जपानच्या राजकारणात भूकंप; पंतप्रधान शिगेरू इशिबा यांनी राजीनाम्याची केली घोषणा, नेमकं काय घडलं

Japan PM Shigeru Ishiba Resigns : जपानच्या राजकारणात मोठी उलथापालथ झाली आहे. जुलैमध्ये झालेल्या संसदीय निवडणुकीतील दारूण पराभव आणि पक्षातून वाढत्या दबावामुळे जपानचे पंतप्रधान शिगेरू इशिबा यांनी आपल्या पदाचा राजीनामा देण्याची घोषणा केली आहे.

त्यांचा हा निर्णय केवळ राजकीय जबाबदारी स्वीकारण्यापुरता मर्यादित नसून, पक्षातील वाढता असंतोष शांत करण्याचा एक महत्त्वाचा प्रयत्न मानला जात आहे. जपानमध्ये राजकीय भूकंपामुळे जगभरात चर्चा रंगली आहे.

पराभव आणि वाढता दबाव

शिगेरू इशिबा यांनी गेल्या वर्षी ऑक्टोबरमध्ये पंतप्रधानपदाची सूत्रे स्वीकारली होती. मात्र, त्यांच्या नेतृत्वाखाली लिबरल डेमोक्रॅटिक पक्षाला (एलडीपी) जुलैमध्ये झालेल्या संसदीय निवडणुकीत मोठा पराभव पत्करावा लागला.

248 जागांच्या वरिष्ठ सभागृहात बहुमत न मिळाल्याने त्यांच्या सरकारच्या स्थिरतेवर प्रश्नचिन्ह निर्माण झाले. या पराभवानंतर, पक्षाच्या उजव्या विचारसरणीच्या गटाकडून इशिबा यांच्यावर राजीनामा देण्यासाठी सतत दबाव येत होता.

पक्षाच्या नेत्यांनी त्यांना त्यांच्या राजकीय जबाबदारीची जाणीव करून दिली आणि राजीनाम्याची मागणी केली. सुरुवातीला त्यांनी या दबावाला विरोध केला, पण अखेरीस त्यांनी माघार घेतली.

नेतृत्व निवडणुकीपूर्वीच मोठा निर्णय

इशिबा यांच्या राजीनाम्याचा निर्णय एका महत्त्वपूर्ण क्षणी आला आहे. त्यांचा पक्ष, एलडीपी, सोमवारी लवकर नेतृत्व निवडणुका घ्यायच्या की नाही यावर मतदान करणार होता.

हा प्रस्ताव मंजूर झाला असता, तर ते इशिबा यांच्यावरील अविश्वासासारखेच झाले असते. ही अपमानास्पद परिस्थिती टाळण्यासाठी आणि पक्षातील विरोधकांना शांत करण्यासाठी त्यांनी स्वतःहून राजीनाम्याचा मार्ग निवडला.

या निर्णयामुळे जपानच्या राजकारणात आता नवीन नेतृत्व कोण स्वीकारणार, याबाबत चर्चा सुरू झाल्या आहेत. एलडीपी पक्षाच्या पुढील वाटचालीकडे सर्वांचे लक्ष लागले आहे.