शॉपिंग मॉलमध्ये भीषण आग, 60 जणांचा होरपळून मृत्यू; या देशात घडला मृत्यूचा तांडव, राष्ट्रीय शोक जाहीर

Massive fire news shopping mall in Iraq : इराकमधून एक अत्यंत हृदयद्रावक आणि धक्कादायक बातमी समोर आली आहे. इराकमधील अल-कुट येथील एका शॉपिंग मॉलमध्ये भीषण आग लागून 60 जणांचा होरपळून मृत्यू झाल्याची दुर्देवी घटना घडली आहे. आगीच्या या तांडवात अनेकांचा जीव गेला असून, याचे व्हिडीओ सोशल मीडियावर व्हायरल झाले आहेत.

आगीचे भयाण दृश्य

एएफपी वृत्तसंस्थेने दिलेल्या माहितीनुसार, अल-कुट येथील एका सुपरमार्केटमध्ये ही दुर्घटना घडली. व्हायरल झालेल्या छायाचित्रांमध्ये इमारतीचा मोठा भाग आगीच्या भक्ष्यस्थानी पडलेला आणि मोठ्या प्रमाणात धूर निघताना दिसत आहे. या दुर्घटनेचा एक व्हिडीओ सोशल मीडियावर प्रचंड व्हायरल होत आहे. त्यात एक पाच मजली इमारत पूर्णपणे आगीच्या विळख्यात अडकलेली दिसत आहे आणि अग्निशमन दलाचे जवान आग विझवण्यासाठी शर्थीचे प्रयत्न करत आहेत.

मृतांचा आकडा 60 वर

वासित प्रांताचे गव्हर्नर मोहम्मद अल-मियाही यांनी अधिकृत आयएनए वृत्तसंस्थेला सांगितले की, "एका मोठ्या शॉपिंग सेंटरमध्ये झालेल्या या आगीत मृतांची संख्या सुमारे 60 झाली आहे." आगीचे नेमके कारण अद्याप स्पष्ट झालेले नाही, परंतु गव्हर्नर म्हणाले की, तपासाचे प्राथमिक निष्कर्ष ४८ तासांत जाहीर केले जातील.

शोककळा...कायदेशीर कारवाई

ही आग एका हायपरमार्केट आणि रेस्टॉरंटमध्ये लागली, त्यावेळी अनेक लोक जेवण करत होते आणि खरेदी करत होते. अग्निशमन दलाच्या जवानांनी अनेक लोकांना वाचवले आणि आग विझवली, असे राज्यपालांनी सांगितले. या दुःखद अपघातामुळे देशभरात तीन दिवसांचा शोक जाहीर करण्यात आला आहे. गव्हर्नर मोहम्मद अल-मियाही यांनी इमारतीच्या मालकाविरुद्ध आणि मॉलविरुद्ध खटला दाखल केला आहे, असे आयएनएने म्हटले आहे.

🔴#LATEST — Fire at shopping mall in eastern Iraq kills 50, Iraqi sources report pic.twitter.com/v6ftD4YMdi

— Türkiye Today (@turkiyetodaycom) July 17, 2025

अवघ्या 5 दिवसांपूर्वीच उघडला होता मॉल

घटनेच्या ठिकाणाहून मोठ्या संख्येने रुग्णवाहिका जखमी आणि मृतदेह घेऊन जात आहेत. बगदादच्या आग्नेयेस १६० किलोमीटर अंतरावर असलेल्या शहरातील एक रुग्णालय भरले आहे. धक्कादायक बाब म्हणजे, एएफपीच्या माहितीनुसार, हा मॉल फक्त ५ दिवसांपूर्वीच उघडण्यात आला होता. प्राथमिक तपासात इमारतीच्या पहिल्या मजल्यावर आग लागल्याचे समोर आले आहे.

यापूर्वी २०२३ मध्ये इराकमध्ये एका लग्न समारंभात मोठी दुर्घटना घडली होती, ज्यात १०० लोकांचा मृत्यू झाला होता आणि १५० लोक जखमी झाले होते. इराकमधील आगीच्या घटनांची ही दुसरी मोठी आणि अत्यंत दुर्देवी घटना आहे. या घटनेमुळे इराकभर हळहळ व्यक्त होत आहे.

चूक कुठे झाली? 48 तासांत उघडकीस येईल?

आगीचे कारण अद्याप स्पष्ट झालेले नाही, परंतु गव्हर्नर मोहम्मद अल-मायाही म्हणाले की तपासाचे प्राथमिक निकाल 48 तासांत समोर येतील. एका प्रत्यक्षदर्शीच्या म्हणण्यानुसार, आग एअर कंडिशनरमध्ये स्फोट झाल्याने सुरू झाली. गव्हर्नरांनी मॉल मालक आणि इमारतीच्या कंत्राटदाराविरुद्ध खटला दाखल करण्याची घोषणा केली.

त्यांनी देशभरातील सुरक्षा मानकांचा तात्काळ आढावा घेण्याचे आवाहनही केले. इराकचे पंतप्रधान मोहम्मद शिया अल-सुदानी यांनी गृहमंत्र्यांना घटनास्थळी भेट देऊन चौकशी करण्याचे आणि भविष्यात अशा घटना टाळण्यासाठी उपाययोजना करण्याचे निर्देश दिले.

किती बळींची ओळख पटली आहे?

शहराच्या आरोग्य अधिकाऱ्यांनी रॉयटर्सला सांगितले की 59 बळींची ओळख पटली आहे, परंतु एक मृतदेह इतका जळाला आहे की त्याची ओळख पटू शकली नाही. आरोग्य विभागाच्या अधिकाऱ्याने सांगितले की, "अनेक मृतदेह अजूनही ढिगाऱ्याखाली गाडले आहेत."

मृतांमध्ये महिला आणि मुले देखील आहेत, ज्यांपैकी बहुतेकांचा गुदमरून मृत्यू झाला. 14 मृतदेह पूर्णपणे जळाल्यामुळे ते अज्ञात आहेत. गुरुवारी सकाळपर्यंत रुग्णवाहिका जखमींना बगदादपासून 160 किलोमीटर आग्नेयेस असलेल्या कुट येथील रुग्णालयात घेऊन जात होत्या.