ब्रिटीश राजघराण्याला धक्का! राजा चार्ल्स यांचे भाऊ अँड्र्यू माउंटबॅटन यांना अटक; नेमका वाद काय?

Prince Andrew arrest news : ब्रिटीश राजघराण्यातील वाद आणि खळबळजनक घटना थांबण्याचे नाव घेत नाहीत. आता राजा चार्ल्स तिसरे यांचे धाकटे भाऊ अँड्र्यू माउंटबॅटन-विंडसर यांना पोलिसांनी अटक केल्याने संपूर्ण जगात खळबळ उडाली आहे. विशेष म्हणजे, ज्या दिवशी अँड्र्यू आपला ६६ वा वाढदिवस साजरा करत होते, त्याच दिवशी ही कारवाई करण्यात आली.

अटकेचे मुख्य कारण: पदाचा गैरवापर

बीबीसी आणि लंडन टाईम्सच्या वृत्तानुसार, अँड्र्यू यांच्यावर त्यांनी 'व्यापार दूत' (Trade Envoy) म्हणून काम करताना आपल्या अधिकारांचा गैरवापर केल्याचा संशय आहे.

कायदेशीर तक्रार : गेल्या आठवड्यात एका राजेशाही विरोधी कार्यकर्त्याने थेम्स व्हॅली पोलिसांकडे तक्रार दाखल केली होती.

गोपनीयतेचा भंग : व्यापार दूत म्हणून काम करणाऱ्या व्यक्तीने आपल्या प्रवासाचा तपशील आणि व्यवसायाची कागदपत्रे गोपनीय ठेवणे बंधनकारक असते. मात्र, अँड्र्यू यांनी वादग्रस्त व्यावसायिक जेफ्री एपस्टाईन याच्याशी ही कागदपत्रे शेअर केल्याचा आरोप त्यांच्यावर आहे.

विन्स केबल यांचा आरोप : २०१० ते २०१५ दरम्यान व्यापार मंडळाचे अध्यक्ष राहिलेले विन्स केबल यांनीही अँड्र्यू यांच्यावर पदाचा गैरवापर केल्याचा ठपका ठेवला आहे.

'एपस्टाईन फाइल्स' आणि गंभीर आरोप

अँड्र्यू माउंटबॅटन यांचे नाव अमेरिकेतील कुप्रसिद्ध एपस्टाईन फाइल्समध्ये आल्यानंतर त्यांच्या अडचणी वाढल्या. जेफ्री एपस्टाईन हा लैंगिक गुन्ह्यातील दोषी असून त्याच्याशी अँड्र्यू यांचे घनिष्ठ संबंध असल्याचा दावा केला जात आहे.

मानवी तस्करीचा आरोप : एका पीडित महिलेने दावा केला आहे की, एपस्टाईनने तिला अँड्र्यू यांच्यासोबत लैंगिक संबंध ठेवण्यासाठी ब्रिटनमध्ये तस्करी करून आणले होते.

माहितीची देवाणघेवाण : संबंधित महिलेने असाही आरोप केला आहे की, व्यापार दूत म्हणून काम करत असताना अँड्र्यू यांनी अत्यंत संवेदनशील माहिती एका गुन्हेगारासोबत (एपस्टाईन) सामायिक केली.

राजघराण्याने झाडले हात; पदवी आणि घर हिरावले

या प्रकरणाचे गांभीर्य लक्षात घेऊन बकिंगहॅम पॅलेसने यापूर्वीच अँड्र्यू यांच्यावर कठोर कारवाई केली आहे. गेल्या वर्षीच त्यांची 'राजकुमार' (Prince) ही पदवी काढून घेण्यात आली. रॉयल लॉजमधून हकालपट्टी: त्यांना त्यांचे अधिकृत निवासस्थान 'रॉयल लॉज' रिकामे करण्यास भाग पाडण्यात आले.

नवी ओळख : राजवाड्याने स्पष्ट केले आहे की, आता त्यांना केवळ 'अँड्र्यू माउंटबॅटन-विंडसर' म्हणून ओळखले जाईल, त्यांच्या नावामागे कोणतेही राजेशाही बिरुद नसेल.

एपस्टाईन फाइल्समधील इतर बडी नावे

जेफ्री एपस्टाईनच्या संपर्कात राहिलेल्या जगातील प्रभावशाली व्यक्तींच्या यादीत केवळ अँड्र्यू यांचेच नाही, तर अनेक दिग्गजांची नावे समोर आली आहेत. यामध्ये खालील नावांचा समावेश आहे.

• राजकारण : डोनाल्ड ट्रम्प, बिल रिचर्डसन, एहुद बराक.
• उद्योग आणि तंत्रज्ञान : एलोन मस्क, बिल गेट्स, लेस वेक्सनर.
• मनोरंजन : मायकेल जॅक्सन, मिक जॅगर, केविन स्पेसी.
• विज्ञान आणि विचारवंत : स्टीफन हॉकिंग, नोम चॉम्स्की.