"PM मोदी माझ्यावर नाराज आहेत"; डोनाल्ड ट्रम्प यांचे 'या' मुद्द्यावर खळबळजनक विधान! वाचा काय आहे कारण

PM Modi Unhappy With Me Donald Trump statment : अमेरिकेचे राष्ट्राध्यक्ष डोनाल्ड ट्रम्प यांनी भारत आणि रशिया यांच्यातील तेल व्यापारावर पुन्हा एकदा कडक भूमिका घेतली आहे. पंतप्रधान मोदींसोबत वैयक्तिक संबंध चांगले असले तरी, व्यापारी धोरणांमुळे मोदी नाराज असल्याचे ट्रम्प यांनी म्हटले आहे.

नेमकं प्रकरण काय?

अमेरिकेचे राष्ट्राध्यक्ष डोनाल्ड ट्रम्प यांनी दावा केला आहे की, रशियाकडून तेल खरेदी केल्यामुळे भारतावर लादण्यात आलेल्या अमेरिकन टॅरिफमुळे (आयात शुल्क) पंतप्रधान नरेंद्र मोदी नाराज आहेत. २०२२ मध्ये युक्रेन युद्ध सुरू झाल्यापासून भारत रशियन कच्च्या तेलाचा मोठा खरेदीदार बनला आहे. रशियाचे उत्पन्न कमी करण्यासाठी अमेरिकेने भारतावर दबाव आणण्यास सुरुवात केली असून, त्याचाच भाग म्हणून भारतीय उत्पादनांवरील आयात शुल्क ५० टक्क्यांपर्यंत वाढवले आहे.

नेमके काय म्हणाले डोनाल्ड ट्रम्प?

ट्रम्प यांनी वॉशिंग्टनमध्ये प्रसारमाध्यमांशी बोलताना म्हटले की, "पंतप्रधान मोदींसोबत माझे अत्यंत चांगले आणि मैत्रीपूर्ण संबंध आहेत, पण ते सध्या माझ्यावर नाराज आहेत. रशियाकडून तेल खरेदी केल्यामुळे भारताला मोठ्या प्रमाणावर टॅरिफ (शुल्क) द्यावे लागत आहे, हे त्याचे मुख्य कारण आहे. त्यांना (भारताला) मला आनंदी ठेवायचे होते. मोदी हे एक उत्तम व्यक्ती आहेत, त्यांना माहित होते की मी या व्यवहारावर खूश नाही. आपण त्यांच्यावरील टॅरिफमध्ये कधीही वाढ करू शकतो."

भारताची भूमिका काय?

भारताने नेहमीच आपल्या ऊर्जा धोरणाचे समर्थन केले आहे. भारताच्या मते, स्वस्त इंधन मिळवणे हे देशाच्या हिताचे आहे. जागतिक बाजारपेठेत तेलाच्या किमती अस्थिर असताना भारतीय जनतेला परवडणाऱ्या दरात इंधन उपलब्ध करून देणे हे सरकारचे प्राधान्य आहे, असे भारताने अनेकदा स्पष्ट केले आहे.
ऊर्जा राजकारणात व्हेनेझुएलाचे महत्त्व

तेलाच्या या जागतिक वादात व्हेनेझुएलाचा मुद्दाही चर्चेत आला आहे. जगातील सर्वाधिक १७% तेलसाठा (३०० अब्ज बॅरल) व्हेनेझुएलाकडे असूनही, निर्बंध आणि गुंतवणुकीच्या अभावामुळे तेथील उत्पादन घटले आहे. रशियन तेलावरील अवलंबित्व कमी करण्यासाठी अमेरिका आता इतर पर्यायांकडे लक्ष देत आहे, ज्याचा परिणाम भारतासारख्या देशांच्या व्यापार धोरणांवर होत आहे.