मुंबई महापौरपद आरक्षण जाहीर होताच आक्षेप, राजकीय गदारोळ! ठाकरे गट आक्रमक; 'हा' केला गंभीर आरोप

Bmc mayor reservation 2026 : मुंबई, २२ जानेवारी २०२६: राज्यातील २९ महानगरपालिकांच्या महापौरपदासाठीच्या आरक्षणाची सोडत आज जाहीर झाली असून, सर्वांचे लक्ष लागलेल्या मुंबई महानगरपालिकेच्या महापौरपदावर अखेर शिक्कामोर्तब झाले आहे. मुंबईचे महापौरपद खुल्या प्रवर्गातील महिलेसाठी (Open Category - Woman) आरक्षित करण्यात आले आहे.

या निर्णयानंतर महापालिकेत मोठा राजकीय गदारोळ झाला असून, शिवसेना (उद्धव बाळासाहेब ठाकरे) गटाने या सोडत प्रक्रियेवर गंभीर आक्षेप घेत जोरदार घोषणाबाजी केली आहे. ही आरक्षण सोडत ठरवून आणि गैरप्रकार करून काढल्याचा आरोप ठाकरे गटाने केला आहे.

आरक्षण सोडतीवर ठाकरे गटाचा आक्षेप; चक्राकार पद्धत डावलली

महापौरपदाची सोडत जाहीर होताच ठाकरे गटाच्या नेत्या आणि माजी महापौर किशोरी पेडणेकर यांच्यासह आमदार मनोज जामसुतकर, राखी जाधव आणि निशिकांत शिंदे यांनी तीव्र आक्षेप नोंदवला. ठाकरे गटाचा मुख्य आरोप हा आहे की, आरक्षण निश्चित करताना चक्राकार पद्धतीचे पालन केले गेले नाही.

किशोरी पेडणेकर यांनी सवाल केला की, "२०१९ आणि २०२२ या दोन्ही वेळेस मुंबईचे महापौरपद सर्वसाधारण (खुल्या) गटासाठी आरक्षित होते. नियमानुसार, यावेळेस हे आरक्षण ओबीसी प्रवर्गाकडे जायला हवे होते. असे असताना पुन्हा एकदा खुल्या प्रवर्गासाठी आरक्षण कसे काढले? हा थेट ओबीसी समाजावर अन्याय आहे." नगरविकास राज्यमंत्री माधुरी मिसाळ यांनी या आक्षेपांची नोंद घेतली असून, सोडत प्रक्रिया पूर्ण झाल्यावर यावर विचार केला जाईल, असे आश्वासन दिले.

"ही लॉटरी ठरवून केली आहे" - किशोरी पेडणेकर (अधिकृत प्रतिक्रिया)

या प्रक्रियेवर आपली अधिकृत आणि संतप्त प्रतिक्रिया देताना किशोरी पेडणेकर म्हणाल्या, "ही लॉटरी पूर्णपणे ठरवून केलेली आहे. २०१९ आणि २०२२ मध्ये खुल्या गटाचा महापौर होता, त्यामुळे आता ओबीसींना संधी मिळायला हवी होती. पण तसे झाले नाही. इतकेच नाही, तर निवडणुकीपूर्वी अनुसूचित जातीसाठी नियम बनवले आणि आता बृहन्मुंबईत अनुसूचित जमातीचे (ST) तीन नगरसेवक असावेत, असा नियम आणला. आमच्याकडे अनुसूचित जमातीचे दोनच उमेदवार असल्याने जाणीवपूर्वक हा नियम मुंबईत लावला गेला. याचा स्पष्ट अर्थ आहे की, ही संपूर्ण लॉटरी सिस्टीम आणि निवडणूक प्रक्रिया पूर्वनियोजित आहे. आम्ही याचा तीव्र निषेध करतो."

मुंबई महापौरपद आरक्षण: ठाकरे गटाला मोठा धक्का

मुंबई महानगरपालिकेचे महापौरपद खुल्या प्रवर्गातील महिलेसाठी (Open Category - Woman) आरक्षित झाल्याने शिवसेना (उद्धव बाळासाहेब ठाकरे) गटाला मोठा धक्का बसला आहे. चक्राकार पद्धतीनुसार, हे आरक्षण यावेळी ओबीसी प्रवर्गासाठी अपेक्षित होते. मात्र, सलग तिसऱ्यांदा हे पद खुल्या प्रवर्गासाठी राखीव ठेवल्याने ठाकरे गटाने या प्रक्रियेवर गंभीर आक्षेप घेतला आहे. या गोंधळामुळे मुंबई महापालिकेतील वातावरण तापले असून, आगामी काळात महापौरपदाच्या आरक्षणाचा वाद अधिक चिघळण्याची शक्यता वर्तवली जात आहे.