पृथ्वीराज चव्हाण यंदा जिंकतील का? अतूल भोसले कशी देताहेत टक्कर? वाचा दक्षिण कराडचा ग्राऊंड रिपोर्ट

Karad South Assembly Election 2024 Prithviraj Chavan vs Dr. Atul Bhosale : महायुती आणि महाविकास आघाडी या दोन्ही आघाड्यांच्या नेत्यांनी निवडणूक प्रचारावर जोर दिला आहे. सातारा जिल्ह्यातील दक्षिण कराड मतदारसंघातून 78 वर्षीय माजी मुख्यमंत्री पृथ्वीराज चव्हाण सलग तिसऱ्यांदा विधानसभेत पोहोचण्यासाठी निवडणूक लढवत आहेत. पण, यावेळी त्यांना महायुतीचे अतुल भोसले यांचे कडवे आव्हान आहे.

दक्षिण कराड मतदारसंघ हा दीर्घकाळापासून काँग्रेस आणि भाजप या पारंपरिक प्रतिस्पर्ध्यांमधील लढतीचे केंद्र राहिले आहे. या मतदारसंघातून काँग्रेसचे उमेदवार आणि महाविकास आघाडीचे प्रमुख नेते पृथ्वीराज चव्हाण यांना भाजपचे 41 वर्षीय डॉ. अतुल भोसले यांच्याकडून तगडे आव्हान आहे. भोसले हे पेशाने डॉक्टर असून त्यांनी यापूर्वीही चव्हाण यांच्या विरोधात निवडणूक लढवली आहे.

चव्हाण विजयाबद्दल आश्वस्त

यावेळच्या निवडणुकीत चव्हाण आपल्या मागील कामगिरीवर विश्वास दाखवत आहेत. चव्हाण म्हणाले, "मला खात्री आहे की माझे मतदार माझा पुन्हा पाठिंबा देतील. मी नेहमीच काँग्रेसची विचारधारा मानली आहे. आमचे काम स्वतः बोलते आणि आम्ही सातत्याने विधानसभेत महत्त्वाचे मुद्दे मांडले आहेत. मला सलग तिसऱ्यांदा विजयाची खात्री आहे." या मतदारसंघात काँग्रेसची मजबूत परंपरा आहे, जिथे यशवंतराव मोहिते आणि विलासराव पाटील उंडाळकर या दिग्गज नेत्यांनी यापूर्वी विजय मिळवला आहे.

चव्हाण यांनी 2014 मध्ये 76,831 मतांनी येथे पहिली निवडणूक जिंकली होती. त्यानंतर 2019 मध्ये 92,296 मतांनी विजय मिळवला. तर भोसले यांच्या मतांची संख्या 2014 मध्ये 58,621 वरून 2019 मध्ये 83,166 पर्यंत वाढली. यंदा दोघांमध्ये जोरदार संघर्ष होण्याची शक्यता आहे.

दक्षिण कराड मतदारसंघात 8 उमेदवार रिंगणात

या मतदारसंघातून दोन अपक्षांसह एकूण आठ उमेदवार रिंगणात आहेत. मुख्य स्पर्धक चव्हाण आणि डॉ. भोसले मानले जात आहेत. याशिवाय या मतदारसंघातून विद्याधर गायकवाड (बहुजन समाज पक्ष), इंद्रजित गूजर (स्वाभिमानी शेतकरी संघटना), महेश जिरांगे (राष्ट्रीय समाज पक्ष), संजय गाडे (वंचित बहुजन आघाडी) आणि अपक्ष विश्वजित पाटील-उंडाळकर आणि शमा रहीम शेख निवडणूक लढवत आहेत.

यावेळी काँग्रेसमध्ये बंड नाही

मागील निवडणुकीत काँग्रेसला अंतर्गत बंडखोरीला सामोरे जावे लागले होते, ज्यामध्ये विलासराव पाटील-उंडाळकर आणि उदयसिंग पाटील-उंडाळकर यांनी पक्षाच्या प्रभुत्वाला आव्हान दिले होते. मात्र, यावेळी असा कोणताही अंतर्गत मतभेद दिसत नाही, त्यामुळे लढत काँग्रेस आणि भाजपमध्ये थेट होताना दिसत आहे.

भोसले यांनाही विजयाबद्दल आत्मविश्वासात

निवडणुकीबाबत भाजपचे डॉ. भोसले यांनीही विजयाबद्दल आत्मविश्वास व्यक्त केला आहे. त्यांनी सांगितले, "गेल्या दशकात पंतप्रधान नरेंद्र मोदी आणि देवेंद्र फडणवीस यांच्या नेतृत्वाखाली आम्ही अनेक विकास प्रकल्प सुरू केले आहेत. येथे 1,000 कोटींहून अधिक किमतीचे प्रकल्प राबवले असून त्याचा लाभ जनतेला झाला आहे. यावेळी बदल होईल आणि आम्हाला विजयाची पूर्ण खात्री आहे."