मोठी बातमी : भाजपचा 'घराणेशाही'ला धक्का! महापालिकेत आमदार-खासदारांच्या वारसांना 'नो एन्ट्री'

BJP dynastic politics : महापालिका निवडणुकांसाठी भारतीय जनता पक्षाने एक अत्यंत धाडसी आणि धोरणात्मक निर्णय घेतला आहे. नगरपालिका निवडणुकांमध्ये एकाच कुटुंबातील अनेक सदस्यांना संधी देणाऱ्या भाजपने आता आपली रणनीती बदलली असून, महापालिका निवडणुकीत आमदार, खासदार आणि मंत्र्यांच्या नातेवाईकांना तिकीट न देण्याचे धोरण स्वीकारले आहे. या निर्णयामुळे राजकीय वर्तुळात, विशेषतः प्रस्थापित राजकीय कुटुंबांमध्ये मोठी खळबळ उडाली आहे.

सामान्य कार्यकर्त्यांना संधी देण्याचा 'मास्टरप्लॅन'

पक्षासाठी अहोरात्र कष्ट करणाऱ्या सामान्य कार्यकर्त्यांना सत्तेत वाटा मिळावा, या उद्देशाने भाजपने हे पाऊल उचलले आहे. मुंबईसह राज्यातील २९ महापालिकांसाठी १५ जानेवारी २०२६ रोजी मतदान होणार असून, उद्या उमेदवारी अर्ज भरण्याचा शेवटचा दिवस आहे. या पार्श्वभूमीवर, आज अर्ज मागे घेण्याच्या प्रक्रियेत अनेक बड्या नेत्यांच्या मुला-मुलींनी आपले अर्ज मागे घेतले आहेत.

नाशिक आणि कोल्हापुरात नेत्यांच्या वारसांची माघार

पक्षाच्या कडक नियमावलीमुळे अनेक बड्या नेत्यांना आपल्या मुलांच्या राजकीय महत्त्वाकांक्षांना मुरड घालावी लागली आहे.

नाशिकमध्ये माघार!

भाजपच्या आक्रमक आमदार देवयानी फरांदे यांच्या मुलाने आपला उमेदवारी अर्ज मागे घेतला आहे. "पक्षाच्या निर्णयामुळे सामान्य कार्यकर्त्यांना बळ मिळेल," अशी भावना फरांदे यांनी व्यक्त केली. तसेच आमदार सीमा हिरे यांच्या मुलीनेही निवडणुकीच्या रिंगणातून माघार घेतली आहे.

कोल्हापुरात महाडिकांची माघार

खासदार धनंजय महाडिक यांचे चिरंजीव कृष्णराज महाडिक यांनीही आपला अर्ज मागे घेतला. कृष्णराज यांनी सुरुवातीला वरिष्ठांच्या संमतीने अर्ज भरला होता, मात्र राज्य पातळीवर 'घराणेशाही' टाळण्याचा नियम लागू होताच त्यांनी पक्षादेश मानत माघार घेतली.

राहुल नार्वेकर कुटुंब ठरले 'अपवाद'

एकीकडे घराणेशाहीला लगाम घालण्याचा दावा केला जात असताना, विधानसभा अध्यक्ष राहुल नार्वेकर यांच्या बाबतीत मात्र पक्ष काहीसा मवाळ असल्याचे दिसून आले. नार्वेकर यांच्या भावाला आणि वहिनीला पक्षाने उमेदवारी जाहीर केली आहे. या एकाच अपवादामुळे राजकीय वर्तुळात चर्चांना उधाण आले असून, निष्ठावंत कार्यकर्त्यांमध्ये काही प्रमाणात नाराजीचे सूर उमटत आहेत.

नाराजांची समजूत काढण्याचे आव्हान

तिकीट नाकारल्यामुळे अनेक इच्छुक उमेदवार आणि त्यांचे समर्थक नाराज झाले आहेत. यावर भाष्य करताना खासदार महाडिक म्हणाले की, "महायुतीचे जागावाटप करताना काही ठिकाणी अन्याय झाला असू शकतो, पण आम्ही पुढील दोन दिवसांत सर्व नाराजांची समजूत काढू. आमची यादी आता अंतिम झाली असून अनेक काँग्रेसचे इच्छुकही आमच्या संपर्कात होते.

निवडणुकांचे वेळापत्रक

• मतदान: १५ जानेवारी २०२६
• निकाल: १६ जानेवारी २०२६