नाशिकमध्ये भाजपचा 'हायव्होल्टेज ड्रामा':AB फॉर्मवरून राडा, शहराध्यक्षांचा पाठलाग, फोडले फॉर्महाऊस!

BJP Nashik high voltage drama : नाशिक महानगरपालिका निवडणुकीच्या उमेदवारी अर्ज भरण्याच्या शेवटच्या दिवशी भारतीय जनता पक्षामध्ये अभूतपूर्व यादवी पाहायला मिळत आहे. महायुतीतून बाहेर पडत स्वबळाचा नारा देणाऱ्या भाजपला आता बाहेरच्या शत्रूंपेक्षा घरच्याच बंडाळीचा सामना करावा लागत आहे. 'एबी' फॉर्मवरून निर्माण झालेला तिढा इतका विकोपाला गेला की, कार्यकर्त्यांनी चक्क शहराध्यक्षांच्या गाडीचा थरारक पाठलाग करत एका फार्महाऊसचे गेट तोडून आत प्रवेश केला.

एबी फॉर्मसाठी महामार्गावर 'फिल्मी' थरार

नाशिकमधील सर्व १२२ जागा स्वबळावर लढवण्याचा निर्णय भाजपने घेतला आहे, मात्र ऐनवेळी निष्ठावंतांची तिकिटे कापली गेल्याच्या चर्चेने कार्यकर्त्यांचा संयम सुटला.

गाडीचा पाठलाग: इच्छुक उमेदवार आणि त्यांचे समर्थक शहराध्यक्ष सुनील केदार यांची भेट घेण्यासाठी जमले होते. मात्र, कार्यकर्त्यांचा रोष पाहून केदार यांनी तिथून निघून जाण्याचा प्रयत्न केला. त्यानंतर कार्यकर्त्यांनी नाशिक-मुंबई महामार्गावर त्यांच्या गाडीचा फिल्मी स्टाईलने पाठलाग केला.

फार्महाऊसवर धडक: शहराध्यक्ष एका खासगी फार्महाऊसवर असल्याची माहिती मिळताच संतप्त कार्यकर्त्यांनी तिथे धाव घेतली. गेट बंद असल्याने कार्यकर्त्यांनी थेट गेट फोडून आत प्रवेश केला आणि आपला संताप व्यक्त केला.

संकटमोचक गिरीश महाजन 'नॉट रिचेबल'

नाशिक भाजपचे निवडणूक सूत्रधार आणि संकटमोचक मानले जाणारे मंत्री गिरीश महाजन हे सध्या 'नॉट रिचेबल' आहेत. पक्षातील या मोठ्या गोंधळाच्या काळात मुख्य नेतेच संपर्काबाहेर गेल्याने इच्छुक उमेदवारांची धाकधूक वाढली आहे. अर्ज भरण्यासाठी आता अवघे काही तास शिल्लक असताना, नेत्यांच्या या भूमिकेमुळे कार्यकर्त्यांमध्ये संभ्रमाचे वातावरण आहे.

निष्ठावंतांमध्ये नाराजीचा उद्रेक

भाजपने यंदा अनेक आयात केलेल्या नेत्यांना संधी दिल्यामुळे जुन्या आणि निष्ठावंत कार्यकर्त्यांमध्ये मोठी नाराजी आहे. "आम्ही वर्षानुवर्षे पक्षाचे काम केले आणि ऐन निवडणुकीत आम्हाला डावलले जात आहे," अशी भावना कार्यकर्ते व्यक्त करत आहेत. या बंडाळीमुळे भाजपच्या स्वबळाच्या गणिताला मोठा सुरुंग लागण्याची शक्यता वर्तवण्यात येत आहे.