाजपसाठी विदर्भातील सर्वात मोठा धक्का मानला जात आहे.

२. पुण्यात काँग्रेसचे 'प्रशांत जगताप' विजयी

राष्ट्रवादीची साथ सोडून काँग्रेसमध्ये गेलेले प्रशांत जगताप यांनी पुण्यातून विजय मिळवला आहे. पुण्यात भाजपचे वर्चस्व असतानाही जगताप यांनी खेचून आणलेला हा विजय चर्चेचा विषय ठरला आहे.

३. मुंबईत पहिल्या विजयाची नोंद 'काँग्रेस'च्या नावे

मुंबई महानगरपालिकेत (BMC) मतमोजणीच्या पहिल्या टप्प्यात विजयाचे खाते काँग्रेसने उघडले आहे. दक्षिण मुंबईतील एका महत्त्वाच्या वॉर्डात काँग्रेसने विजय मिळवत भाजप आणि शिवसेनेला मागे टाकले आहे.

४. 'कप्तान मलिक' यांना पराभवाचा धक्का

अणुशक्ती नगर आणि मानखुर्द पट्ट्यात वर्चस्व असलेल्या कप्तान मलिक (नवाब मलिक यांचे बंधू) यांना पराभवाचा सामना करावा लागला आहे. हा निकाल राष्ट्रवादी (अजित पवार गट) साठी मोठा सेटबॅक आहे.

५. पुण्याच्या बिबेवाडीत भाजपचा 'क्लीन स्वीप'

पुण्यातील प्रभाग क्रमांक २० (बिबेवाडी) मध्ये भाजपने आपले निर्विवाद वर्चस्व सिद्ध केले आहे. या प्रभागातील ४ पैकी ३ जागांवर भाजपने विजय मिळवला असून, राष्ट्रवादीचा बालेकिल्ला पोखरण्यात यश मिळवले आहे.

६. कोल्हापुरात भाजपचे अनपेक्षित यश

कोल्हापूर महानगरपालिकेत नेहमी काँग्रेस-राष्ट्रवादीचे वर्चस्व राहिले आहे, मात्र आजच्या निकालात भाजपचे ४ उमेदवार एकाच वेळी विजयी झाले आहेत. कोल्हापूरच्या राजकारणातील हा मोठा बदल मानला जात आहे.

७. जळगावमध्ये ठाकरेंच्या शिवसेनेला 'शून्य'

शिवसेनेचा (UBT) बालेकिल्ला समजल्या जाणाऱ्या जळगावमध्ये उद्धव ठाकरेंच्या पक्षाला अद्याप खातेही खोलता आलेले नाही. येथे गिरीश महाजन यांच्या नेतृत्वाखाली भाजपने बाजी मारली आहे.

८. कल्याण-डोंबिवलीत 'मनसे' ठाकरेंच्या पुढे

कल्याण-डोंबिवलीत राज ठाकरेंच्या मनसेने ४ जागांवर आघाडी घेत उद्धव ठाकरेंच्या शिवसेनेला (२ जागा) मागे टाकले आहे. मराठी मतांच्या विभाजनात मनसेला फायदा होताना दिसत आहे.

९. मुंबईत 'शिवशक्ती' युतीची भाजपला कडवी झुंज

मुंबईत २२७ पैकी ५२ जागांवर ठाकरे गट आघाडीवर असून, ७ जागांवर मनसे आघाडीवर आहे. राज आणि उद्धव ठाकरे यांचे कार्यकर्ते अनेक वॉर्डांत एकमेकांना पूरक काम करताना दिसल्याने भाजपच्या ६३ जागांच्या आघाडीला त्यांनी रोखून धरले आहे.

१०. नवी मुंबईत गणेश नाईकांचे 'एकतर्फी' वर्चस्व

शिंदे गट आणि भाजपमधील वादाचा कोणताही परिणाम नवी मुंबईत झाला नाही. गणेश नाईक यांनी ६८ जागांवर आघाडी घेत नवी मुंबईवर पुन्हा एकदा स्वतःची पकड सिद्ध केली आहे.