सर्वात मोठी बातमी ! इस्त्रायलचा इराणच्या राजधानीवर सर्वात मोठा हल्ला

israel iran war 28 february 2026 air strike tehran | इस्त्रायल आणि इराणमधील तणावाने आता युद्धाचे भीषण रूप धारण केले असून, आज शनिवार, २८ फेब्रुवारी २०२६ रोजी इस्त्रायलने इराणवर मोठा 'प्रतिबंधात्मक' (Pre-emptive) हवाई हल्ला केला आहे. या हल्ल्यानंतर संपूर्ण मध्यपूर्वेत खळबळ उडाली असून इस्त्रायलमध्ये हाय अलर्ट जारी करण्यात आला आहे.

इस्त्रायलचा इराणवर भीषण हल्ला: सविस्तर वृत्त

आज पहाटे इराणची राजधानी तेहरानमध्ये प्रचंड स्फोटांचे आवाज ऐकू आले. इस्त्रायलचे संरक्षण मंत्री इस्त्रायल कात्झ यांनी अधिकृतपणे या हल्ल्याची पुष्टी केली असून, हा हल्ला इस्त्रायलवरील संभाव्य धोके नष्ट करण्यासाठी करण्यात आल्याचे त्यांनी सांगितले. तेहरानमधील डाउनटाऊन भागात अनेक ठिकाणी आगीचे गोळे आणि धुराचे लोट पाहायला मिळाले आहेत. इस्त्रायली गुप्तचर यंत्रणांच्या माहितीनुसार, इराण इस्त्रायलवर मोठा क्षेपणास्त्र हल्ला करण्याच्या तयारीत होता, तो रोखण्यासाठी इस्त्रायलने हे पाऊल उचलल्याचा दावा केला आहे.

या हल्ल्यानंतर इस्त्रायलमध्ये तातडीने राष्ट्रीय आणीबाणी (State of Emergency) घोषित करण्यात आली आहे. देशातील सर्व शाळा, महाविद्यालये आणि सार्वजनिक ठिकाणे बंद ठेवण्याचे आदेश देण्यात आले असून, नागरिकांना सुरक्षित स्थळी किंवा बंकरच्या जवळ राहण्याच्या सूचना देण्यात आल्या आहेत. तेल अवीवसह अनेक शहरांमध्ये सायरनचा आवाज घुमत असून, इराणकडून होणाऱ्या संभाव्य प्रतिहल्ल्यासाठी इस्त्रायलची संरक्षण यंत्रणा 'आयर्न डोम' सज्ज ठेवण्यात आली आहे.

दुसरीकडे, इराणच्या सरकारी माध्यमांनी स्फोटांची कबुली दिली असली तरी, नुकसानीबद्दल अद्याप सविस्तर माहिती दिलेली नाही. मात्र, इराणने याआधीच इशारा दिला होता की, त्यांच्या भूमीवर हल्ला झाल्यास त्याचे गंभीर परिणाम भोगावे लागतील. जिनिव्हा येथे झालेली अणुचाचणी विषयक चर्चा निष्फळ ठरल्यानंतर आणि अमेरिकेने या भागात आपले नौदल तैनात केल्यानंतर ही लष्करी कारवाई झाली आहे. या संघर्षामुळे जागतिक बाजारपेठेत कच्च्या तेलाच्या किमतीत मोठी वाढ होण्याची शक्यता असून, संपूर्ण जगाचे लक्ष आता इराणच्या पुढील पाऊलाकडे लागले आहे.