कोकणासह विदर्भातील 'या' जिल्ह्यांना रेड अलर्ट, आवश्यकता असेल तरच घराबाहेर पडा, प्रशासनाचा इशारा

हवामान विभागाच्या वतीने कोकण गोवा आणि विदर्भातील बऱ्याच जिल्ह्यांमध्ये रेड अलर्ट जारी केला आहे. गेल्या दोन दिवसांपासून विदर्भ आणि कोकणातील जिल्ह्यांमध्ये मुसळधार पाऊस पडत आहे. आज दिनांक 21 जुलै रोजी जोरदार पावसाची शक्यता वर्तवली जात आहे. तर मुंबई परिसरामध्ये पुढील 24 तासासाठी मुसळधार ते अति मुसळधार पावसाची शक्यता वर्तवली आहे.

प्रशासनाकडून सतर्कतेचा इशारा...

कोकणामध्ये मुसळधार पावसामुळे अनेक नद्यांच्या पाणी पातळीत वाढ झाली आहे. रत्नागिरी, रायगडमध्ये प्रशासन रेड अलर्ट मोडवर आहे. रत्नागिरी, कोल्हापूर, सातारा जिल्ह्याला आज पावसाचा रेड अलर्ट असून रायगड, सिंधुदुर्ग, पुणे, चंद्रपूर, गडचिरोली, गोंदियाला आज ऑरेंज अलर्ट देण्यात आला आहे.

मुंबई, ठाणे, पालघर, सांगली, सोलापूरला आज यलो अलर्ट देण्यात आला आहे. मुंबई, ठाणे, पालघर, सांगली, सोलापूरला आज यलो अलर्ट देण्यात आला आहे. रायगड जिल्ह्यात मुसळधार पाऊस पडत असल्यामुळे उल्हास नदीने इशारा पातळी गाठली आहे. नदी काठोकाठ भरून वाहात आहे. कोणत्याही क्षणी नदी धोक्याची पातळी गाठू शकते, त्यामुळे बदलापूर आणि नदीकाठावरील गावांना प्रशासनाकडून सतर्कतेचा इशारा देण्यात आला आहे.

ग्रामीण भागातील जनजीवन विस्कळीत

रत्नागिरी जिल्ह्यातल्या संगमेश्वर तालुक्यात कोंड, आंबेड-डिंगणी- कर्जुवे, धामणी, कसबा, फणसवणे भागात जिल्हा परिषदेच्या रस्त्यावर पाणी भरलंय. त्यामुळे या भागांमधली वाहतूक बंद ठेवण्यात आली आहे. सर्वांना सतर्कतेचा इशारा देण्यात आला आहे. मुसळधार पावसामुळे ग्रामीण भागातील जनजीवन विस्कळीत झाल्याचं दिसून आलंय. त्यामुळे महसूल आणि पोलीस प्रशासन अलर्ट मोडवर आहे.

कोकणातील नद्यांना पूर

रायगड जिल्ह्यात कुंडलिका, पाताळगंगा आणि अंबा या नद्यांनी इशारा पातळी ओलांडली असून रोहा, नागोठणे, खालापूर, खोपोली आणि आपटा परिसरातल्या नागरिकांना प्रशासनानं सतर्कतेचा इशारा दिला आहे. रायगड जिल्ह्यातल्या महाड आणि पोलादपूरमध्ये पावसाचा जोर कायम आहे.

जोरदार पावसामुळं नद्या नाले तुडूंब भरुन वाहू लागले आहेत. सावित्री नदी दुथडी भरुन वाहत असून पावसाचा जोर पुढील काही तास कायम राहिला तर नदीला पूर येण्याची शक्यता आहे. त्यामुळे नागरिकांनी आवश्यकता असेल तरच घराबाहेर पडावे असे आवाहन देखील हवामान विभागाच्या वतीने करण्यात आले आहे.