शिंदे-भाजपने महाराष्ट्राची वाट लावली, गृहमंत्री कुटुंब तोडण्यात व्यस्त; आदित्य ठाकरेंचा हल्लाबोल

Aditya Thackeray on Shinde Fadnavis : बदलापूर शहरातील एका शाळेत दोन मुलींवर अत्याचाराच्या घटनेनंतर गुरुवारी पुन्हा बदलापूर चर्चेत आले. ते म्हणजे बदलापूर रेल्वेस्थानकात गुरुवारी झालेला गोळीबार. याप्रकरणावरुन आता आदित्य ठाकरे यांनी शिंदे फडणवीसांवर निशाणा साधला. आमच्या सुसंस्कृत महाराष्ट्राची वाट लावली ह्या शिंदे-भाजपाने, असे म्हणत त्यांनी संताप व्यक्त केला.

आदित्य ठाकरे यांनी बदलापूरातील गोळीबार प्रकरणावरून निशाणा साधला. ते म्हणाले की, महाराष्ट्रातील कायदा सुव्यवस्था दिवसेंदिवस ढासळतच चालली आहे. स्त्रियांवर होणारे अत्याचार असोत, कोयता गॅंगसदृश घटना असोत की वारंवार होणारे गोळीबार महाराष्ट्रातील शहरं आणि गावं या गुन्हेगारीच्या घटनांनी ग्रासून गेलेली आहे, असे म्हणत ठाकरे गटाचे नेते आदित्य ठाकरे यांनी राज्य सरकारवर टीकास्त्र डागले.

नेमके आदित्य ठाकरेंचे ट्विट काय?

महाराष्ट्रातील कायदा सुव्यवस्था दिवसेंदिवस ढासळतच चाललीये. स्त्रियांवर होणारे अत्याचार असोत, कोयता गॅंगसदृश घटना असोत की वारंवार होणारे गोळीबार.... महाराष्ट्रातील शहरं आणि गावं ह्या गुन्हेगारीने ग्रासून गेलेली आहेत. काल तर बदलापूर रेल्वे स्थानकावर गोळीबार झाला! आणि राज्याचे गृहमंत्री मात्र पक्ष फोडणे, कुटुंब तोडणे, खोटा इतिहास शिकवणे, प्रचार करणे ह्यातच व्यस्त आहेत. आमच्या सुसंस्कृत महाराष्ट्राची वाट लावली ह्या शिंदे-भाजपाने!, असे म्हणत त्यांनी राज्य सरकारवर टीकास्त्र डागले आहे.

महाराष्ट्रातील कायदा सुव्यवस्था दिवसेंदिवस ढासळतच चाललीये. स्त्रियांवर होणारे अत्याचार असोत, कोयता गॅंगसदृश घटना असोत की वारंवार होणारे गोळीबार.... महाराष्ट्रातील शहरं आणि गावं ह्या गुन्हेगारीने ग्रासून गेलेली आहेत....

काल तर बदलापूर रेल्वे स्थानकावर गोळीबार झाला!

आणि…

— Aaditya Thackeray (@AUThackeray) September 6, 2024

बदलापूरमधील शाळेत लहान मुलींवर झालेल्या लैंगिक अत्याचाराचे प्रकरण ताजे असताना आता बदालपूर रेल्वे स्थानकावर गोळीबाराची घटना घडली आहे. गुरुवारी सायंकाळी ऐन गर्दीच्या वेळी हा गोळीबार झाला. यामुळे राज्यातील कायदा व सुव्यवस्थेवर प्रश्न उपस्थित होत आहे. यावरून आता ठाकरे गटाचे नेते, युवासेना प्रमुख, आमदार आदित्य ठाकरे यांनी शिंदे-भाजपा सरकारवर हल्ला चढवला आहे.

बदलापूरात काय घडलं?

बदलापूरच्या रेल्वे स्थानकावरील एक धक्कादायक व्हिडिओ गुरुवारी समोर आला होता. यात एक तरुण स्थानकावरच गोळीबार करत असल्याचे दिसत आहे. ही घटना सायंकाळी सहा वाजेच्या सुमारास घडली आहे. या गोळीबाराच्या घटनेनंतर परिसरात तसेच प्रवाशांमध्ये भीतीचे वातावरण पसरले होते. पोलिसांनी त्यानंतर घटनास्थळाची पाहणी केल्याचे सांगितले गेले. परंतु, अशा प्रकारची घटना घडल्याने बदलापुरात नेमकं चाललं काय, असा सवाल देखील उपस्थित केला जात आहे.