दिल्ली निवडणुका लढवण्यामागे अजितदादांची ही मोठी खेळी? भाजपसाठी अडचणीची ठरणार का? वाचा

Delhi Assembly Election 2025 : महाराष्ट्र विधानसभा निवडणुकीत राष्ट्रवादी काँग्रेसचे अध्यक्ष अजित पवार यांनी त्यांचे काका शरद पवार यांच्या राष्ट्रवादी काँग्रेस शरदचंद्र पवार पक्षाचा पराभव केला. अजित पवारांच्या पक्षाला 41 जागा मिळाल्या असून शरद पवार यांच्या पक्षाला केवळ 10 जागा मिळाल्या आहेत. हा शरद पवारांसाठी धक्का असतानाच आता अजित पवार यांनी पक्षवाढीचा एक मोठा निर्णय घेतला आहे.

त्यानुसार, अजित पवार यांनी दिल्ली विधानसभा निवडणूक लढवण्याची घोषणा दोन दिवसांपुर्वी केली. दिल्लीत सरकार स्थापन करण्यासाठी भाजपची धडपड सुरू असतानाच आता अजित पवार यांनीही अशी घोषणा केली आहे. गेल्या दोन लोकसभा निवडणुकीत भाजपला सातही जागा जिंकण्यात यश आले आहे पण हातून तीनवेळा विधानसभा आम आदमी पक्षाच्या वर्चस्वामुळे गमवावी लागली.

यावेळी दिल्ली विधानसभा निवडणुकीकडून भाजपला मोठ्या अपेक्षा आहेत. पण, महाराष्ट्रातील त्यांचा मित्रपक्ष राष्ट्रवादी काँग्रेसनेही येथे निवडणूक लढविण्याबाबत निर्णय घेत राजकारणात आणखी रंजकता आणली आहे.

राष्ट्रीय पक्षाचा दर्जा मिळवण्याचा प्रयत्न

अजित पवार आणि त्यांच्या पक्षाचे दिग्गज नेते आणि माजी केंद्रीय मंत्री प्रफुल्ल पटेल यांनी राष्ट्रवादीला पुन्हा राष्ट्रीय पक्षाचा दर्जा मिळवून देण्याची इच्छा असल्याचे स्पष्ट केले आहे. गतवर्षीच निवडणूक आयोगाने निकषांची पूर्तता न केल्यामुळे राष्ट्रवादीकडून राष्ट्रीय पक्षाचा दर्जा काढून घेतला होता.

NCP ला राष्ट्रीय पक्षाचा दर्जा मिळण्यासाठी काय आवश्यक आहे?

राष्ट्रीय पक्षाचा दर्जा प्राप्त तेव्हा होतो जेव्हा एखादा पक्ष तीनपैकी किमान एक अटी पूर्ण करतो.

काय आहेत तीन अटी?

पहिली अट - जेव्हा ते लोकसभा किंवा किमान चार किंवा अधिक राज्यांमधील विधानसभा निवडणुकीत मिळालेल्या मतांपैकी 6% मते मिळवितात आणि किमान 4 लोकसभा खासदार आहेत.

दुसरी अट - लोकसभेच्या किमान 2% जागा आणि त्या किमान तीन राज्यांतून जिंकलेल्या असाव्यात.

तिसरी अट - संबंधित पक्षाला किमान चार राज्यांत राज्यस्तरीय पक्षाचा दर्जा मिळाला पाहिजे.

राष्ट्रवादी काँग्रेससाठी तिसरी अट पूर्ण करण्याचा प्रयत्न

पहिल्या दोन अटी पूर्ण करणे दूरच पण राष्ट्रवादी काँग्रेस तिसरी अट पूर्ण करण्याचा प्रयत्न करत होती. याच उद्देशाने राष्ट्रवादीला दिल्लीची निवडणूक लढवायची आहे.

राष्ट्रवादीला राज्यस्तरीय पक्षाचा दर्जा कुठे मिळाला?

हा पक्ष आता महाराष्ट्रातील तिसरा महत्त्वाचा पक्ष आहे. त्यांनी राज्यात 41 जागा जिंकल्या आहेत आणि त्यांची मतांची टक्केवारी 9.01% आहे. नागालँडमध्ये त्यांचे 7 आमदार आहेत (9.56% मते) आणि अरुणाचल प्रदेशात 3 आमदार (10.43% मते). त्यामुळे चौथ्या राज्यात कामगिरी करून राज्यस्तरीय पक्षाचा दर्जा मिळवला तर पुन्हा राष्ट्रीय पक्षाचा दर्जा मिळू शकेल, अशी अजित पवार आणि त्यांच्या पक्षाला आशा आहे.

राष्ट्रवादीसाठी दिल्ली अजून दूर!

सध्या राष्ट्रवादीसाठी दिल्ली खूप दूर आहे. पक्षाने पहिल्यांदाच दिल्ली विधानसभा निवडणूक लढवण्याची घोषणा केली असे नाही. 1998 मध्ये स्थापन झाल्यानंतर 2003 पासून ते येथे सर्व विधानसभा निवडणुका लढवत आहे, परंतु त्यांना येथे कधीही राज्यस्तरीय पक्षाचा दर्जा मिळालेला नाही.

• 2020 मध्ये दिल्लीतील गेल्या तीन निवडणुकांमध्ये अतिशय लाजिरवाणी कामगिरी राष्ट्रवादीची होती. या पक्षाने 5 जागांवर निवडणूक लढवली आणि त्यांना फक्त 0.02% मते मिळाली.
• 2015 मध्ये 9 जागांवर निवडणूक लढवली आणि तेव्हाही फक्त 0.02% मते मिळाली.
• 2013 मध्ये देखील त्यांनी 09 उमेदवार उभे केले आणि 0.11% मते मिळवली.

NCP ची दिल्लीत सर्वोत्तम कामगिरी

• 2003 मध्ये होती जेव्हा त्यांनी दिल्लीत एक जागा जिंकली होती. त्यानंतर पक्षाने 33 जागांवर निवडणूक लढवली होती आणि 1 जागा जिंकली होती. तेव्हा त्यांची मतांची टक्केवारी 2.24% होती.
• 2008 पासून त्याची कामगिरी ढासळू लागली, जी सतत ढासळत राहिली.
• 2016 वर निवडणूक लढवली आणि 1.38% मते मिळाली. फक्त दोन जागांवरील अनामत रक्कम निश्चितच वाचली. 2013 नंतर खराब झालेली कामगिरी कधीच सावरली नाही.
• पहिल्या दोन निवडणुकांनंतर दिल्लीत पक्षाच्या एकाही उमेदवाराची अनामत रक्कम वाचवता आली नाही.
• दिल्लीत राष्ट्रवादी काँग्रेस भाजपसाठी अडचणीची ठरेल की नाही हे सांगणे कठीण आहे.

राष्ट्रवादीसाठी दिल्ली दूरचे स्वप्न का?

राज्यस्तरीय पक्षाचा दर्जा मिळवण्याचा प्रश्न आहे, त्यासाठी त्यांना खालील अटी पूर्ण कराव्या लागतील त्या अशा...

विधानसभा निवडणुकीत किमान 6% मते मिळायला हवीत आणि त्याशिवाय किमान 2 जागा जिंकल्या पाहिजेत. किंवा किमान 3 जागा जिंकायला हव्यात ते तूर्त तरी शक्य दिसत नाही.