राजकीय भूकंप! कल्याण-डोंबिवलीत ठाकरेंना रोखण्यासाठी मनसेचा शिंदेंना पाठिंबा; उद्धव ठाकरे भाजपला खो!

KDMC mayar election 2026 MNS Supports Shinde's Shiv Sena in Kalyan-Dombivli : राज्याच्या राजकारणात सध्या महापालिका सत्तास्थापनेचे वारे वाहत असून, कल्याण-डोंबिवली महानगरपालिकेत (KDMC) एक अत्यंत महत्त्वाची राजकीय उलथापालथ झाली आहे. महापालिकेत सत्ता स्थापन करण्यासाठी आवश्यक असलेला ६२ चा बहुमताचा आकडा गाठण्यासाठी आता राज ठाकरे यांच्या महाराष्ट्र नवनिर्माण सेनेने (मनसे) एकनाथ शिंदे यांच्या शिवसेनेला पाठिंबा जाहीर केला आहे. या निर्णयामुळे उद्धव ठाकरे यांच्या शिवसेनेला मोठा धक्का बसल्याचे मानले जात आहे.

राजकीय गणिते बदलली

कल्याण-डोंबिवली हा मुख्यमंत्री एकनाथ शिंदे आणि खासदार श्रीकांत शिंदे यांचा बालेकिल्ला मानला जातो. मात्र, निवडणुकीच्या निकालानंतर बहुमताचा आकडा गाठणे कोणत्याही एका पक्षाला सहज शक्य नव्हते. अशा परिस्थितीत मनसेने दिलेला पाठिंबा शिंदे गटासाठी 'संजीवनी' ठरला आहे. या निर्णयामुळे आता महापालिकेवर भगवा फडकवण्याचा मार्ग मोकळा झाला आहे.

भाजपला सत्तेपासून दूर ठेवण्याचा प्रयत्न?

विशेष म्हणजे, खासदार श्रीकांत शिंदे यांनी या पाठिंब्याबाबत बोलताना एक महत्त्वाचे विधान केले आहे. "भारतीय जनता पक्षाला (भाजप) सत्तेपासून दूर ठेवण्यासाठी मनसेने आम्हाला पाठिंबा दिला आहे," असे त्यांनी स्पष्ट केले. महायुतीमध्ये एकत्र असूनही स्थानिक पातळीवर भाजपला रोखण्यासाठी मनसे आणि शिंदे गटाने एकत्र येणे, हे आगामी काळातील नव्या राजकीय समीकरणांचे संकेत मानले जात आहेत.

ठाकरे बंधूंमध्ये पुन्हा दरी येणार का?

एकनाथ शिंदे यांच्याशी हातमिळवणी केल्यामुळे राज ठाकरे आणि उद्धव ठाकरे यांच्यातील राजकीय संघर्ष अधिक तीव्र होण्याची शक्यता आहे. मुंबईत भाजप-शिंदे विरोधात उभे राहिलेले ठाकरे गट आणि कल्याणमध्ये शिंदेंना साथ देणारे मनसे, यामुळे मतदारांमध्येही संभ्रमाचे वातावरण पाहायला मिळत आहे.