बनावट IAS पूजा खेडकरच्या कुटुंबाचे आणखी एक कांड उघडकीस; आईने ट्रक चालकाला केले किडनॅप!

Fake IAS Pooja Khedkar : गेल्या वर्षी बनावट कागदपत्रे वापरून आयएएस अधिकारी बनण्याचा प्रयत्न केल्यामुळे चर्चेत आलेल्या पूजा खेडकर पुन्हा एकदा वादाच्या भोवऱ्यात सापडल्या आहेत.

यावेळेस त्यांच्या कुटुंबातील सदस्यांवर अधिक गंभीर आरोप लावण्यात आले आहेत. एका ट्रक चालकाच्या अपहरण प्रकरणात पूजा खेडकरच्या आईला अटक करण्यात आली असून, वडील सध्या फरार आहेत. या घटनेमुळे खेडकर कुटुंबाची गुन्हेगारी पार्श्वभूमी पुन्हा एकदा समोर आली आहे.

नेमके काय प्रकरण आहे?

नवी मुंबईतील ऐरोली सिग्नलवर एका मिक्सर ट्रकची आणि एका कारची टक्कर झाली. अपघातानंतर, कारमधील लोकांनी मिक्सर ट्रक चालवणाऱ्या प्रल्हाद कुमार यांचे अपहरण केले.

या घटनेची तक्रार दाखल होताच पोलिसांनी तातडीने तपास सुरू केला आणि अपहरणासाठी वापरलेल्या कारच्या नंबर प्लेटवरून (MH 12 RT 5000) ती कार पुण्यातल्या चतुर्श्रृंगी भागातील पूजा खेडकर यांच्या घरात असल्याचे निष्पन्न झाले. पोलिसांनी तिथे छापा टाकला आणि प्रल्हाद कुमारला सुखरूप बाहेर काढले.

पोलिसांना अडथळा आणि कुत्र्यांना सोडून देणे

जेव्हा पोलीस पूजा खेडकरच्या घरी पोहोचले, तेव्हा त्यांची आई मनोरमा खेडकर यांनी पोलिसांना आत जाऊ देण्यास नकार दिला. त्यांनी पोलिसांच्या कारवाईत अडथळा आणण्याचा प्रयत्न केला. एक व्हिडिओ देखील व्हायरल झाला आहे ज्यात मनोरमा खेडकर पोलिसांशी वाद घालताना दिसत आहेत.

सूत्रांनुसार, पोलिसांना घरातून बाहेर काढण्यासाठी त्यांनी पाळीव कुत्र्यांनाही सोडून दिले. पोलिसांनी मनोरमा खेडकर यांना समन्स बजावले आहे आणि पुढील चौकशीसाठी त्यांना पोलीस ठाण्यात हजर राहण्यास सांगितले आहे.

वादग्रस्त आणि निलंबित प्रशिक्षणार्थी आयएएस अधिकारी पूजा खेडकर हिच्या आईचा आणखी एक प्रताप पुढे आला असून पोलिसांनी गुन्हा दाखल केला आहे. दिनांक 13 सप्टेंबर 2025 रोजी सायंकाळी सात वाजताच्या सुमारास मुलुंड ते ऐरोली रोडवरील ऐरोली हद्दीतील सिग्नलवर प्रल्हाद कुमार वय 22 राहणार तुर्भे… pic.twitter.com/61ZzrvHAl0

— Vijay Kumbhar (@VijayKumbhar62) September 14, 2025

पूजा खेडकर यांच्या कुटुंबाची गुन्हेगारी पार्श्वभूमी

मनोरमा खेडकर यांच्यावर अपहरणाव्यतिरिक्त आणखी काही आरोप आहेत. गेल्या वर्षी एका जमिनीच्या वादामुळे त्यांनी बंदूक दाखवल्याचा एक व्हिडिओ व्हायरल झाला होता. याप्रकरणी त्यांना रायगड जिल्ह्यातून अटक करण्यात आली होती.

या प्रकरणात पोलिसांनी पूजा खेडकरचे वडील दिलीप खेडकर यांचा शोध सुरू केला आहे, कारण अपहरणाच्या वेळी ते गाडीत उपस्थित होते. दिलीप खेडकर हे महाराष्ट्र प्रदूषण नियंत्रण विभागात अधिकारी म्हणून काम करत होते आणि निवृत्तीनंतर राजकारणात सक्रिय आहेत.

बनावट आयएएस बनल्याचा जुना घोटाळा!

पूजा खेडकर यांचे नाव यापूर्वी बनावट कागदपत्रांच्या आधारे आयएएस अधिकारी बनण्याचा प्रयत्न केल्यामुळे चर्चेत आले होते. केंद्र सरकारने तिला भारतीय प्रशासकीय सेवेतून बडतर्फ केले होते, कारण तिने ओबीसी (इतर मागासवर्गीय) आणि अपंगत्व कोट्याचा गैरवापर केला होता.

तिने अनेक वेळा नागरी सेवा परीक्षा दिली होती आणि कधी स्वतःला दृष्टिहीन तर कधी अपंग दाखवले होते. या प्रकरणी यूपीएससीने तिची निवड रद्द केली आणि तिला आयुष्यभर नागरी सेवा परीक्षा देण्यास बंदी घातली.

या नव्या प्रकरणामुळे खेडकर कुटुंबावर अनेक गंभीर प्रश्न निर्माण झाले आहेत आणि पोलीस या प्रकरणाचा सखोल तपास करत आहेत.