पिसाळलेल्या कुत्र्याचा 14 जणांना चावा; छत्रपती संभाजीनगरात थरार, Video पाहून अंगाचा होईल थरकाप!

Sambhajinagar stray dog attack : छत्रपती संभाजीनगर शहरातील सिडको एन-७ परिसरात रविवारी एका पिसाळलेल्या कुत्र्याने अक्षरशः दहशत माजवली. या कुत्र्याने एकाच वेळी लहान मुले, महिला आणि ज्येष्ठ नागरिकांसह तब्बल १४ जणांना चावा घेतला. या घटनेमुळे स्थानिक रहिवाशांमध्ये भीतीचे वातावरण पसरले आहे.

घटनेचा तपशील

एन-७ मधील मुकुल मंदिर परिसरात दुपारी ४ वाजता हा कुत्रा अचानक नागरिकांवर हल्ला करू लागला. कोणताही अंदाज येण्याआधीच तो एकापाठोपाठ एक लोकांना चावत पळून जात होता. या हल्ल्यात जखमी झालेल्या सर्वांना तातडीने घाटी रुग्णालयात उपचारासाठी दाखल करण्यात आले. स्थानिक रहिवासी रवींद्र तांगडे आणि त्यांच्या सहकाऱ्यांनी जखमींना रुग्णालयात पोहोचवण्यासाठी मदत केली.

महाराष्ट्र के संभाजीनगर में कुत्ते का आतंक।

एक दिन में 14 लोगों पर किया हमला।

कुछ लोग गंभीर रूप से घायल।#Dog #Maharashtra #SWAN pic.twitter.com/8dFNKKQX7T

— Naresh Parmar (@nareshsinh_007) August 18, 2025

प्रशासनाचा हलगर्जीपणा

या घटनेनंतर, संतप्त नागरिकांनी महापालिकेच्या पशुसंवर्धन विभागाकडे त्वरित डॉग व्हॅन पाठवून कुत्र्याला पकडण्याची विनंती केली. मात्र, रविवारची सुट्टी असल्याने कर्मचारी घरी गेल्याचे कारण देत विभागाकडून कोणताही प्रतिसाद मिळाला नाही. परिणामी, हा पिसाळलेला कुत्रा रात्री उशिरापर्यंत मोकाटच फिरत होता, ज्यामुळे नागरिकांची भीती आणखी वाढली. प्रशासनाच्या या हलगर्जीपणामुळे त्यांच्या कार्यक्षमतेवर मोठे प्रश्नचिन्ह निर्माण झाले आहे.

काळजी केंद्राचे उद्घाटन, पण मदत नाही

विशेष म्हणजे, काही दिवसांपूर्वीच रेल्वे स्टेशन उड्डाणपुलाखाली भटक्या प्राण्यांसाठी काळजी केंद्राचे उद्घाटन झाले होते. परंतु, हे केंद्र सुरू झाल्यानंतर अवघ्या दोनच दिवसांत अशी गंभीर घटना घडल्याने, केवळ सुविधा जाहीर करून काही उपयोग नाही, तर ती वेळेवर उपलब्ध असणेही महत्त्वाचे आहे, हे पुन्हा एकदा सिद्ध झाले आहे. या घटनेचा व्हिडिओ समाज माध्यमांवर व्हायरल झाला असून, नागरिकांकडून महापालिकेच्या निष्क्रियतेवर जोरदार टीका होत आहे.