लातूरमध्ये शिंदेंची 'मास्टरस्ट्रोक' खेळी; 38 अपक्ष उमेदवारांचा सेनेत प्रवेश,काँग्रेसचे धाबे दणाणले!

38 independent candidates join ShivSena Latur News : राज्याच्या राजकारणात सध्या स्थानिक स्वराज्य संस्थांच्या निवडणुकांचे वारे वाहत आहेत. २९ महानगरपालिकांसाठी येत्या १५ जानेवारीला मतदान पार पडणार असून, त्यापूर्वी लातूरच्या राजकारणात एक मोठी खळबळजनक घडामोड घडली आहे. मुख्यमंत्री एकनाथ शिंदे यांनी लातूरमध्ये आपली ताकद वाढवण्यासाठी मोठी 'राजकीय खेळी' खेळली आहे. लातूर महानगरपालिका निवडणुकीतील तब्बल ३८ अपक्ष उमेदवार आज शिंदेंच्या शिवसेनेत जाहीर प्रवेश करणार आहेत.

भाजप आणि काँग्रेसला एकाच वेळी 'चेक-मेट'

लातूर हा पारंपरिकपणे काँग्रेसचा बालेकिल्ला राहिला आहे, तर २०१७ मध्ये भाजपने येथे मुसंडी मारत सत्ता हस्तगत केली होती. मात्र, आता मुख्यमंत्री एकनाथ शिंदे यांनी या दोन्ही मोठ्या पक्षांना शह देण्यासाठी थेट ३८ अपक्ष उमेदवारांना आपल्या गळाला लावले आहे. आज संध्याकाळी मुंबईत मुख्यमंत्र्यांच्या उपस्थितीत हा पक्षप्रवेश सोहळा पार पडणार आहे. या निर्णयामुळे लातूरच्या निवडणूक रिंगणात आता शिवसेनेची (शिंदे गट) ताकद अचानक कित्येक पटीने वाढली आहे.

लातूर महानगरपालिका निवडणूक २०२६: सध्याचे पक्षीय बलाबल

एकूण १८ प्रभागांमधील ७० जागांसाठी होत असलेल्या या लढतीत सर्वच पक्षांनी आपली प्रतिष्ठा पणाला लावली आहे. सध्याचे चित्र खालीलप्रमाणे आहे:

• पक्ष लढवत असलेल्या जागा युती /आघाडीची स्थिती
• भारतीय जनता पक्ष : ७० सर्व जागांवर स्वतंत्र लढत
• काँग्रेस ६५ वंचित बहुजन आघाडीसोबत युती (वंचित - ०५ जागा)
• राष्ट्रवादी (अजित पवार) ६० १० जागांवर पुरस्कृत उमेदवार (एकूण ७०)
• शिवसेना (शिंदे गट) ११+३८ (अपक्ष) अधिकृत ११, आता ३८ अपक्षांची साथ
• राष्ट्रवादी (शरद पवार) १७ स्वतंत्र लढत
• शिवसेना (ठाकरे गट) ०९ स्वतंत्र लढत
• MIM ०९ स्वतंत्र लढत

२०१७ चा इतिहास: जेव्हा भाजपने काँग्रेसचा बालेकिल्ला ढासळला होता

२०१७ च्या निवडणुकीत लातूरमध्ये मोठे सत्तांतर पाहायला मिळाले होते. तत्कालीन भाजप नेते संभाजी पाटील निलंगेकर यांच्या नेतृत्वाखाली भाजपने ७० पैकी ३६ जागा जिंकून एकहाती सत्ता मिळवली होती. दशकानुदशके सत्ता भोगणाऱ्या काँग्रेसला ३१ जागांवर समाधान मानावे लागले होते. विशेष म्हणजे, त्या निवडणुकीत शिवसेना आणि आरपीआयला आपले खातेही उघडता आले नव्हते.

शिंदेंच्या खेळीचे राजकीय महत्त्व

१. अस्तित्वाची लढाई : २०१७ मध्ये शून्य जागा असलेल्या शिवसेनेला (शिंदे गट) आता या ३८ उमेदवारांच्या प्रवेशामुळे थेट मुख्य प्रवाहातील स्पर्धक म्हणून पाहिले जात आहे.

२. मतांचे विभाजन : अपक्ष उमेदवारांकडे स्वतःची अशी वैयक्तिक मतपेढी असते. हे उमेदवार आता 'धनुष्यबाण' चिन्हावर किंवा शिंदे गटाच्या पाठिंब्यावर लढल्यास त्याचा थेट फटका भाजप आणि काँग्रेसच्या अधिकृत उमेदवारांना बसू शकतो.

३. किंगमेकरची भूमिका: जर कोणत्याही पक्षाला स्पष्ट बहुमत मिळाले नाही, तर हे ३८ उमेदवार आणि शिवसेनेची निवडून येणारी संख्या लातूर पालिकेत 'किंगमेकर' ठरू शकते.