अमृता फडणवीसांबद्दल सिंगर अंजली भारतींचे अतिशय खालच्या थराचे वक्तव्य; नेमकं काय घडलं, राऊत म्हणाले?

Amruta Fadnavis controversy : महाराष्ट्राच्या सार्वजनिक जीवनात वैचारिक मतभेद असणे स्वाभाविक आहे, परंतु टीकेची पातळी जेव्हा वैयक्तिक द्वेष आणि अश्लीलतेपर्यंत पोहोचते, तेव्हा ती चिंतेची बाब ठरते. भंडारा येथे आयोजित एका कार्यक्रमात विद्रोही गायिका अंजली भारती यांनी राज्याचे मुख्यमंत्री देवेंद्र फडणवीस यांच्या पत्नी अमृता फडणवीस यांच्याबद्दल अत्यंत निंदनीय आणि आक्षेपार्ह वक्तव्य केले आहे. या विधानामुळे संपूर्ण राज्यात संतापाची लाट उसळली असून, भाजपासह विरोधी पक्षांनीही या प्रकाराचा तीव्र निषेध केला आहे.

नेमका प्रकार काय?

भंडारा येथे एका गायनाचा कार्यक्रम आयोजित करण्यात आला होता. या कार्यक्रमात अंजली भारती या राज्यभरातील महिलांवरील अत्याचाराच्या घटनांवर भाष्य करत होत्या. मात्र, संताप व्यक्त करण्याच्या नादात त्यांची जीभ घसरली आणि त्यांनी थेट अमृता फडणवीस यांच्याबद्दल अत्यंत आक्षेपार्ह आणि कायदेशीरदृष्ट्या गंभीर स्वरूपाचे विधान केले. धक्कादायक बाब म्हणजे, हे विधान सुरू असताना उपस्थितांपैकी काही लोकांनी टाळ्या वाजवल्या आणि पैसेही उधळले, ज्यामुळे या प्रकरणाची विदारकता अधिकच वाढली आहे.

श्रद्धेय डॉ. बाबासाहेब आंबेडकरांच्या फोटोसमोर उभं राहून मुख्यमंत्र्यांच्या पत्नीवर बलात्कार करण्याची चिथावणी, त्यावर टाळ्या-पैसे?

हे समाजाच्या अधःपतनाचं भयावह चित्र आहे.

पण आपल्याकडे श्रध्येय डॉ. बाबासाहेब आंबेडकरांनी दिलेलं संविधानाचं शस्त्र आहे. कायदेशीर प्रहार कसा करायचा ते… pic.twitter.com/qaipTJLw97

— Chitra Kishor Wagh (@ChitraKWagh) January 27, 2026

"कायदेशीर प्रहार आम्हाला ठाऊक आहे : चित्रा वाघ

भाजप महिला मोर्चाच्या प्रदेशाध्यक्षा चित्रा वाघ यांनी या घटनेचा व्हिडिओ समोर येताच आक्रमक पवित्रा घेतला आहे. त्यांनी म्हटले की, "एकीकडे डॉ. बाबासाहेब आंबेडकरांचा फोटो आणि दुसरीकडे मुख्यमंत्र्यांच्या पत्नीबद्दल बलात्कारासारख्या शब्दांत चिथावणी देणे, हे समाजाच्या अधःपतनाचे लक्षण आहे. आमच्याकडे बाबासाहेबांनी दिलेले संविधानाचे शस्त्र आहे आणि त्याचा कायदेशीर वापर करून अशा प्रवृत्तींना धडा कसा शिकवायचा, हे आम्हाला चांगलेच ठाऊक आहे."

राजकीय मतभेद बाजूला; ठाकरे गटाकडूनही निषेध

या प्रकरणाचे गांभीर्य लक्षात घेता, ठाकरे गटाच्या नेत्यांनीही राजकीय मतभेद बाजूला ठेवून अंजली भारतींच्या विधानाचा निषेध केला आहे. खासदार संजय राऊत म्हणाले की, "मी ते वक्तव्य ऐकले नाही, पण जर कुणी एखाद्या महिलेविषयी, विशेषतः अमृता फडणवीस यांच्यासारख्या कलाकाराविषयी अशा प्रकारची भाषा वापरत असेल, तर त्याचे समर्थन कधीही करता येणार नाही. हे पूर्णपणे चुकीचे आणि निषेधार्ह आहे.

किशोरी पेडणेकर काय म्हणाल्या?

माजी महापौर किशोरी पेडणेकर यांनी सोशल मीडियावर पोस्ट करत आपली भूमिका स्पष्ट केली. "शिवसेना उद्धव बाळासाहेब ठाकरे महिला आघाडीतर्फे आम्ही अंजली भारती यांच्या गलिच्छ वक्तव्याचा जाहीर निषेध करतो," असे त्यांनी नमूद केले.

कोण आहे अंजली भारती?

अंजली भारती ही एक 'बौद्ध अनुयायी विद्रोही गायिका' म्हणून ओळखली जाते. 'दीदी अंजली भारती' या नावाने तिचे यूट्यूब चॅनेल असून, त्यावर ५.७५ लाखांहून अधिक सबस्क्राईबर्स आहेत. तिने आतापर्यंत डॉ. बाबासाहेब आंबेडकरांच्या विचारांवर अनेक गाणी गायली आहेत. मात्र, सामाजिक प्रश्नांवर बोलताना मर्यादा ओलांडल्यामुळे ती आता वादाच्या भोवऱ्यात अडकली आहे.

कायदेशीर कारवाईची टांगती तलवार

या विधानानंतर भाजप कार्यकर्ते आक्रमक झाले असून राज्यातील विविध पोलीस ठाण्यांमध्ये तक्रारी दाखल करण्याची प्रक्रिया सुरू झाली आहे. एका महिलेने दुसऱ्या महिलेबद्दल इतकी विखारी भाषा वापरणे हे महाराष्ट्राच्या संस्कृतीला न शोभणारे असल्याचे मत सर्वसामान्य नागरिकांमधून व्यक्त होत आहे. पोलीस आता या प्रकरणी आयोजक आणि गायिकेवर काय कारवाई करतात, याकडे सर्वांचे लक्ष लागले आहे.